សហចៅក្រមស៊ើបអង្កេតអន្តរជាតិ បង្ហាញអត្តសញ្ញាណជនសង្ស័យថ្មី ក្នុងសំណុំរឿង០០៤
សហចៅក្រមស៊ើបអង្កេតអន្តរជាតិនៃសាលាក្តីខ្មែរក្រហមលោក ម៉ាក ហាម៉ុន (Mark B. Harmon) កាលពីល្ងាចថ្ងៃទី២៧មីនាម្សិលម៉ិញ បានសម្រេចដាក់ជនត្រូវចោទឈ្មោះ អោ អាន ឲ្យស្ថិតនៅក្រោមការពិនិត្យពីបទឧក្រិដ្ឋកម្មនៅក្នុងសំណុំរឿង០០៤។ លោក អោ អាន គឺជាជនត្រូវចោទទី៣ ដែលត្រូវបានសហចៅក្រមស៊ើបអង្កេតអន្តរជាតិនៃសាលាក្តីខ្មែរក្រហមបានចោទប្រកាន់ នៅក្នុងសំណុំរឿង០០៣ និង០០៤ ដោយគ្មានការចូលរួមពីភាគីជាតិ។
ចុះផ្សាយនៅថ្ងៃ៖
ស្តាប់ - ០២:៤៥
សហចៅក្រមស៊ើបអង្កេតអន្តរជាតិនៃសាលាក្តីខ្មែរក្រហម លោក ម៉ាក ហាម៉ុន (Mark B. Harmon) បានសម្រេចកាលពីល្ងាចថ្ងៃទី២៧មិនា ដាក់ជនត្រូវចោទលោក អោ អាន ឲ្យស្ថិតក្រោមការពិនិត្យពីបទឧក្រិដ្ឋដែលបានចោទប្រកាន់ក្នុងនោះរួមមាន៖ អំពើមនុស្សឃាតដោយចេតនា ជាការរំលោភបំពានក្រមព្រហ្មទណ្ឌកម្ពុជាឆ្នាំ ១៩៥៦ ដែលត្រូវបានចោទប្រកាន់ថា បានប្រព្រឹត្តឡើងនៅទីកន្លែងសម្លាប់មនុស្សគោកព្រីង មន្ទីរសន្តិសុខ ទួលបេង និងមន្ទីរសន្តិសុខវត្តអូរត្រកួន, ឧក្រិដ្ឋកម្មប្រឆាំងមនុស្សជាតិដែលក្នុងនោះមាន ការធ្វើមនុស្សឃាត ការសម្លាប់រង្គាល ការធ្វើទុក្ខបុកម្នេញដោយមូលហេតុនយោបាយ និងសាសនា ការដាក់ក្នុងមន្ទីរឃុំឃាំង និងអំពើអមនុស្សធម៌ផ្សេងទៀត (ដូចជា ស្ថានភាពអមនុស្សធម៌នៃការឃុំឃាំង) នៅទីកន្លែងសម្លាប់មនុស្សគោកព្រីង និងមន្ទីរសន្តិសុខទួលបេង ព្រមទាំងឧក្រិដ្ឋកម្មប្រឆាំងមនុស្សជាតិ ដែលក្នុងនោះមាន ការធ្វើមនុស្សឃាត ការសម្លាប់រង្គាល ការធ្វើទុក្ខបុកម្នេញដោយមូលហេតុនយោបាយ និងសាសនា ការដាក់ក្នុងមន្ទីរឃុំឃាំង និងអំពើអមនុស្សធម៌ផ្សេងទៀត (ដូចជា ស្ថានភាពអមនុស្សធម៌នៃការឃុំឃាំង) នៅមន្ទីរសន្តិសុខវត្តអូរត្រកួនជាដើម។
លោក អោ អាន រឺតាអាន បច្ចុប្បន្នមានអាយុ៨១ឆ្នាំកំពុងរស់នៅក្នុងខេត្តបាត់ដំបង គឺជាអតីតអនុប្រធានតំបន់មជ្ឈិម នៅខេត្តកំពង់ចាម ដែលមានជនរងគ្រោះជាង១៥ម៉ឺននាក់ត្រូវបានសម្លាប់និងស្លាប់ ក្នុងរបបខ្មែរក្រហម។ លោកគឺជាជនត្រូវចោទទី៣ ដែលត្រូវបានសហចៅក្រមស៊ើបអង្កេតអន្តរជាតិលោក ម៉ាក ហាម៉ុន (Mark B. Harmon)សម្រេចចោទប្រកាន់ បន្ទាប់ពីលោកស្រី អ៊ឹម ចែម អតីតចៅហ្វាយស្រុកព្រះនេត្រព្រះ ក្នុងខេត្តបន្ទាយមានជ័យ និងជាប្រធានគុកភ្នំត្រយោង ត្រូវបានចោទប្រកាន់នៅក្នុងសំណុំរឿង០០៤ និង លោក មាស មុត អាយុ ៧៤ឆ្នាំ ជាអតីតមេបញ្ជាការជើងទឹកកងពល១៦៤ នៅខេត្តព្រះសីហនុ និងខេត្តកំពត ដែលត្រូវបានចោទប្រកាន់នៅក្នុងសំណុំរឿង០០៣។
បើតាមការបញ្ជាក់ពីលោក នេត្រ ភត្រា អ្នកនាំពាក្យសាលាក្តីខ្មែរក្រហម បច្ចុប្បន្នជនសង្ស័យទាំងបីរូប មិនទាន់ត្រូវបានចាប់ខ្លួននោះទេ ខណៈការចោទប្រកាន់ទាំងនេះ ត្រូវបានជំទាស់ដោយសហចៅក្រមស៊ើបអង្កេតជាតិ លោក យូ ប៊ុនឡេង។ ជាជំហ៊ររបស់សហចៅក្រមស៊ើបអង្កេតជាតិលោក យូ ប៊ុនឡេង ការសម្រេចដាក់ជនសង្ស័យលោក អោ អាន ឲ្យស្ថិតនៅក្រោមការពិនិត្យរបស់តុលាការមិនទាន់ចាំបាច់នោះទេនៅក្នុងដំណើរការស៊ើបអង្កេតនេះ ព្រោះការស៊ើបអង្កេតកន្លងមក មានវិមតិសង្ស័យជាច្រើនទាក់ទងនឹងយុត្តាធិការបុគ្គល។
យ៉ាងណាក៍ដោយ ជាការកត់សម្គាល់ ក្នុងសំណុំរឿង០០៣ និងសំណុំរឿង០០៤ ត្រូវបានគេរាយការណ៍ថា មានអតីតមេខ្មែរក្រហមថ្នាក់តំបន់ និងភូមិភាគ សរុប ៥ នាក់។ ហើយរហូតដល់ថ្ងៃទី២៧មីនានេះ សហចៅក្រមស៊ើបអង្កេតអន្តរជាតិ បានបញ្ចេញឈ្មោះជនជាប់ចោទ ៣ រូបហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ