លោក មាជ សុវណ្ណរ៉ា កំពុងមានជំងឺ
លោក ជួង ជូងី មេធាវីការពារក្ដីឲ្យលោក មាជ សុវណ្ណរ៉ា ឲ្យដឹងថាលោក មាជ សុវណ្ណរ៉ា កំពុងមានជំងឺឈឺក្បាលខ្លាំងហើយគ្រូពេទ្យពិនិត្យឃើញថា លោកកំពុងលើសជាតិស្ករ។ ប្រឈមបញ្ហានេះ លោក ជួង ជូងី និងមេធាវីដទៃទៀតនឹងពិភាក្សាជាមួយគ្នាដើម្បីរកវិធីសាស្ត្រជួយ លោក មាជ សុវណ្ណរ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លោក ជួង ជូងី អះអាងថា លោកមានការព្រួយបារម្ភខ្លាំងចំពោះស្ថានភាពរបស់លោក មាជ សុវណ្ណរ៉ា បន្ទាប់ពីលោកបានឃើញស្ថានភាពជាក់ស្ដែងនិងបានស្ដាប់ការលើកឡើងរបស់ លោក មាជ សុវណ្ណ កាលពីថ្ងៃទី៨ កញ្ញា។ លោក មាជ សុវណ្ណរ៉ា បានលើកឡើងថា លោកមានអាការៈឈឺក្បាលខ្លាំងដែលបណ្ដាលមកពីការគិតច្រើន។ ម្យ៉ាងទៀតរូបលោកធ្លាប់ជួបគ្រោះថ្នាក់ចរាចរណ៍ដោយបានប៉ះទង្គិចត្រង់ក្បាល។ ហើយតាមការត្រួតពិនិត្យរបស់គ្រូពេទ្យ លោក មាជ សុវណ្ណរ៉ា កំពុងលើសជាតិស្ករ។
លោកមេធាវី ជួង ជូងី និង ក្រុមមេធាវីដទៃទៀតនឹងពិភាក្សាគ្នារកវិធីសាស្ត្រផ្នែកច្បាប់ដើម្បីជួយសម្រួលដល់សុខភាពលោក មាជ សុវណ្ណរ៉ា។ បច្ចុប្បន្នសំណុំរឿងលោក មាជ សុវណ្ណរ៉ា កំពុងស្ថិតនៅក្នុងដៃតុលាការឧទ្ទរណ៍ហើយត្រូវបានប្ដឹងសារទុកទៅតុលាការកំពូល។ រហូតមកដល់ពេលនេះនៅមិនទាន់មានចំណាត់ការបែបណានៅឡើយទេ។
កាលពីពាក់កណ្តាលខែមិនាឆ្នាំ២០១៦កន្លងទៅតុលាការសាលាឧទ្ធរណ៏បានលើកយកករណីរបស់លោក មាជ សុវណ្ណារ៉ា និងសកម្មជនគណបក្សប្រឆំាងចំនួន១១រូបផ្សេងទៀត មកបើកសវនាការជាថ្មី ។ ជាសវនាការលើបណ្តឹងប្រឆាំងនឹងសេចក្តីសម្រេចរបស់តុលាការក្រុងភ្នំពេញ ពាក់ព័ន្ធនឹងសំណុំរឿងរំដោះទីលានប្រជាធិបតេយ្យកាលពីឆ្នាំ២០១៤។
គួរជម្រាបជូនថា លោក មាជ សុវណ្ណារ៉ា មន្រ្តីជាន់ខ្ពស់គណបក្សសង្រ្គោះជាតិ រួមទាំងសកម្មជនគណបក្សប្រឆាំង១០នាក់ផ្សេងទៀត ត្រូវបានតុលាការក្រុងភ្នំពេញកាត់ទោសកាលពីខែកក្កដា ឆ្នាំ២០១៥ ឲ្យជាប់ពន្ធនាគារក្នុងម្នាក់ចាប់ពី៧ទៅ២០ឆ្នាំ ពីបទចូលរួម និងដឹកនាំកុប្បកម្មរំដោះទីលានប្រជាធិបតេយ្យ ដែលបានប្រព្រឹត្តិទៅនៅថ្ងៃទី ១៥ កក្កដា ឆ្នាំ២០១៤។
គិតត្រឹមខែកញ្ញាឆ្នាំ២០១៦ គឺមានរយៈពេលជាងមួយឆ្នាំមកហើយ ដែលសកម្មជនគណបក្សសង្រ្គោះជាតិទាំង១១រូបរួមនិងលោក មាជ សុវណ្ណរ៉ា កំពុងជាប់ឃុំនៅក្នុងពន្ធនាគារព្រៃសរ។
គួរបញ្ជាក់ដែរថា លោក មាជ សុវណ្ណារ៉ា ដែលគេដឹងថា មានសញ្ជាតិអាមេរិកកាំងផងនោះ ត្រូវបានកូនស្រីច្បងរបស់ខ្លួន ផ្ញើលិខិតសុំអន្តរាគមន៍ដោះលែង ជាបន្តបន្ទាប់ទៅកាន់ប្រធានាធិបតីអាមេរិក លោក បារ៉ាក់ អូបាម៉ា និងប្រមុខការទូតអាមេរិក លោក ចន ឃែរី កាលពីអំឡុងខែមករាកន្លងទៅ។ ក៏ប៉ុន្តែ គេមិនឃើញមានការប្រែប្រួល ឬសញ្ញាវិជ្ជមានណាមួយនោះទេ ខណៈដែលប្រមុខការទូតអាមេរិកលោក ចន ឃែរី បានមកបំពេញទស្សនកិច្ចនៅកម្ពុជាកាលពីចុងខែមករាកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ