ECCCពន្លឿនបើកសវនាការលើសំណុំរឿង 002/02 ប្រជែងនឹងវ័យចាស់ជរារបស់ជនជាប់ចោទ
អង្គជំនុំជម្រះវិសាមញ្ញក្នុងតុលាការកម្ពុជា ដែលជាទូទៅគេស្គាល់ថា តុលាការខ្មែរក្រហម នឹងបន្តបើកសវនាការកាត់ទោសលើអតីតមេដឹកនាំខ្មែរក្រហមក្នុងសំណុំរឿង ០០២/០២ នៅថ្ងៃចន្ទទី២៧កក្កដាសប្តាហ៍ក្រោយនេះ។ សវនាការនឹងផ្តោតទៅលើការសួរដេញដោលសាក្សីចំនួន១១រូប ជុំវិញការដ្ឋានសាងសង់ទំនប់ត្រពាំងថ្ម ស្ថិតនៅភាគពាយ័ព្យនៃប្រទេសកម្ពុជា ដែលកាលណោះមនុស្សចាប់ពី១ម៉ឺន៥ពាន់នាក់ ទៅ២ម៉ឺននាក់ ត្រូវបានគេបង្ខំឲ្យធ្វើការជាទម្ងន់ នៅក្នុងការដ្ឋាននេះ។
ចុះផ្សាយនៅថ្ងៃ៖
ស្តាប់ - ០២:២៨
សវនាការលើសំណុំរឿង002/02 ដើម្បីស្តាប់សក្ខីកម្មលើការដ្ឋានទំនប់ត្រពាំងថ្មនេះ គ្រោងធ្វើឡើង ក្រោយពីតុលាការខ្មែរក្រហម បានបញ្ចប់ការស្តាប់សក្ខីកម្មលើការដ្ឋានសាងសង់ទំនប់១មករា នៅខេត្តកំពង់ធំ និងការដ្ឋានការងារសាងសង់ព្រលានយន្តហោះនៅខេត្តកំពង់ឆ្នាំង។
នេះបើតាមការបញ្ជាក់ពីលោក នេត្រ ភត្រា អ្នកនាំពាក្យសាលាក្តីខ្មែរក្រហម។ លោកភត្រា បានថ្លែងនៅក្នុងសន្និសីទកាសែតនៅថ្ងៃនេះថា គម្រោងសវនាការលើសំណុំរឿង 002/02នេះ នឹងចាប់ផ្តើមពីថ្ងៃចន្ទទី២៧កក្កដា ដោយប្រើរយៈពេល៤សប្តាហ៍។ ក្នុងរយៈពេល៤សប្តាហ៍នេះ ចៅក្រមសាលាដំបូងនៃសាលាក្តីខ្មែរក្រហម នឹងកោះហៅសាក្សីចំនួន១១រូប ដើម្បីសួរដេញដោលជុំវិញការដ្ឋានសាងសង់ទំនប់ត្រពាំងថ្ម ស្ថិតនៅភាគពាយ័ព្យនៃប្រទេសកម្ពុជា។
ការដ្ឋានទំនប់ត្រពាំងថ្ម ដែលមានកំពស់៣ទៅ៥ម៉ែត្រ និងមានបណ្តោយ១០គីឡូម៉ែត្រនេះ ត្រូវបានសាងសង់ឡើងដោយបក្សកុម្មុនីស្តកម្ពុជាក្នុងសម័យខ្មែរក្រហម ចន្លោះពីឆ្នាំ១៩៧៦ដល់ឆ្នាំ១៩៧៧ នៅក្នុងផែនការសម្រេចគោលដៅសេដ្ឋកិច្ចរបស់បក្សកុម្មុនីសកម្ពុជា ដោយឲ្យអ្នកធ្វើការបូជាអ្វីៗទាំងអស់ ដើម្បីផលិតស្រូវឲ្យបានជាអតិបរមា។ មានមនុស្សយ៉ាងតិច ពី១៥០០០នាក់ទៅ២ម៉ឺននាក់ ត្រូវបានគេកេណ្ឌពីតំបន់ផ្សេងៗគ្នា ដើម្បីឲ្យមកធ្វើការងារក្នុងការដ្ឋានសាងសង់ទំនប់នេះ។
គួរកត់សម្គាល់ថា សវនាការនៅថ្ងៃចន្ទសប្តាហ៍ក្រោយនេះ ក៏នឹងមានវត្តមានរបស់ជនជាប់ចោទ នួន ជា និងខៀវ សំផនផងដែរ។ ក៏ប៉ុន្តែ នួន ជា ដែលមានវ័យ៨៨ឆ្នាំហើយនោះ តែងតែបោះបង់សិទ្ធិចូលរួមសវនាការដោយផ្ទាល់ នៅពាក់កណ្តាលទីដោយសារតែឈឺចង្កេះ។ ចំណែកឯជនជាប់ចោទ ខៀវ សំផន ដែលមានវ័យ៨៤ឆ្នាំហើយដែរនោះ តែងតែរក្សាសិទ្ធិក្នុងការចូលរួមស្តាប់សក្ខីកម្មដោយផ្ទាល់។ លោក នេត្រ ភត្រា បានកត់សម្គាល់ថា បញ្ហាចាស់ជរារបស់ជនជាប់ចោទទាំងពីររូបនេះ គឺជាក្តីព្រួយបារម្ភរបស់តុលាការ។ អញ្ចឹងហើយ បានជាតុលាការបានពន្លឿនសវនាការរបស់ខ្លួន។ បើតាមអ្នកនាំពាក្យរូបនេះ សវនាការលើអង្គហេតុក្នុងសំណុំរឿង002/02នេះ អាចនឹងបញ្ចប់នៅត្រឹមពាក់កណ្តាលឆ្នាំ២០១៦ ហើយសាលក្រមមួយនឹងត្រូវសម្រេចឡើង នៅអំឡុងពាក់កណ្តាលឆ្នាំ២០១៧ខាងមុខ។
សូមបញ្ជាក់ជូនថា បច្ចុប្បន្នអតីតមេដឹកនាំខ្មែរក្រហម នួន ជា និង ខៀវ សំផន ត្រូវបានតុលាការខ្មែរក្រហមកាត់ទោសឲ្យជាប់ពន្ធនាគារអស់មួយជីវិតរួចមកហើយ កាលពីខែសីហាឆ្នាំ២០១៤ នៅក្នុងសំណុំរឿង002/01 ហើយសំណុំរឿងនេះ កំពុងស្ថិតនៅក្នុងដំណាក់កាលប្តឹងជំទាស់នៅតុលាការកំពូលនៃសាលាក្តីខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ