អាដហុក ត្រៀមមេធាវីជួយការពារដល់នារីម្នាក់ដែលគេចោទថា ជាស្រីកំណាន់របស់លោកកឹម សុខា
សមាគមការពារសិទ្ធិមនុស្សអាដហុដ បានបញ្ជាក់ឲ្យដឹងថា ខ្លួនបានត្រៀមមេធាវីម្នាក់រួចរាល់ហើយ ដើម្បីជួយការពារកញ្ញាឃុំ ច័ន្ទតារាទី ហៅ ស្រីមុំហើយមេធាវីនោះ ក៏នឹងអមដំណើរជាមួយនាងចូលទៅបំភ្លឺនៅក្រសួងមហាផ្ទៃនៅស្អែកនេះផងដែរ។ ការផ្តល់មេធាវីនេះ បន្ទាប់ពីកញ្ញាឃុំ ច័ន្ទតារាទី ហៅ ស្រីមុំដែលរងការចោទប្រកាន់ថា ជាស្រីកំណាន់របស់លោកកឹម សុខា ប្រធានស្តីទីគណបក្សសង្រ្គោះជាតិបានមកសុំអន្តោរាគមន៍ដោយផ្ទាល់ដល់ទីស្នាក់ការសមាគមអាដហុកនៅក្នុងទីក្រុងភ្នំពេញកាលពីរសៀលម្សិលមិញ។
ចុះផ្សាយនៅថ្ងៃ៖
ស្តាប់ - ០២:១៤
លោក នី សុខា ប្រធានផ្នែកស៊ើបអង្កេតសិទ្ធិមនុស្សរបស់សមាគមអាដហុក បានបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃទី១០ មីនា ថាមេធាវីម្នាក់របស់សមាគមនឹងអមដំណើរជាមួយកញ្ញាឃុំ ច័ន្ទតារាទី ហៅ ស្រីមុំដើម្បីចូលទៅបំភ្លឺនៅក្រសួងមហាផ្ទៃទៅតាមការអញ្ជើញនៅព្រឹកថ្ងៃសុក្រ ទី១១ មីនា ឆ្នាំ២០១៦។ ការអញ្ជើញនេះ គឺដើម្បីឲ្យនាងទៅបំភ្លឺលើករណីបរិហារកេរ្តិ៍ ដោយប្តឹងឡើងដោយកញ្ញា ធី សុវណ្ណថា ។
សូមជម្រាបជូនថា នាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃក្រសួងមហាផ្ទៃ បានធ្វើលិខិតអញ្ជើញកញ្ញាឃុំ ច័ន្ទតារាទី ហៅ ស្រីមុំឲ្យចូលទៅបំភ្លឺចំនួនពីរដង គឺលើកទីមួយនៅថ្ងៃទី៧ មីនា។ ក៏ប៉ុន្តែកាលណោះកញ្ញាស្រីមុំមិនបានចូលទៅបំភ្លឺតាមការអញ្ជើញនោះទេ។ ដូច្នេះហើយ ទើបនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃក្រសួងមហាផ្ទៃ បានផ្ញើលិខិតអញ្ជើញជាលើកទីពីរឲ្យចូលមកបំភ្លឺនៅព្រឹកថ្ងៃទី១១ មីនា ឆ្នាំ២០១៦។ គឺការអញ្ជើញទាំងពីរលើកនោះហើយ បានធ្វើឲ្យកញ្ញាស្រីមុំ មានការព្រួយបារម្ភហើយឡើងមកសុំអន្តរាគមន៍ពីសមាគមអាដហុកដោយផ្ទាល់តែម្តង។
ក្រៅពីសុំអន្តរាគមន៍ពីអាដហុក កញ្ញាស្រីមុំ បានធ្វើសន្និសីទសារព័ត៌មានដោយបានបដិសេដថា កញ្ញាមិនមែនជាស្រីកំណាន់របស់លោកកឹម សុខា ដូចការចោទប្រកាន់នៅលើបណ្តាញសង្គមហ្វេសប៊ុកនោះទេ។ ជាការចោទប្រកាន់ បន្ទាប់ពីមានការលេចធ្លាយខ្សែអាត់សំឡេងសារសងស្នេហាជាច្រើនវគ្គ ដែលគេសង្ស័យថា ជាសំឡេងរបស់លោកកឹម សុខា និង កញ្ញាស្រី មុំ។ ទោះជាយ៉ាងណា កញ្ញាស្រីមុំ បានបញ្ជាក់ថា មុនរឿងរ៉ាវទាំងនេះ បានកើតឡើង គឺហ្វេសប៊ុករបស់នាងត្រូវបានគេលូចចូល(Hack)។ នារីវ័យក្មេងម្នាក់នេះ បានប្រាប់បណ្តាញសារព័ត៌មានដែរថា នៅពេលនេះនាងកំពុងតែព្រួយបារម្ភពីបញ្ហាសុវត្ថិភាពផ្ទាល់ខ្លួនហើយចាប់តាំងពីមានបញ្ហាទាំងនេះមក នាងមិនបានធ្វើការងារអ្វីទេដោយសារតែខ្មាសគេ។
ពាក់ព័ន្ធរឿងអាស្រូវស្នេហានេះដែរ លោកកឹម សុខា ដែលកំពុងកាន់តំណែងជាប្រធានស្តីទីគណបក្សប្រឆាំង មិនបានចាប់អារម្មណ៍ ហើយក៏មិនបកស្រាយអ្វីនោះទេ ដោយលោក និងគណបក្សទាំងមូលគិតតែយកចិត្តទុកដាក់អំពីការបោះឆ្នោតនាពេលខាងមុខតែប៉ុណ្ណោះ។ ម៉្យាងវិញទៀត បើតាមព័ត៌មាន នៅចុងសប្តាហ៍នេះ លោកកឹម សុខា នឹងចាកចេញពីប្រទេសកម្ពុជា ដើម្បីទៅជួបពិភាក្សាជាមួយលោកសម រង្ស៊ី ដែលជាប្រធានគណបក្សសង្រ្គោះជាតិអំពីស្ថានភាពនយោបាយនៅកម្ពុជានារយៈពេលចុងក្រោយនេះ។ យ៉ាងណាក៏ដោយ កាលបរិច្ឆេទ និងទីកន្លែងនៃជំនួបនោះ មិនទាន់ត្រូវបានគេបង្ហាញឲ្យដឹងនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ