អ្នកនាំពាក្យ៖ ជំនួបជាមួយលោកស្រី រ៉ូណា ស្មីត ប្រកបដោយការយោគយល់គ្នាច្រើនជាងលើកមុនៗ
លោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា នៅព្រឹកថ្ងៃទី៣០ ខែមេសា បានជួបពិភាក្សាការងារជាមួយគណៈកម្មាធិការសិទ្ធិមនុស្សកម្ពុជារបស់ រដ្ឋាភិបាលកម្ពុជា។ ជាជំនួប ដែលមានការពិភាក្សាលើទិដ្ឋភាពបច្ចេកទេសជុំវិញការវិវត្តន៍នៃសិទ្ធិមនុស្ស នៅក្នុងប្រទេសកម្ពុជា ដោយមិនបានជជែករឿងនយោបាយឡើយ។ នេះបើតាមគណៈកម្មាធិការ សិទ្ធិមនុស្សកម្ពុជា។
ចុះផ្សាយនៅថ្ងៃ៖
ស្តាប់ - ០២:៤៥
ជំនួបរវាងគណៈកម្មាធិការសិទ្ធិមនុស្សកម្ពុជា និងលោកស្រី រ៉ូណា ស្មីត លើកទី៧នេះ ភាគីទាំងពីរបាន ជជែកគ្នាជុំវិញប្រធានបទមួយចំនួន ដូចជាការអនុវត្តអានុសាសន៍របស់អង្គការសហប្រជាជាតិស្តីពីសិទ្ធិ មនុស្សនៅប្រទេសកម្ពុជា ការឆ្លើយតបទៅនឹងរបាយការណ៍ត្រួតពិនិត្យរបស់អង្គការសហប្រជាជាតិ និងមានការលើកឡើងច្រើនពីបញ្ហាចង្អៀតណែននៃអ្នកទោសនៅក្នុងពន្ធនាគារផងដែរ។
លោក ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជា លើកឡើងថាកម្ពុជាបានអនុវត្តតាម អនុសាសន៍ ដែលលោកស្រី រ៉ូណា ស្មីត បានផ្តល់ឲ្យកាលពីជំនួបលើកទី៦កន្លងមក ដោយមិនមានការ យឺតយ៉ាវទេ។
ពាក់ព័ន្ធទៅនឹងរបាយការណ៍ត្រួតពិនិត្យជាសកលតាមកំណត់លើកទី៣ នៃកិច្ចប្រជុំកាលពីថ្ងៃទី៣០ខែមករា កន្លងទៅ ប្រទេសកម្ពុជាបានទទួលយកអនុសាសន៍ចំនួន១៧៣ និងធ្វើការកត់សម្គាល់ចំនួន២៥ ក្នុងចំណោមអនុសាសន៍ចំនួន១៩៨ ពីប្រទេសចំនួន៧៣។ អនុសាសន៍ទាំងនេះ ត្រូវបានយកទៅអនុវត្ត ដោយស្ថាប័នពាក់ព័ន្ធនានារបស់រដ្ឋាភិបាល ដែលចំនុចនេះ លោកស្រី រ៉ូណា ស្មីត បង្ហាញនូវ ការសរសើ ដោយសារកម្ពុជាអនុវត្តកាតព្វកិច្ចជាអន្តរជាតិបានល្អ និងទាន់ពេលវេលា។ នេះបើតាមលោក ជិន ម៉ាលីន។
លើសពីនេះ លោកស្រី រ៉ូណា ស្មីត ក៏បានលើកមកជជែកផងដែរ ដោយជម្រុញឲ្យប្រទេសកម្ពុជាមាន ដំណោះស្រាយជុំវិញការចង្អៀតណែននៃពន្ធនាគារ ពង្រីកបន្ថែមមណ្ឌលអប់រំ កែប្រែនិងស្តារនីតិសម្បទា អ្នកញៀនគ្រឿងញៀន។
ដោយមិនមានបរិយាកាសតឹងសសៃកដាក់គ្នា លោក ជិន ម៉ាលីន បញ្ជាក់ទៅកាន់លោកស្រី រ៉ូណា ស្មីត ថាក្រសួងមហាផ្ទៃ និងក្រសួងយុត្តិធម៌ កំពុងតែធ្វើការងារ ជុំវិញអនុសាសន៍នៃការចង្អៀតណែន មណ្ឌលអប់រំកែប្រែ និងពន្ធនាគារ ដោយមានការបង្កើតក្រុមការងារមួយ។ គឺជាក្រុមការងារ ដែលឆ្លើយតប ទៅនឹងអនុសាសន៍ ប្រកបដោយភាពប្រញាប់ប្រញាល់។
សូមរំលឹកថាអ្នករាយការណ៍ពិសេស អង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា លោកស្រី រ៉ូណា ស្មីត បានមកបំពេញទស្សនកិច្ច នៅប្រទេសកម្ពុជា ចាប់ពីថ្ងៃទី ២៩ ខែមេសា ដល់ថ្ងៃទី៩ ខែឧសភា ឆ្នាំ២០១៩។ ការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា ឲ្យដឹងថា ទស្សនៈកិច្ចរបស់ លោកស្រីស្មីតផ្តោត ទៅលើស្ថានភាពសិទ្ធិមនុស្ស នាពេលបច្ចុប្បន្ន និងតាមដានពីដំណើរ វិវត្តន៍នានាចាប់តាំងពីបេសកកម្មរបស់ លោកស្រីកាលពីខែវិច្ឆិកាកន្លងមក។ កាលពីថ្ងៃចន្ទម្សិលមិញ លោកស្រី រ៉ូណា ស្មីត បានជួបជាលើកដំបូងនៃទស្សនកិច្ចលើកទី៧របស់លោកស្រី
នៅកម្ពុជា ជាមួយនឹងក្រុមអង្គការសង្គមស៊ីវិលនានា ដោយមានការត្អូញត្អែ ពីសិទ្ធិសេរីភាពរបស់អង្គការ សមាគម ក្នុងការធ្វើសកម្មភាពរបស់ពួកគេផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ