អតីតអ្នកកាសែតវិទ្យុអាស៊ីសេរី២នាក់ ត្រូវបានតុលាការដោះលែងឲ្យនៅក្រៅឃុំបណ្តោះអាសន្ន
អតីតអ្នកកាសែតវិទ្យុអាស៊ីសេរីពីររូបគឺលោក អ៊ួន ឈិន និងលោក យាង សុធារិន ត្រូវបានតុលាការសម្រេចដោះលែងឲ្យនៅក្រៅឃុំជាបណ្តោះអាសន្ន នៅថ្ងៃអង្គារនេះហើយ។ នេះបើតាមមន្ត្រីតុលាការថ្លែងប្រាប់ប្រព័ន្ធផ្សព្វផ្សាយក្នុងស្រុកមួយចំនួន។ ការដោះលែងអតីតអ្នកកាសែតទាំងពីរបានធ្វើឡើង ១ថ្ងៃបន្ទាប់ពីតុលាការ សម្រេចដោះលែងអ្នកស្រី ទេព វន្នី សកម្មជនដីធ្លីបឹងកក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
លោក អ៊ួន ឈិន និងលោក យាង សុធារិន ហៅ យាង សុជាមេត្តា ត្រូវបានតុលាការសម្រេចដោះលែងឲ្យនៅក្រៅឃុំជាបណ្តោះអាសន្ននៅថ្ងៃនេះ។ អ្នកទាំងពីរ ត្រូវបានអាជ្ញាធរខ័ណ្ឌមានជ័យ ចាប់ខ្លួន និងរឹបអូសសម្ភារៈប្រើប្រាស់ទាំងអស់ កាលពីខែវិច្ឆិកា ឆ្នាំ ២០១៧ នៅក្នុងបន្ទប់សណ្ឋាគារមួយ ស្ថិតនៅក្បែរស្ពានអាកាសស្ទឹងមានជ័យ ក្រុងភ្នំពេញ។ ការឃាត់ខ្លួននេះ ធ្វើឡើងបន្ទាប់ពីការរិយាល័យវិទ្យុអាស៊ីសេរី នៅទីក្រុងភ្នំពេញបានបង្ខំចិត្តបិទទ្វារផ្អាកប្រតិបត្តិការរបស់ខ្លួនកាលពីដើមខែកញ្ញាឆ្នាំទៅ។
អ្នកទាំងពីរ ត្រូវ តុលាការ ធ្វើការចោទប្រកាន់តាមមាត្រា៤៤៥ នៃក្រមព្រហ្មទណ្ឌកម្ពុជា ពីបទ ប្រគល់ឲ្យរដ្ឋបរទេស នូវព័ត៌មានជាអាទិ៍ ដែលនាំឲ្យអន្ដរាយដល់ការការពារជាតិ ប្រព្រឹត្តនៅប្រទេសកម្ពុជា កាលពីអំឡុង ឆ្នាំ២០១៧ និងបង្គាប់ឲ្យឃុំខ្លួនដាក់ពន្ធនាគារ ដែលរហូតមកដល់ពេលនេះ មានរយៈពេលជាង៨ខែ។
ដោយឡែក តុលាការក៏បានចោទប្រកាន់ផងដែរទៅលើលោក អ៊ួន ឈិន មួយករណីទៀតពីបទផលិតវីដេអូអាសអាភាស។ ក៏ប៉ុន្តែមេធាវីការពារក្តី ឲ្យអតីតអ្នកកាសែតវិទ្យុអាស៊ីសេរី ទាំងពីរគឺលោក កែវ វ៉ានី្ន តែងបដិសេធថាកូនក្តីរបស់លោកមិនបានប្រព្រឹត្តដូចការចោទប្រកាន់នោះទេ។ ទោះយ៉ាងណា កន្លងមក តុលាការ បានបដិសេធម្តងហើយម្តងទៀតពីការសុំនៅក្រៅឃុំ ដែលស្នើដោយមេធាវីអ្នកទាំងពីរ កន្លងមក ខណៈដែលអង្គការអន្តរជាតិមួយចំនួនបានសម្តែងនូវប្រតិកម្មសុំឲ្យរដ្ឋាភិបាលដោះលែងអ្នកអតីតអ្នកកាសែតទាំងពីរដោយឥតលក្ខខណ្ឌ។
ជាការកត់សម្គាល់ ការសម្រេចដោះលែងអតីតអ្នកសារព័ត៌មានវិទ្យុអាស៊ីសេរីទាំងពីរឲ្យនៅក្រៅឃុំបណ្តោះអាសន្ន ត្រូវបានធ្វើឡើង តែមួយថ្ងៃប៉ុណ្ណោះ បន្ទាប់ពីការដោះលែងអ្នកស្រីទេព វន្នី។ អ្នកតាមដាននយោបាយកម្ពុជាមើលឃើញថា កាយវិការនេះជាការសម្រាលស្ថានការណ៍នយោបាយមួយ បន្ទាប់ពីមានការបោះឆ្នោត ដែលគណបក្សប្រជាជនកម្ពុជាឈ្នះដាច់១២៥អាសនៈរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ