អ្នកនាំពាក្យសាលាក្តី៖ សំណុំរឿង០០៤ មិនមានការជ្រៀតជ្រែកពីរដ្ឋាភិបាលទេ
កាលពីថ្ងៃទី ៩ ខែ ធ្នូ ម្សិលមិញនេះ សហចៅក្រមស៊ើបអង្កេតអន្តរជាតិ បានដាក់លោក យឹម ទិត្យ ឲ្យស្ថិតក្រោមការត្រួតពិនិត្យពីបទឧក្រិដ្ឋប្រល័យពូជសាសន៍ និងបទឧក្រិដ្ឋកម្មមួយចំនួនទៀត។ លោក យឹម ទិត្យ គឺជាមន្ត្រីខ្មែរក្រហមទី៣ ដែលត្រូវបានដាក់ឱ្យស្ថិតក្រោមការត្រួតពិនិត្យរបស់សាលាក្តី នៅក្នុងសំណុំរឿង ០០៤ ដែលរដ្ឋាភិបាលមិនចង់អោយមាន។
ចុះផ្សាយនៅថ្ងៃ៖
ស្តាប់ - ០១:៤៥
ស្ថិតក្នុងវ័យជាង ៨០ឆ្នាំ និងមានបញ្ហាភ្នែកផងនោះ លោក យឹម ទិត្យ គឺជាជនសង្ស័យចុងក្រោយរបស់សាលាក្តីខ្មែរក្រហម ដែលត្រូវដាក់ឲ្យស្ថិតក្រោមការត្រួតពិនិត្យពីបទឧក្រិដ្ឋប្រល័យពូជសាសន៍ និងបទឧក្រិដ្ឋមួយចំនួនទៀត ដោយសហចៅក្រមស៊ើបអន្តរជាតិតែឯកឯង។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានឲ្យដឹងនៅថ្ងៃនេះថា សាលាក្តីខ្មែរក្រហម បានដំណើរការនីតិវិធីរបស់ខ្លួន ក្នុងសំណុំរឿង ០០៤ ដោយមិនមានការជ្រៀតជ្រែកពីរដ្ឋាភិបាលនោះទេ បើទោះបីជាមានការខ្វែងគំនិតគ្នារវាងសហចៅក្រមស៊ើបជាតិ និង សហចៅក្រមស៊ើបអន្តរជាតិក៏ដោយ។ លោកនេត្រ ភក្រ្តាថា ការខ្វែងយោបល់គ្នានេះ បង្ហាញអោយឃើញពីឯករាជ្យភាពរបស់តុលាការ និងការយល់ឃើញផ្សេងៗគ្នារបស់ចៅក្រមចំពោះកិច្ចការរបស់ខ្លួន។
អ្នកនាំពាក្យរូបនេះ បន្តថា នៅក្នុងដំណាក់កាលនេះ សាលាក្តីខ្មែរក្រហមកំពុងធ្វើការស៊ើបអង្កេតជនសង្ស័យនៅក្នុងសំណុំរឿងនេះនៅឡើយ។ បន្ទាប់ពីបញ្ចប់ការស៊ើបអង្កេត នៅចុងឆ្នាំ២០១៦ ទើបសាលាក្តីខ្មែរក្រហម នឹងចេញសេចក្តីសម្រេចចុងក្រោយ ថាចោទប្រកាន់ ឬលើកលែងការចោទប្រកាន់ ចំពោះជនសង្ស័យទាំងនោះ។ លោកភក្ត្រាបន្តទៀតថា សំណុំរឿង ០០៣ និងសំណុំរឿង ០០៤ គឺជាសំណុំរឿងដែលនៅសេសសល់ចុងក្រោយរបស់សាលាក្តីខ្មែរក្រហម។ សាលាក្តីនេះ និងមិនចោទប្រកាន់ ឬបង្កើតសំណុំបន្តបន្ទាប់ទៀតនោះទេ។
សូមរំលឹកថា នៅក្នុងសំណុំរឿង០០១ មានទណ្ឌិត កាំង ហ្គេចអៀវ ហៅឌុច សំណុំរឿង ០០២ មាន ជនត្រូវចោទ លោក ខៀវ សំផន និងលោក នួន ជា សំណុំរឿង ០០៣ មានជនសង្ស័យ លោក មាស មុត និងសំណុំរឿង ០០៤ មានជនសង្ស័យ លោក អោ អាន អ្នកស្រី អ៊ឹម ចែម និង លោក យឹម ទិត្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ