ក្រសួងមហាផ្ទៃតម្រូវឲ្យអង្គការក្រៅរដ្ឋាភិបាលផ្ដល់គណនីពីធនាគារត្រឹមដំណាច់ខែកញ្ញាខាងមុខ
ក្រសួងមហាផ្ទៃ បានតម្រូវឲ្យសមាគម និងអង្គការក្រៅរដ្ឋាភិបាលក្នុងស្រុកត្រូវរួសរាន់ជូនដំណឹងជាលាយលក្ខណ៍អក្សរអំពីគណនីធនាគារដែលក្រុងសង្គមស៊ីវិលទាំងអស់កំពុងប្រតិបត្តិការ ទៅក្រសួងមហាផ្ទៃនិងក្រសួងសេដ្ឋកិច្ច និងហិរញ្ញវត្ថុ ឲ្យបានមុនដំណាច់ខែ កញ្ញា ខាងមុខនេះ។ ក្នុងករណីអង្គការ ឬសមាគម ណាមួយ ខកខានមិនបានគោរពតាមការណែនាំនេះទេ នឹងត្រូវទទួលទោសតាមច្បាប់ស្ដីពីសមាគម និងអង្គការក្រៅរដ្ឋាភិបាល។ អត្ថបទដោយ៖ យ៉ា រសាត់
ចុះផ្សាយនៅថ្ងៃ៖
ស្តាប់ - ០២:៣៥
ក្នុងលិខិតជូនដំណឹងដែលបានចុះហត្ថលេខាដោយលោក ស ខេង រដ្ឋមន្ដ្រីក្រសួងមហាផ្ទៃ កាលពីថ្ងៃទី៤ ខែកក្កដា ឆ្នាំ២០១៧ និងទើបត្រូវបានផ្សព្វផ្សាយនៅថ្ងៃទី ២១ ខែ សីហា ឆ្នាំ ២០១៧ នេះ ក្រសួងមហាផ្ទៃបានឲ្យជូនដំណឹងថា សមាគម និងអង្គការមិនមែនរដ្ឋាភិបាលដែលបានចុះបញ្ជី និងតម្កល់សំណុំឯកសារនៅក្រសួងមហាផ្ទៃ ត្រូវអនុវត្តតាមលក្ខខណ្ឌដែលបានកំណត់ដោយច្បាប់ស្ដីពីសមាគម និងអង្គការក្រៅរដ្ឋាភិបាល ក្នុងមាត្រាទី១០ និងមាត្រាទី ២៥។
បើតាមសេចក្ដីជូនដំណឹងនេះ សមាគម និងអង្គការមិនមែនរដ្ឋាភិបាលត្រូវផ្ដល់ព័ត៌មានអំពីគណនីធនាគារសម្រាប់ប្រតិបត្តិការរបស់សង្គមស៊ីវិលទាំនោះ ទៅក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ឲ្យបានយ៉ាងយូរបំផុតត្រឹមដំណាច់ខែ កញ្ញា ឆ្នាំ ២០១៧។ ក្រៅពីព័ត៌មានខាងលើ ក្រសួងមហាផ្ទៃក៏តម្រូវឲ្យក្រុមសង្គមស៊ីវិលទាំងនោះ ផ្ដល់ព័ត៌មានផងដែរចំពោះការប្រែប្រួលគណនីធនាគារ ការធ្វើវិសោធនកម្មលក្ខន្ដិកៈ ឬការផ្លាស់ប្ដូរទីស្នាក់ការ ឬផ្លាស់ប្ដូរដំណែងប្រធាន ឬនាយកប្រតិបត្តិ ក្នុងរយៈពេលយ៉ាងយូរ១៥ថ្ងៃនៃការប្រែប្រួលឬផ្លាស់ប្ដូរនោះ។
ក្រសួងមហាផ្ទៃក៏បានរំលឹក ក្រុមអង្គការសង្គមស៊ីវិលឲ្យផ្ដល់របាយការណ៍បូកសរុបសកម្មភាពការងារ និងរបាយការហិរញ្ញវត្ថុប្រចាំឆ្នាំ ទៅក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ មិនឲ្យហួសខែ កុម្ភៈ ឆ្នាំបន្ទាប់ឡើយ។ បើពុំនោះទេ អង្គការ ឬសមាគម ត្រូវទទួលវិធានការតាមច្បាប់ស្តីពីសមាគម និងអង្គការមិនមែនរដ្ឋាភិបាល”។
មាត្រាទី៣០ នៃច្បាប់ស្ដីពីសមាគម និងអង្គការមិនមែនរដ្ឋាភិបាលបានចែថា “....ក្នុងករណីមិនបានអនុវត្តតាមការជូនដំណឹង ក្រសួងមហាផ្ទៃត្រូវជូនដំណឹងជាលាយក្ដណ៍អក្សរផ្អាកសកម្មភាពជាបណ្ដោះអាសន្នក្នុងរយៈពេលយ៉ាងយូរ៩០ (កៅសិប) ថ្ងៃ។ ក្នុងករណីមិនព្រមអនុវត្ត ក្រសួងមហាផ្ទៃត្រូវសម្រេចជាលាយលក្ខណ៍អក្សរ លុបឈ្មោះចេញពីបញ្ជី”។
ទាក់ទងនឹងសេចក្ដីជូនដំណឹងនេះ នាយកប្រតិបត្តិផ្នែកតស៊ូមតិរបស់អង្គការសិទ្ធិមនុស្សកម្ពុជា លោក ឌុច ពិសិត្ថ បានលើកឡើងថា អង្គការរបស់លោកកំពុងពិភាក្សាគ្នាអំពីរបាយការណ៍នោះ ហើយលោកថា គ្រោងនឹងបញ្ជូនទៅក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ឲ្យបានទាន់ពេលវេលាតាមសេចក្ដីជូនដំណឹងនេះ។
ចំណែកឯប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ វិញបានលើកឡើងថា អង្គការរបស់លោកបានផ្ញើររបាយការណ៍តាមច្បាប់ស្ដីពីសមាគម និងអង្គការ ដែលបានតម្រូវនោះ រួចរាល់អស់ហើយ។ លោកបន្ថែមថា នៅពេលមានការប្រែប្រួលពីម្ចាស់ជំនួយរៀងរាល់ឆ្នាំ លោកតែងតែជូនដំណឹង និងផ្ដល់របាយការណ៍ចំពោះបំរែបំរួលនោះទៅក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ។ លោកថា ច្បាប់នេះហាក់ផ្ទុយពីលទ្ធិប្រជាធិបតេយ្យ និងជាប្រភេទការងារបន្ថែមលើភាពមមាញឹកប្រចាំថ្ងៃរបស់អង្គការក្រៅរដ្ឋាភិបាលទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ