ច្បាប់ស្តីពីការគ្រប់គ្រងគ្រោះមហន្តរាយ ដែលចាត់ទុកថាជាការប្រញាប់ ត្រូវបានយកមកពិភាក្សា
រដ្ឋសភាជាតិកម្ពុជានៅព្រឹកថ្ងៃព្រហស្បតិ៍នេះ បានបើកកិច្ចប្រជុំពេញអង្គរបស់ខ្លួន ដើម្បីពិភាក្សានិងអនុម័តទៅលើសេចក្តីព្រាងច្បាប់ស្តីពី ការគ្រប់គ្រងគ្រោះមហន្តរាយ ជាលើកដំបូងនៅកម្ពុជា។ សេចក្តីព្រាងច្បាប់ដែលចាត់ទុកជាការប្រញាប់នេះ បានបង្ហាញពីវិធានការការពារ និងវិធីសាស្ត្រនៃការបង្ការ និងគ្រប់គ្រងគ្រោះមហន្តរាយនៅកម្ពុជា ខណៈដែលប្រទេសនេះ កំពុងរងផលប៉ះពាល់ដោយភាពរាំងស្ងួត និងខ្យល់កន្ត្រាក់នៅដើមរដូវវស្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
សេចក្តីព្រាងច្បាប់ស្តីពីការគ្រប់គ្រងគ្រោះមហន្តរាយ ដែលរួមមាន១០ជំពូកនិង៤២មាត្រា ត្រូវបានរដ្ឋសភាលើកយកមកពិភាក្សា នៅក្នុងកិច្ចប្រជុំពេញអង្គនាថ្ងៃព្រហស្បតិ៍ទី៤មិថុនានេះ បន្ទាប់ពីទីស្តីការគណៈរដ្ឋមន្ត្រីបានអនុម័តរួចរាល់ កាលពីថ្ងៃទី៩ខែមករាឆ្នាំ២០១៥។ សេចក្តីព្រាងច្បាប់នេះ ត្រូវបានចាត់ទុកថា ជាការប្រញាប់ ដោយសារតែ បច្ចុប្បន្ននេះ ប្រទេសកម្ពុជា កំពុងរងផលប៉ះពាល់ពីបម្រែបម្រួលអាកាសធាតុ ដោយសាតែការកើនឡើងនៃកំដៅនៃពិភពលោក ឥទ្ធិពលខ្យល់កន្ត្រាក់ និងភាពរាំងស្ងួតនៅដើមរដូវវស្សាជាដើម។
តំណាងរាស្ត្របក្សប្រឆាំង ទាំងលោក យឹម សុវណ្ណ និងលោក សុន ឆៃ ដែលធ្លាប់តែរិះគន់ទៅលើសេចក្តីព្រាងច្បាប់ដែលព្រាងដោយរដ្ឋាភិបាលកន្លងទៅនោះ បានឯកភាពទាំងស្រុង ទៅលើភាពបន្ទាន់នៃសេចក្តីព្រាងច្បាប់នេះ។ ប៉ុន្តែទន្ទឹមគ្នានេះ លោក យឹម សុវណ្ណ តំណាងរាស្ត្រគណបក្សសង្គ្រោះជាតិបានអំពាវនាវឱ្យរដ្ឋាភិបាល បញ្ឈប់សកម្មភាពចាក់ដីលុបបឹងបួរ ព្រែក រឺសកម្មភាពបូមខ្សាច់ រួមទាំងការកាប់ដើមឈើជាដើម ពីព្រោះថា សកម្មភាពនេះហើយ ដែលធ្វើឱ្យមានទឹកជំនន់និងការកើនឡើងកំដៅនៅកម្ពុជា។ ចំណែកឯលោក សុន ឆៃ តំណាងរាស្ត្រគណបក្សប្រឆាំងប្រចាំមណ្ឌលភ្នំពេញក៍បានរិះគន់ទៅលើការលុបបឹងកក់កណ្តាលទីក្រុងភ្នំពេញ ថែមទាំងបានជម្រុញឱ្យមានការដាំដើមឈើនៅតំបន់ដែលបាត់បង់ឡើងវិញផងដែរ។
លោក ញឹម វណ្ណដា អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយដែលបានឡើងការពារសេចក្តីព្រាងច្បាប់នេះ បានឯកភាពចំពោះសេចក្តីអំពាវនាវរបស់លោក យឹម សុវណ្ណ។ លោក ញឹម វណ្ណដា បានបង្ហាញពីការខ្វះខាតធនធានមនុស្សដែលមានជំនាញ និងកង្វះមធ្យោបាយសម្រាប់បង្កានិងគ្រប់គ្រងគ្រោះមហន្តរាយនេះ។
ច្បាប់ស្តីពីការគ្រប់គ្រងគ្រោះមហន្តរាយ បានចែងពីយន្តការគ្រប់គ្រងគ្រោះមហន្តរាយ ការដឹកនាំគ្រប់គ្រង និងកិច្ចសហប្រតិបត្តិការនានា សំដៅកាត់បន្ថយ និងបង្កាគ្រោះមហន្តរាយ ដែលបង្ករឡើងដោយមនុស្សនិងធម្មជាតិ។ ច្បាប់នេះ ក៍មានចែងពីការដាក់ទោសទណ្ឌទៅលើសកម្មភាពរបស់មនុស្សដែលរារាំងកិច្ចប្រតិបត្តិការសង្គ្រោះបន្ទាន់ រឺសកម្មភាពដែលបង្កឱ្យមានគ្រោះមហន្តរាយនេះផងដែរ។
ការពិភាក្សានិងអនុម័តលើសេចក្តីព្រាងច្បាប់នេះ បានធ្វើឡើង ជួនចំពេលដែលប្រទេសកម្ពុជានឹងប្រារព្ធទិវាបរិស្ថានជាតិនិងបរិស្ថានពិភពលោកនៅថ្ងៃទី៥មិថុនាស្អែកនេះ។
សេចក្តីព្រាងច្បាប់ស្តីពីការគ្រប់គ្រងគ្រោះមហន្តរាយនេះ ទើបតែបានពិភាក្សានិងអនុម័តបាន២ជំពូកប៉ុណ្ណោះ ក្នុងចំណោម១០ជំពូកនិង៤២មាត្រា។ កិច្ចប្រជុំរដ្ឋសភា នឹងបន្តធ្វើនៅថ្ងៃចន្ទដើមសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ