ក្រសួងមហាផ្ទៃឲ្យគណបក្សប្រជាធិបតេយ្យមូលដ្ឋានបំពេញបែបបទឡើងវិញ
សំណើសុំចុះបញ្ជីគណបក្សប្រជាធិបតេយ្យមូលដ្ឋាន នៅក្រសួងមហាផ្ទៃត្រូវបានបដិសេធភ្លាមៗក្រោយពិនិត្យឃើញថាខុសនីតិវិធីនៃការចុះបញ្ជីគណបក្សនយោបាយ ដែលមានបញ្ញត្តិនៅក្នុងច្បាប់ជាធរមាន។ ប៉ុន្តែ លោក សាម អ៊ីន អគ្គលេខាធិការគណបក្សប្រជាធិបតេយ្យនៅមិនទាន់បានដំណឹងនេះនៅឡើយទេ។
ចុះផ្សាយនៅថ្ងៃ៖
ស្តាប់ - ០១:៣៨
លោក ខៀវ សុភ័គ ឲ្យដឹងថា ក្រុមការងាររបស់ក្រសួងតម្រូវឲ្យគណបក្សប្រជាធិបតេយ្យមូលដ្ឋានបំពេញបែបបទឡើងវិញជាថ្មីក្រោយពិនិត្យឃើញថាខុសនីតីវិធី ។
ថ្លែងប្រាប់វិទ្យុបារាំងអន្តរជាតិនៅថ្ងៃចន្ទទី០៣សីហា អ្នកនាំពាក្យក្រសួងមហាផ្ទៃរូបនេះបញ្ជាក់ថា ចំណុចដែលខ្វះចន្លោះគឺប្រវត្តិរូបនៃអ្នកបង្កើតគណបក្សមិនមានបិទរូបថត។ ហើយក្នុងប្រវត្តិរូបនេះទៀតសោតចំនួននៃអ្នកបង្កើតគណបក្សមិនគ្រប់តាមចំនួនដែលច្បាប់កំណត់៧នាក់ ប៉ុន្តែមានតែ៥នាក់។ បើតាមលោក ខៀវ សុភ័គ ក្រោយកែសម្រួលហើយ ក្រសួងនៅរង់ចាំទទួលការចុះបញ្ជីគណបក្សប្រជាធិបតេយ្យមូលដ្ឋានជាថ្មី។
លោក សាម អ៊ីន អគ្គលេខាធិការគណបក្សប្រជាធិបតេយ្យមូលដ្ឋានឲ្យដឹងថា ក្រុមការងាររបស់លោកចំនួនបីនាក់បានយកលិខិតសុំចុះបញ្ជីគណបក្សនៅក្រសួងមហាផ្ទៃ តែរហូតមកដល់ពេលនេះការឆ្លើយតបយ៉ាងណាពីក្រសួងលោកនៅមិនទាន់ដំណឹងពីក្រុមការងារនៅឡើយទេ។
សូមបញ្ជាក់ថា គណបក្សប្រជាធិបតេយ្យមូលដ្ឋាន ត្រូវបានបង្កើតឡើងដោយអតីតមន្ដ្រីសង្គមស៊ីវិល និងបញ្ញវ័ន្តមួយចំនួន។ រចនាសម្ពន្ធថ្មី របស់បក្សនេះរួមមាន លោក យ៉េង វិរៈ ជាប់ឆ្នោតជាប្រធាន លោក សាម ស៊ុនឌឿន ជាប់ឆ្នោតជាអនុប្រធាន លោកសាម អ៊ីន ជាអគ្គលេខាធិការ និងលោក ប៉ោ សេដ្ឋា ជាហេរញ្ញិក។ ការបោះឆ្នោតនេះបានធ្វើឡើងនៅថ្ងៃទី០២ខែសីហា ដោយមានបេក្ខជនឈរឈ្មោះចំនួន៦រូប និងមានអ្នកចូលរួមបោះឆ្នោតប្រមាណ១០៤នាក់។ ក្នុងថ្ងៃជាមួយគ្នានេះ គណបក្សក៏បានបោះឆ្នោតជ្រើសរើសថ្នាក់ដឹកនាំឃុំគំរូទាំង១០ផងដែរ។
ជាការកត់សម្គាល់ថ្មីៗនេះ នៅកម្ពុជាមានគណបក្សថ្មីកើតឡើងជាបន្តបន្ទាប់ ដែលក្នុងនោះរួមមានគណបក្សអំណាចពលរដ្ឋខ្មែរ ដែលមានលោកសួន សេរីរដ្ឋា ជាប្រធាន។ គណបក្សសំបុកឃ្មុំសង្គមប្រជាធិបតេយ្យ ដែលមានលោក ម៉ម សុណង់ដូជាប្រធាន និងគណបក្សប្រជាធិបតេយ្យមូលដ្ឋាន ដែលមានលោក យ៉េង វិរៈជាប្រធានគណបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ