អ្នកចូលរួមបុណ្យខួបគម្រប់១០០ថ្ងៃ ដង្ហោយរកយុត្តិធម៌ជូនលោកបណ្ឌិតកែម ឡី
ថ្ងៃសៅរ៍នេះ គឺជាថ្ងៃទី២នៃពិធីបុណ្យខួបគម្រប់១០០ថ្ងៃរបស់លោកបណ្ឌិត កែម ឡី អ្នកស្រាវជ្រាវដើម្បីការអភិវឌ្ឍសង្គម។ ពិធីបុណ្យនៅថ្ងៃនេះ ប្រព្រឹត្តដោយមានវត្តមានប្រជាពលរដ្ឋចូលរួមកុះករជាងថ្ងៃម្សិលមិញ។ ក្រៅពីប្រជាពលរដ្ឋ ក៏មានផងដែរការអញ្ជើញចូលរួមរបស់តំណាងរាស្ត្រនៃគណបក្សសង្គ្រោះជាតិ និងលោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្សនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:០៥
បើទោះបីជាគ្មានវត្តមានភរិយានិងកូនលោក កែម ឡី តែពេញមួយថ្ងៃសៅរ៍ ទី១៥តុលានេះ ប្រជាពលរដ្ឋខ្មែរមកពីគ្រប់ទិសទី បានអញ្ជើញមកប្រមូលផ្ដុំគ្នានៅវត្តពោធិយារាម ហៅវត្តចាស់ នៅក្នុងសង្កាត់ជ្រោយចង្វារ រាជធានីភ្នំពេញ ដើម្បីចូលរួមពិធីបុណ្យខួបគម្រប់១០០ថ្ងៃ របស់លោកបណ្ឌិត កែម ឡី។ ជាពិធីបែបសាសនា ដែលរួមមានទាំងពិធីរាប់បាត្រព្រះសង្ឃផងដែរនៅពេលព្រឹក។ គួររំលឹកថា លោកកែម ឡី អ្នកស្រាវជ្រាវការអភិវឌ្ឍសង្គម និងជាវាគ្មិនដ៏មានថ្វីមាត់ ត្រូវបានខ្មាន់កាំភ្លើងឈាមត្រជាក់ បាញ់សម្លាប់នៅកណ្ដាលក្រុងភ្នំពេញ កាលពីថ្ងៃទី១០ខែកក្កដាកន្លងទៅ។
ជាការកត់សម្គាល់ ក្រៅពីប្រជាពលរដ្ឋ តំណាងរាស្ត្រគណបក្សសង្គ្រោះជាតិ និងលោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជា ក៏បានអញ្ជើញទៅចូលរួមពិធីសាសនានេះផងដែរ។ តាមរយៈលោកស្រី រ៉ូណា ស្មីត ប្រជាពលរដ្ឋដែលមានវត្តមាននៅក្នុងពិធីបុណ្យ បានដង្ហោយឲ្យលោកស្រីធ្វើយ៉ាងណាជួយស្វែងរកយុត្តិធម៌ជូនវិញ្ញាណក្ខន្ធលោកបណ្ឌិត កែម ឡី។ យុត្តិធម៌សម្រាប់លោក កែម ឡី ដែលរហូតមកទល់ពេលនេះ នៅតែងងឹតឈឹងគ្មានពន្លឺ បើទោះបីជាតុលាការបានដំណើរការសួរចម្លើយខ្មាន់កាំភ្លើង ជួប សម្លាប់ ជាបន្តបន្ទាប់ហើយក៏ដោយ។
ការទៅចូលរួមពិធីបុណ្យខួបគម្រប់១០០ថ្ងៃរបស់លោកបណ្ឌិត កែម ឡី មិនមែនគ្រាន់តែដើម្បីធ្វើបុណ្យតាមពិធីបែបសាសនា ឧទ្ទិសកុសលជូនលោកប៉ុនណោះទេ អ្នកចូលរួមក៏បានរំឭកឡើងវិញអំពីស្នាដៃ និង សកម្មភាពដែលលោកកែម ឡី លះបង់ដើម្បីសង្គមជាតិកម្ពុជាផងដែរ។ រូបថតរាប់រយសន្លឹក ត្រូវបានដាក់បង្ហាញ ធ្វើឲ្យអ្នកចូលរួមពិធីបុណ្យនឹកស្រណោះដល់សម្ដី កាយវិការ និងស្នាមញញឹមដ៏ស្រស់របស់អ្នកវិភាគសម្ដីត្រង់ លោក កែម ឡី។ ចំណែកក្រុមនិស្សិតដែលធ្លាប់ទទួលបានការបណ្ដុះបណ្ដាលពីលោក កែម ឡី ក៏បាននាំយកសៀវភៅពីរចំណងជើង គឺ សៀវភៅ «កែម ឡីអ្នករូតវាំងននសង្គម» និងសៀវភៅ «កម្រងទស្សនសង្គមនិងនយោបាយ» មកចែកជូនដល់អ្នកចូលរួមពិធីបុណ្យផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ