សំណុំរឿងក្លិបលុច្សសារី៖ តំណាងអយ្យការចោទប្រកាន់មនុស្ស១៧នាក់ ពីបទជួញដូរគ្រឿងញៀន
នៅទីបំផុតតំណាងអយ្យការសាលាដំបូងរាជធានីភ្នំពេញ បានសម្រេចចោទប្រកាន់មនុស្ស១៧នាក់ ពីបទជួញដូរគ្រឿងញៀន ដោយខុសច្បាប់នៅក្លិបកំសាន្តលុច្សសារី។ ការចោទប្រកាន់នេះធ្វើឡើងមួយថ្ងៃបន្ទាប់មនុស្ស១៧នាក់នេះ ត្រូវបានបញ្ជូនទៅសាលាដំបូងរាជធានីភ្នំពេញកាលពីថ្ងៃទី១២មិថុនានេះ។
ចុះផ្សាយនៅថ្ងៃ៖
ក្រៅពីបទចោទជួញដូរគ្រឿងញៀនដោយខុសច្បាប់ ជនល្មើសចំនួន១៧នាក់នេះ រងការចោទប្រកាន់ពីបទសមគំនិតតាមរយៈ ការសម្រួលនិងចាត់ចែងឲ្យប្រើប្រាស់សារធាតុញៀនរួមនឹងការរក្សាទុកសារធាតុញៀនដោយខុសច្បាប់។ បទចោទនេះធ្វើឡើងដោយផ្អែកតាមមាត្រា៤០ មាត្រា៤២ និងមាត្រា៤៤ នៃច្បាប់ស្តីពីការគ្រប់គ្រងគ្រឿងញៀន និងមាត្រា២៩នៃក្រមព្រហ្មទណ្ឌ។ លោក លី សុផាណា អ្នកនាំពាក្យសាលាដំបូងរាជធានីភ្នំពេញបានបញ្ជាក់តាមប្រព័ន្ធតេឡេក្រាម នៅថ្ងៃទី១៣មិថុនានេះថា តំណាងអយ្យការបានបញ្ជូន ជនល្មើស១៧នាក់ និងសំណុំរឿងរបស់ពួកគេទៅចៅក្រមស៊ើបសួរដើម្បីចាត់ការបន្តតាមនីតិវិធី។
ក្នុងចំណោមជនល្មើស១៧នាក់ ដែលអយ្យការធ្វើការចោទប្រកាន់នោះគឺ៥នាក់ជាជនជាតិវៀតណាម។ ជនជាតិរៀតណាម៥នាក់នេះ ស្ថិតក្នុងចំណោមមនុស្ស៤០៨នាក់ដែលមានជនជាតិខ្មែរ ចិន ម៉ាឡេស៊ី និងសិង្ហបុរី ដែលកងកម្លាំងនគរបាលស្នងការដ្ឋានគរបាលរាជធានីភ្នំពេញចុះទៅឃាត់ខ្លួននៅក្លិបលុច្សសារី កាលពីយប់រំលងអាធ្រាត្រឈានចូលថ្ងៃទី៨ខែមិថុនា។
គួរជម្រាបជូនថា ក្លិបលុច្សសារីគឺជាក្លិបកំសាន្តធំទី៣ ដែលសមត្ថកិច្ចឆែកឆេររកឃើញមានការប្រើប្រាស់និងជួញដូរគ្រឿងញៀនទ្រង់ទ្រាយធំ បន្ទាប់ពីក្លិបរ៉ក់និងក្លិបមៃអាមី។ កន្លងមកប្រតិបត្តិការរបស់សមត្ថកិច្ចតែងទទួលបានការសាទរពីមហាជនក៏ដូចជាសង្គមស៊ីវិល។ ប៉ុន្តែយ៉ាងណាសង្គមស៊ីវិលចង់ឃើញមានការឃាត់ខ្លួនមេក្លោងធំដែលនៅពីក្រោយការជួញដូរគ្រឿងញៀនមកផ្ដន្ទាទោស ខណៈមេក្លោងធំៗមិនត្រូវបានវែកមុខយកមកផ្តន្ទាទោសតាមច្បាប់នោះឡើយ។
គួររំឭកថា ក្នុងឆ្នាំ២០១៨ សមត្ថកិច្ចបង្ក្រាបគ្រឿងញៀនជាង៨ពាន់ករណី ឃាត់ខ្លួនមនុស្សជាង១.៦ម៉ឺននាក់ ដកហូតថ្នាំញៀនជាងកន្លះតោន។ ម្សិលមិញលោកឧបនាយករដ្ឋមន្រ្តី ស ខេង បានប្រកាសជាថ្មីថា នៅឆ្នាំ២០១៩នេះ តែបញ្ចប់ការចែកចាយ និងប្រើប្រាស់គ្រឿងញៀននៅតាមខារ៉ាអូខេ និងក្លឹបកំសាន្ត ពីព្រោះជាការទទួលខុសត្រូវធំធេងនៅចំពោះមុខប្រវត្តិសាស្រ្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ