លីកាដូ ៖ កុមាររស់នៅក្នុងពន្ធនាគារ កំពុងរងបញ្ហាផ្នែកអាកប្បកិរិយានិងស្មារតី
កុមារដែលធំលូតលាស់ក្នុងពន្ធនាគារ ដោយមិនមានការតាមដាននិងចិញ្ចឹមបីបាច់ត្រឹមត្រូវ បណ្តាលឲ្យក្មេងមានបញ្ហាផ្នែកអាកប្បកិរិយានិងបញ្ហាស្មារតី។ នេះបើអង្គការសម្ព័ន្ធខ្មែរជំរឿននិងការពារសិទ្ធិមនុស្ស ហៅកាត់ថា (LICADHO លីកាដូ) ដែលបានចេញរបាយការណ៍នៅថ្ងៃសុក្រទី ១៤កុម្ភៈ។ របាយការណ៍នេះបានទាមទារឲ្យអាជ្ញាធរចេញមុខមកទទួលខុសត្រូវចំពោះកុមារដែលរស់នៅក្នុងពន្ធនាគារ នានា នៅទូទាំងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
«កុមារភាពនៅក្នុងពន្ធនាគារ ការចម្រើនវ័យក្នុងពន្ធនាគារកម្ពុជា៖រឿងរ៉ាវរបស់ដារ៉ា» គឺជាចំណងជើងរបាយការណ៍ដែលមានកម្រាស១៧ទំព័រ ភាសាខ្មែរនិងអង់គ្លេស ចុះផ្សាយនៅថ្ងៃទី១៤កុម្ភៈឆ្នាំ២០១៥។ ក្នុងរបាយការណ៍លេខទី២នេះ អង្គការលីកាដូ បានរៀបរាប់ពីជីវិតរបស់កុមារា ដែលបានរស់ជាមួយឪពុកម្តាយ និងជីដូន ដែលជាប់ឃុំពីបទឃាតកម្ម នៅក្នុងពន្ធនាគារខេត្តកណ្តាល ឬពន្ធនាគារ តាខ្មៅ។
ដារ៉ា គឺជាឈ្មោះដែលគេដាក់ឲ្យ។ ក្រោយពីមានអាយុគម្រប់៣ឆ្នាំ ដារ៉ា ត្រូវបានឲ្យចាកចេញពីមន្ទីរអប់រំកែប្រែ កាលខែមីនាឆ្នាំ២០១៤។ គួរជម្រាបជូនដែរថា ច្បាប់របស់កម្ពុជា មិនអនុញ្ញាតឲ្យកុមារដែលមានឪពុកម្តាយឃាប់ឃុំ បន្តរស់នៅក្នុងពន្ធនាគារជាមួយទៀតទេ បើពួកគេមានអាយុលើសពី៣ឆ្នាំ។
អង្គការលីកាដូ បានលើកឡើងថា ការចាកចេញរបស់កុមារាម្នាក់ ឈ្មោះ ដារ៉ា នោះ មិនត្រូវបានគេពិចារណាគិតគូរដល់វិធានការសុវត្ថិភាព និងលក្ខខណ្ឌរស់នៅសមស្របជាមុននោះទេ។ រហូតដល់វ័យជាង៥ឆ្នាំទៅហើយ កុមារនោះនៅតែមិនទាន់អាចនិយាយបានដូចក្មេងដទៃ និងមានបញ្ហាលូតលាស់យឺតយ៉ាវជាខ្លាំង។
គិតត្រឹមខែមករា ដើមឆ្នាំ២០១៥នេះ ក្នុងចំណោមពន្ធនាគារចំនួន១៨កន្លែង នៅខេត្តក្រុងចំនួន១១ ដែលអង្គការលីកាដូបានសិក្សាស្រាវជ្រាវ មានកុមារចំនួន៣៩នាក់ អាយុចន្លោះពី១ខែដល់៤ឆ្នាំ កំពុងរស់នៅជាមួយម្តាយជាប់ពិរុទ្ធក្នុងពន្ធនាគារកម្ពុជា។ ក្នុងចំណោមទាំងកុមារទាំង៣៩នាក់នោះ មានកុមារប្រមាណជាពាក់កណ្តាល បានចាប់កំណើតនៅក្នុងពន្ធនាគារ ហើយកុមារស្ទើរតែទាំងអស់ មិនបានចងចាំ ឬមិនធ្លាប់ស្គាល់ជីវភាពនៅក្រៅរបងពន្ធនាគារឡើយ។
អ្នកគ្រប់គ្រប់គម្រោងពន្ធនាគារនៃអង្គការសិទ្ធិមនុស្សលីកាដូ អ្នកស្រី នូ សំអន បានបញ្ជាក់ថា ក្នុងការចេញរបាយការណ៍នេះ គឺមានការចូលរួមវិភាគ និងវាយតម្លៃពីសំណាក់វេជ្ជបណ្ឌិតជំនាញខាងចិត្តសាស្ត្រកុមារ ហើយដែលរកឃើញថា កុមារដែលកំពុងរស់នៅក្នុងពន្ធនាគារក្តី និងបានចាកចេញហើយក្តី គឺកំពុងប្រឈមនឹងបញ្ហាផ្នែកអាកប្បកិរិយា មានការលូតលាស់យឺតយ៉ាវទាំងរាងកាយ និងសតិស្មារតី ព្រមទាំងមានបញ្ហាមិនប្រក្រតីដូចកុមារធម្មតា។ ទោះយ៉ាងណាក្តី មន្ត្រីរបស់អង្គការសិទ្ធិមនុស្សលីកាដូរូបនេះ បានសង្កត់ធ្ងន់ថា អាជ្ញាធរខាងពន្ធនាគារនៅមិនទាន់បានទទួលយកអនុសាសន៍របស់អង្គការខ្លួនទៅពិចារណានិងអនុវត្តបានគ្រប់ជ្រុងជ្រោយនៅឡើយទេ។
ជុំវិញបញ្ហារបស់កុមាររស់ក្នុងពន្ធនាគារជាមួយឪពុកម្តាយដែលជាប់ពិរុទ្ធនេះ នៅរសៀលថ្ងៃអាទិត្យ ទី១៥កុម្ភៈនេះ វិទ្យុបារាំងអន្តរជាតិ មិនទាន់អាចសូមការបំភ្លឺណាមួយ ពីសំណាក់ប្រធានពន្ធនាគារខេត្តកណ្តាល ប្រធានពន្ធនាគារ ម២ ឬអគ្គនាយកនៃអគ្គនាយកដ្ឋានពន្ធនាគាររបស់ក្រសួងមហាផ្ទៃបាននោះទេ ដោយសារទូរស័ព្ទមិនចូល និងលេខទូរស័ព្ទខ្លះ មិនមានអ្នកទទួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ