ក្រុមសង្គមស៊ីវិលជាង ៦០ ទាមទារឲ្យស៊ើបអង្កេត ដោយមានជំនួយពីអន្តរជាតិករណីឃាតកម្មលោក កែម ឡី
បន្ទាប់ពីតុលាការក្រុងភ្នំពេញប្រកាសសាលក្រមផ្តន្ទាទោស អឿត អាង ហៅជួប សម្លាប់ ដាក់ពន្ធនាគារអស់មួយជីវិត ក្រុមអង្គការសង្គមស៊ីវិលចំនួន ៦៥ នៅថ្ងៃព្រហស្បតិ៍នេះដែរ បានទាមទារឲ្យ មានការស៊ើបអង្កេតឯករាជ្យឡើងវិញជុំវិញឃាតកម្មលើលោកកែម ឡី។ ក្រុមអង្គការសង្គមស៊ីវិលបានលើកឡើងថាការស៊ើបអង្កេត និងសវនាការនិងការផ្តល់សក្ខីកម្ម ជុំវិញការសម្លាប់លោក កែម ឡី នៅមានការសង្ស័យជាច្រើន ដែលពួកគេមិនអាចទទួលយកបាន។
ចុះផ្សាយនៅថ្ងៃ៖
ស្តាប់ - ០២:១៥
កង្វះតម្លាភាពក្នុងការស៊ើបអង្កេតលើការស្លាប់របស់លោកបណ្ឌិត កែម ឡី នីតិវិធីជំនុំជម្រះខ្លីពេក និងការខកខានក្នុងការស៊ើបអង្កេតឲ្យបានពេញលេញជុំវិញមូលហេតុ អ្នកសមគំនិត និងស្ថានភាពនៃការចាប់ខ្លួន អឿត អាង បញ្ហាទាំងអស់នេះ បង្កជាក្តីបារម្ភជាខ្លាំងអំពីភាពពេញលេញនៃដំណើរការព្រហ្មទណ្ឌលើករណីមួយនេះ។ នេះបើតាមការលើកឡើងរបស់ក្រុមសង្គមស៊ីវិល។
នៅក្នុងសេចក្តីថ្លែងការណ៍របស់ពួកគេ ក្រុមសង្គមស៊ីវិលបានអំពាវនាវឲ្យបង្កើតគណៈកម្មការស៊ើបអង្កេតឯករាជ្យមួយ ក្នុងការស៊ើបអង្កេតពីស្ថានភាពទាំងមូលនៃឃាតកម្មនេះ ដើម្បីឲ្យស្របតាមការអនុវត្តល្អបំផុតជាអន្តរជាតិ។ នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បានលើកឡើងថា កង្វះខាតឯករាជ្យនៃការស៊ើបអង្កេតបង្កើតបានជាវប្បធម៌និទណ្ឌភាព ដែលចេះតែកើតមាននៅក្នុងប្រព័ន្ធយុត្តិធម៌កម្ពុជា។ ដូចជាមិនមែនជារឿងគួរឲ្យភ្ញាក់ផ្អើលទេ ដែលករណីបែបនេះនឹងធ្វើឲ្យមានការបាត់បង់ទំនុកចិត្តជាបន្តទៀតលើស្ថាប័ននានានោះ។
ជាមួយគ្នានេះ លោកស្រី ណាលី ពីឡូក នាយិការងអង្គការលីកាដូ ក៏បានកត់សម្គាល់ដែរថា ការស៊ើបអង្កេតនេះ នៅមិនទាន់គ្រប់គ្រាន់នៅឡើយ ហើយសវនាការជំនុំជម្រះនេះ គឺគ្រាន់តែជាការបង្គ្រប់កិច្ច។ លោកស្រីទាមទារឲ្យមានការស៊ើបអង្កេតឯករាជ្យ ដោយមានជំនួយពីអន្តរជាតិ លើករណីលោក កែម ឡី ដែលនេះជាមធ្យោបាយតែមួយគត់ ក្នុងការស្វែងរកឲ្យបាននូវយុត្តិធម៌ដល់គ្រួសារ និងមិត្តភ័ក្តិរបស់ជនរងគ្រោះ។
សូមរំលឹកថា អឿត អាង ហៅជួប សម្លាប់ ត្រូវបានចាប់ខ្លួនកាលពីថ្ងៃទី ១០ខែកក្កដា ឆ្នាំទៅ បន្ទាប់ពីមានការអះអាងថាបានបាញ់សម្លាប់លោកកែម ឡី អ្នកវិភាគនយោបាយដ៏ល្បី នៅក្នុងហាងកាហ្វេស្ថានីយ៍ប្រេងឥន្ធនៈកាល់តិចបូកគោ។ សំណុំរឿងឃាតកម្មនេះ ត្រូវបានបិទការស៊ើបអង្កេតកាលពីខែធ្នូឆ្នាំ ២០១៦ ដោយមានជនសង្ស័យតែម្នាក់គត់ឈ្មោះអឿត អាងនេះ។ នៅថ្ងៃទី ១ខែមីនា តុលាការក្រុងភ្នំពេញបានបើកសវនាការជំនុំជម្រះ លើករណីនេះ ដោយចោទប្រកាន់ ជួប សម្លាប់ ពីបទមនុស្សឃាតគិតទុកជាមុនលើលោកកែម ឡី និងបទកាន់អាវុធខុសច្បាប់តាមមាត្រា ២០០និងមាត្រា ៤៩០ នៃក្រមព្រហ្មទណ្ឌកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ