អង្គការសមាគមធាងត្នោតរកឃើញថា បឹងនៅភ្នំពេញ ជិតត្រូវបានបាត់បង់ទាំងស្រុង
អង្គការសមាគមធាងត្នោត បានចេញផ្សាយរបាយការណ៍មួយ នៅថ្ងៃព្រហស្បតិ៍ទី២៦ធ្នូនេះ ស្ដីពីតួលេខបឹងនិងតំបន់ដីសើមក្នុងរាជធានីភ្នំពេញ។ របាយការណ៍ក្រោមចំណងជើង «បឹងចុងក្រោយក្នុងរាជធានីភ្នំពេញ» រកឃើញថា បឹងនិងតំបន់ដីសើមក្នុងរាជធានីភ្នំពេញ ជិតត្រូវបានបាត់បង់ទាំងស្រុង។ ការបាត់បង់នេះ បើតាមរបាយការណ៍ គឺបាននិងបន្តជំរុញឲ្យមានការបណ្ដេញចេញពីលំនៅដ្ឋាន ការបាត់បង់ជីវភាពរបស់ប្រជាពលរដ្ឋ ការកើនឡើងនូវកម្រិតទឹកជំនន់ ការបំពុលបរិស្ថាន និងការបាត់បង់ជីវចម្រុះជាដើម។
ចុះផ្សាយនៅថ្ងៃ៖
ស្តាប់ - ០២:៣៣
នៅក្នុងចំណោមបឹងចំនួន២៦ដែលមាននៅក្នុងរាជធានីភ្នំពេញតាំងពីឆ្នាំ១៩៩០ គឺគ្មានបឹងមួយណាដែលមិនរងផលប៉ះពាល់ដោយសារការចាក់ដីលុបនោះទេ។ ក្នុងនោះ បឹងចំនួន១៦ត្រូវបានចាក់ដីលុបទាំងស្រុង រលាយបាត់បង់រូបរាងពីភូមិសាស្ត្ររាជធានីភ្នំពេញ ខណៈបឹងចំនួន៨ទៀតត្រូវគេចាក់លុបមួយផ្នែក។ បើតាមរបាយការណ៍របស់អង្គការសមាគមធាងត្នោត មានបឹងតែពីរប៉ុណ្ណោះដែលរងការប៉ះពាល់តិចជាងគេ គឺបឹងសំរោង និងបឹងតាមោកដែលទំហំបឹងទាំងពីរនេះ នៅសល់ជាង៥០ភាគរយ។ មូលហេតុចម្បងនៃការចាក់ដីលុបបឹងទាំងនោះ គឺដោយសារតម្រូវការផ្នែកអចលនវត្ថុ របស់គម្រោងសាងសង់បុរី តំបន់លំនៅឋាន និងទីក្រុងរណប។
មិនខុសគ្នាពីបឹងទាំងនោះទេ នៅភ្នំពេញ តំបន់វាលទំនាបដែលមានដក់ទឹកឬហៅដោយខ្លីថាតំបន់ដីសើម ក៏បានបាត់បង់យ៉ាងគំហុកផងដែរ ក្នុងអត្រាប៉ាន់ស្មាន៤០ភាគរយ ឬស្មើនឹងប្រមាណ៤១គីឡូម៉ែត្រការ៉េ។ របាយការណ៍កត់សម្គាល់ថា នៅក្នុងរយៈពេល១៦ឆ្នាំចុងក្រោយ ពោលគឺពីឆ្នាំ២០០៣ ដល់ឆ្នាំ២០១៩ តំបន់ដីសើមសំខាន់ៗ ដូចជានៅជ្រោយចង្វារខាងជើង ជ្រោយចង្វារខាងត្បូង និងតំបន់បឹងរាជសីហ៍ ត្រូវបានគេយកទៅធ្វើជាទីក្រុងរណប ខណៈតំបន់ច្បារអំពៅបានប្រែក្លាយខ្លួនទៅជាតំបន់លំនៅដ្ឋាន។ តំបន់ដីសើមផ្សេងៗទៀត ត្រូវគេយកទៅធ្វើជាទីលានវាយកូនហ្គោល និងសាងសង់ផ្សារជាដើម។
របាយការណ៍បានសង្កត់ធ្ងន់ថា ការលុបបឹងនិងតំបន់ដីសើម បានផ្ដល់ផលប៉ះពាល់ផ្នែកសង្គមនិងបរិស្ថានច្រើន។ ក្នុងនោះ វាបាននិងបន្តជំរុញឲ្យមានការបណ្ដេញចេញពីលំនៅដ្ឋាន ការបាត់បង់ជីវភាពរបស់ប្រជាពលរដ្ឋ ការកើនឡើងនូវកម្រិតទឹកជំនន់ ការបំពុលបរិស្ថាន និងការបាត់បង់ជីវចម្រុះជាដើម។
ខណៈពេលដែលបឹងនិងតំបន់ដីសើមនៅភ្នំពេញនៅមានសេសសល់តិចតួច អង្គការសមាគមធាងត្នោត បានស្នើឲ្យរដ្ឋាភិបាលអភិរក្សតំបន់ទាំងនោះ ក្រោមច្បាប់ពិសេសដែលមានការការពារតឹងរ៉ឹងចំពោះការអភិវឌ្ឍ និងការធ្វើឲ្យខូចខាតណាមួយ។ ចង់ឲ្យមានការបង្កើតច្បាប់ពិសេសដើម្បីការពារបឹងនិងតំបន់ដីសើម ព្រោះអង្គការសមាគមធាងត្នោតយល់ឃើញថា ការគ្រប់គ្រងតាមច្បាប់ភូមិបាលនៅមិនទាន់គ្រប់គ្រាន់នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ