លោកកឹម សុខា ហាក់ដូចរលាស់ខ្លួនចេញពីរឿងផែនទី ខណៈដែលលោក ហ៊ុន សែន ព្រលះលោក សមរង្ស៊ី
លោកនាយករដ្ឋមន្ត្រីហ៊ុន សែន កាលពីល្ងាចថ្ងៃអង្គារបានព្រលះមេបក្សប្រឆាំងដោយមិនចំមុខចំពោះរឿងបញ្ហាផែនទីដ៏ចម្រូងចម្រាស់។ ចំពោះប្រតិកម្មពីលោកនាយករដ្ឋមន្ត្រីនេះ លោក កឹម សុខា ប្រធានស្តីទីគណបក្សបានអះអាងថាខ្លួនមិនដែលប៉ះពាល់រឿងផែនទីនេះតាំងពីដើម។ សម្រាប់លោក យុទ្ធនាការបោះឆ្នោតជារឿងសំខាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
«វាមិនមែនជាជំហររបស់គណបក្សនោះទេ ខ្ញុំមិនដែលអត្ថាធិប្បាយនោះទេ»។ នេះគឺជាការបញ្ជាក់ពីលោក កឹម សុខា ប្រធានស្តីទីគណបក្សសង្គ្រោះជាតិនៅព្រឹកថ្ងៃពុធ ទី៩ កញ្ញានេះ បន្ទាប់ពីលោកបានមកដល់ប្រទេសកម្ពុជាវិញ។ ថ្លែងទៅកាន់អ្នកសារព័ត៌មាននៅអាកាសយាន្តដ្ឋានអន្តរជាតិភ្នំពេញ លោកកឹម សុខា បន្ថែមថាលោកមិនចាប់អារម្មណ៍ចំពោះបញ្ហាផ្សេងក្រៅពីយុទ្ធនាឃោសនាបោះឆ្នោតដែលនឹងត្រូវធ្វើឡើងនៅក្នុងការបោះឆ្នោតនាពេលខាងមុខនោះទេ។ សម្រាប់លោក សិទ្ធសេរីភាពនៃការបញ្ចេញមតិនៅកម្ពុជាគឺជាប្រធានបទសំខាន់។
ប្រធានស្តីទីគណបក្សរូបនេះ បានគូសបញ្ជាក់ថា មតិរឿងផែនទីកន្លងមកគឺមិនមែនជាជំហររបស់គណបក្សនោះទេ។ ការលើកឡើងរបស់លោកកឹម សុខាយ៉ាងដូចនេះ គឺបន្ទាប់ពីលោកនាយករដ្ឋមន្ត្រីហ៊ុន សែន បាននិយាយរិះគន់គណបក្សប្រឆាំងខ្លាំងៗតាមរយៈកញ្ចក់ទូរទស្សន៍ជាតិកាលពីល្ងាចថ្ងៃអង្គារម្សិលមិញ។ លោកនាយករដ្ឋមន្ត្រីបានព្រលះលោក សម រង្ស៊ី ដែលជាដៃគូសន្ទនានយោបាយរបស់លោកស្តីពីរឿងបញ្ហាផែនទី និងការបោះបង្គោលព្រំដែនជាមួយនឹងប្រទេសវៀតណាម រួមទាំងសន្ធិសញ្ញានានាដែលរដ្ឋាភិបាលបានធ្វើជាមួយនឹងវៀតណាម។
លោកនាយករដ្ឋមន្ត្រីបានលើកឡើងថា មេដឹកនាំបក្សប្រឆាំងមិនស្គាល់ច្បាស់ពីផែនទី ប៉ុន្តែបានឃោសនាក្នុងចេតនាញុះញង់ប្រជាពលរដ្ឋឱ្យស្អប់រដ្ឋាភិបាលរបស់លោក។ លោកហ៊ុន សែនបានព្រមានដល់ការចាប់ខ្លួនចំពោះបុគ្គលរូបណាដែលនិយាយពីបញ្ហាផែនទីក្លែងក្លាយជាបន្តទៀត។
សម្រាប់លោកនាយករដ្ឋមន្ត្រី ភាពមិនប្រក្រតីនៃផែនទីរបស់រដ្ឋាភិបាលគឺ បានបញ្ចប់ហើយបន្ទាប់ពីការផ្ទៀងផ្ទាត់ចំនួនពីរលើកជាមួយនឹងផែនទីពីប្រទេសបារាំង និងផែនទីពីអង្គការសហប្រជាជាតិ។
លោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានបញ្ជាក់បន្ថែមថា លោកកឹម សុខា មិនមែនចង់រលាស់ខ្លួនឱ្យចេញពីបញ្ហាព្រំដែននោះទេ ប៉ុន្តែគោលការណ៍របស់គណបក្សសង្គ្រោះជាតិគឺចង់កសាងរដ្ឋទំនើបដូចនេះគណបក្សត្រូវគិតគូរពីបញ្ហាផ្សេងៗសម្រាប់ការអភិវឌ្ឍ។
អ្នកនាំពាក្យរូបនេះ បានបន្ថែមថា ការអំពាវនាវរបស់លោកកឹម សុខា ទៅដល់សមាជិកថ្នាក់ក្រោមជាតិរបស់ខ្លួនឱ្យគិតពីបញ្ហាក្រៅពីរឿងផែនទីនោះ គឺចង់សមាជិកគណបក្សទាំងអស់ មិនត្រូវដើរតាមក្រឡាដែលគណបក្សកាន់អំណាចគូសឱ្យនិយាយតែពីបញ្ហាផែនទីនោះទេ។ ពោលគឺមិនត្រូវបង្វែស្ថានការណ៍ប្រទេសឱ្យគិតតែពីបញ្ហាផែនទីដែលលោកនាយករដ្ឋមន្ត្រី ហ៊ុន សែន និងលោក សម រង្ស៊ី កំពុងតែមើលមុខគ្នាមិនចំនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ