ស្រីមុំនឹងចូលបំភ្លឺតុលាការនៅថ្ងៃស្អែក!
កញ្ញា ខុម ចាន់ដារ៉ាទី ហៅស្រីមុំ នឹងចូលទៅឆ្លើយបំភ្លឺនៅសាលាដំបូង រាជធានីភ្នំពេញ នៅព្រឹកស្អែកនេះ។ ស្រីមុំ ដែលត្រូវគេគិតថាមានជាប់ទាក់ទិននឹងខ្សែអាត់សំឡេងស្នេហាជាមួយ នឹងលោក កឹម សុខា។ កាលពីថ្ងៃទី១៨ខែមីនាកន្លងទៅ ព្រះរាជ្ញអាជ្ញា បានចោទប្រកាន់រូបនាង ចំនួន២បទល្មើសគឺ«ករណីផ្តល់សកី្ខកម្មក្លែង» និងមាន«អំពើពេស្យាចារ»។ ដោយសារតែគ្មានមេធាវីការពារក្តី នាងបានបដិសេធសុំមិនចូលឆ្លើយបំភ្លឺកាលពីថ្ងៃទី៧មីនា។ ទើបតែពេលនេះ ដែល ស្រីមុំ បានសុំពឹងពាក់មេធាវីរបស់សមាគមអាដហុក ទើបនាងសម្រេចចិត្តទៅឆ្លើយចំពោះមុខតុលាការ នៅថ្ងៃអង្គារស្អែក វេលាម៉ោង៨ព្រឹក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១១
ប្រធានផ្នែកស៊ើបអង្កេតសិទ្ធិមនុស្សរបស់សមាគមអាដហុក លោកនីសុខាបានប្រាប់វិទ្យុបារាំង RFI ថា កញ្ញាខុមចាន់ដារ៉ាទី ឬហៅ ស្រីមុំ បានពឹងពាក់សុំមេធាវីរបស់សមាគមអាដហុក ជាផ្លូវការហើយ ដើម្បីជួយការពារក្តីរបស់នាង។ លោកបញ្ជាក់ថា កាលពីពេលមុនដែលបណ្តាញព័ត៌មានខ្លះផ្សាយថា មេធាវីរបស់សមាគមអាដហុក សុំដកខ្លួននោះ គឺជាការណ៍មិនត្រឹមត្រូវទេ។ គឺគ្រាន់តែពុំមានការសុំពឹកពាក់ជាផ្លូវការរបស់សាមីខ្លួនតែប៉ុណ្ណោះ។
ក្នុងនាមជាអ្នកច្បាប់ផង លោក នី សុខា បានលើកឡើងថា ករណីទាំងពីរដែលតុលាការចោទប្រកាន់រូបស្រីមុំ នោះ គឺគ្មានមូលដ្ឋានច្បាប់ និងពុំសមហេតុផលទាល់តែសោះ។ មន្ត្រីសង្គមស៊ីវិលរូបនេះ ពន្យល់ថា ករណីបទល្មើស« ផ្តល់សកី្ខកម្មក្លែង» គឺសម្រាប់តែចោទប្រកាន់លើ«សាក្សី» ដែលភូតភរ និយាយកុហក ក្នុងការផ្តល់សក្តីកម្មរបស់ខ្លួនតែប៉ុណ្ណោះ។ តែករណីស្រីមុំ គឺនាងជាជនជាប់សង្ស័យ។ នាងមានសិទ្ធិពេញទីក្នុងការដោះបន្តុក។
ម្យ៉ាងវិញទៀត ករណី«អំពើពេស្យាចារ» លោក នី សុខា បន្តពន្យល់តាមច្បាប់ថា នេះមិនមែនជាការជួញដូរភេទនោះទេ! ហើយបើទោះបីជាំនាងមានស្នេហាលួចលាក់ជាមួយបុរសណាម្នាក់ពិតមែនក៏ដោយ ក៏ជាស្នេហាឬទំនាក់ទំនងភេទបែបឯកជនតែប៉ុណ្ណោះ។ គឺពុំមែនជាការរកស៊ីលក់ភេទនោះឡើយ ហើយបើទោះបីជាមានរកស៊ីផ្លូវភេទដោយស្មគ្រចិត្តមួយនិងមួយ ក៏ពុំខុសនឹងរដ្ឋធម្មនុញ្ញខ្មែរនោះដែរ។ តាមអ្នកច្បាប់របស់អង្គការអាដហុករូបនេះ បទចោទទាំងពីររបស់តុលាការ គឺមិនសមហេតុបន្តិចសោះ។
ទោះជាយ៉ាងណាក្តី បើករណីស្នេហាដែលគេគិតថា ស្រីមុំ មានទំនាក់ទំនងជាមួយលោក កឹម សុខា នោះ គឺជារឿងពិតមែន គួរណាស់តែយកច្បាប់ឯកពន្ធភាព មកចាត់ការ ទើបត្រឹមត្រូវជាង។ ហើយយោងតាមច្បាប់ឯកពន្ធភាពនោះទៀតសោត ការពិតរបស់ច្បាប់ គឺភរិយារបស់លោក កឹម សុខា ទៅវិញទេ ដែលជាអ្នកត្រូវតាំងខ្លួនជាដើមបណ្តឹង។ នេះបើតាមការពន្យល់ផ្នែកច្បាប់របស់ ប្រធានផ្នែកស៊ើបអង្កេតសិទ្ធិមនុស្ស នៃសមាគមអាដហុក។
ជុំវិញករណីបទល្មើសទាំងពីរនេះ ព្រះរាជអាជ្ញារងនៃសាលាដំបូងក្រុងភ្នំពេញ លោក សៀង សុខ បានបដិសេធពុំបកស្រាយអ្វីទាំងអស់ ដោយសំអាងហេតុថា ប៉ះពាល់ដល់ដំណើរការស៊ើបអង្កេត និងជាពាក់ព័ន្ធនឹងការស្រាវជ្រាវរកអង្គហេតុពិត។
សូមរម្លឹកថា ជុំវិញការបែកធ្លាយខ្សែអាត់សំឡេងឆ្លងឆ្លើយស្នេហារបស់បុរសម្នាក់ជាមួយនឹងនារីៗនោះ អាជ្ញាធរនៃក្រសួងមហាផ្ទៃ បានកោះហៅ កញ្ញាខុមចាន់ដារ៉ាទី ហៅ ស្រីមុំ ឲ្យចូលឆ្លើយបំភ្លឺ នៅនាយកដ្ឋានប្រឆាំងភេរវកម្មនិងឧក្រិដ្ឋកម្មឆ្លងដែន កាលពីខែមីនា។ តាមរបាយកាណ៍សមត្ថកិច្ចដែលផ្នែកលើចម្លើយរបស់ស្រីមុំនាពេលនោះហើយ ទើបនាងត្រូវតុលាការចោទប្រកាន់ និងត្រូវកោះហៅឲ្យចូលបំភ្លឺសាលាដំបូងភ្នំពេញ។
ចំណែកក្រុមសង្គមស៊ីវិលប្រមាណជា២០អង្គការដែលធ្វើការលើកស្ទួយសិទ្ធិស្ត្រីនៅកម្ពុជា បានសម្តែងការព្រួយបារម្ភយ៉ាងខ្លំាងចំពោះករណីនេះ ព្រមទាំងបានចេញសេចក្តីថ្លែងការណ៍រួមមួយផងដែរថាការកោះហៅរបស់តុលាការនិងការផ្សាយព័ត៌មានពីករណីរបស់ស្រីមុំ គឺជាការរំលោភសិទ្ធិមនុស្ស និងជាការប៉ះពាល់ដល់ជីវិតឯកជនរបស់ស្រីមុំយ៉ាងគំហុក។ តាមក្រុមអង្គការសង្គមស៊ីវិលទាំងនោះ សំណុំរឿងនេះ គឺជាការទាញយកផលប្រយោជន៍ផ្នែកនយោបាយរបស់គណបក្សនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ