គម្រោងវិសោធនកម្មលើមាតា្រមួយចំនួននៃច្បាប់ការងារ មិនទទួលបានការស្វាគមន៍ពីសមាគមរោងចក្រកាត់ដេរនៅកម្ពុជា និងសហជីពកម្មករ !
ក្រសួងការងារ និងបណ្ដុះបណ្ដាលវិជ្ជាជីវៈនៅថ្ងៃម្សិលមិញបានប្រកាសថា ក្រសួងកំពុងតែពិចារណាទៅលើការធ្វើវិសោធនកម្មមាត្រាមួយចំនួនទៅលើច្បាប់ការងារដោយកំណត់ប្រាក់ឈ្នួលកម្មករត្រូវបើកក្នុងរយៈពេល ២សបា្តហ៍ម្តងដើម្បីជាប្រយោជន៍របស់កម្មករ-និយោជិក និងរក្សានូវអត្ថប្រយោជន៍ដល់ពួកគាត់ ក្នុងករណីដែលថៅកែរត់ចោលដោយមិនទទួលខុសត្រូវដល់កម្មករ។ ប៉ុន្តែគម្រោងវិសោធនកម្មលើមាតា្រមួយចំនួននៃច្បាប់ការងារនេះ មិនទទួលបានការស្វាគមន៍ពីសមាគមរោងចក្រកាត់ដេរនៅកម្ពុជា និងសហជីពកម្មករនោះទេ ។
ចុះផ្សាយនៅថ្ងៃ៖
ស្តាប់ - ០២:១៩
លោក កាំង ម៉ូនីកា អ្នកនាំពាក្យ និង ជាអគ្គលេខាធិការរង របស់សមាគមរោងចក្រកាត់ដេរនៅកម្ពុជា (GMAC) លើកឡើងថា ការធ្វើវិសោធនកម្មច្បាប់ការងារនេះ ធ្វើឱ្យប៉ះពាល់ធ្ងន់ធ្ងរដល់បរិយាកាសនៃការវិនិយោគនៅកម្ពុជា ដែលអាចជាហេតុធ្វើឱ្យមានការថមថយការវិនិយោគក៏អាចបាន។ ហើយបញ្ហានេះមិនត្រឹមតែប៉ះពាល់ដល់វិស័យកាត់ដេរ និងសែ្បកជើងនោះទេ តែវិស័យផ្សេងទៀតក៏មានបញ្ហាដែរ ។ លោកបន្តថា ការបើកប្រាក់ឈ្នួល ២ដងក្នុងខែនេះវាបន្ទុកធ្ងន់ធ្ងរសម្រាប់រោងចក្រដែលមានបុគ្គលិករាប់ម៉ឺននាក់ ខណៈដែលរោងចក្រភាគច្រើននៅកម្ពុជា មិនមានប្រើប្រាស់ប្រព័ន្ធធនាគារដើម្បីធ្វើការបើកប្រាក់ខែនោះទេ ។ ហើយនេះវាជាបន្ទុកធ្ងន់ធ្ងរមួយទៀត ចំពោះការងាររដ្ឋបាល ។ លោក កាំង មូនីកា បញ្ជាក់ ។
កាលពីថ្ងៃពុធម្សិលមិញ លោករដ្ឋមន្រ្តី អ៊ិត សំហេង មានប្រសាសន៍ថា បច្ចុប្បន្ននេះ លោកសង្កេតឃើញថា មានបញ្ហាប្រឈមមួយ គឺថៅកែរោងចក្រមួយចំនួនតែងតែរត់ចោលកម្មករ ដោយសំអាងលើហេតុផលដំណើរការអាជីវកម្មមិនជោគជ័យ ឬមិនអាចធានារ៉ាប់រងបាននឹងប្រាក់ឈ្នួលមានការកើនឡើង។ ដូច្នេះក្រសួងការងារ នឹងធ្វើវិសោធនកម្មច្បាប់ ដើម្បីធ្វើយ៉ាងណាឲ្យការទូទាត់អត្ថប្រយោជន៍ និងអតីតភាពការងាររបស់កម្មករត្រូវបានទទួល មុនពេលដែលរោងចក្របិទ ឬថៅកែរត់ចោល។
ដោយឡែក លោក ប៉ាវ ស៊ីណា ប្រធានសហព័ន្ធសហជីពចលនាកម្មករ និយាយថា ជាការពិតថា អ្វីដែលក្រសួងការងារបានលើកឡើងខាងលើ វាជាផ្នែកមួយដែរនៃការជួយការពារទៅដល់កម្មករ។ ប៉ុន្តែ ក៏មានកម្មករភាគច្រើន មិនពេញចិត្តចំពោះការបើកប្រាក់ ២ដងក្នុងមួយខែនេះដែរ។ មួយវិញទៀត លោកប៉ាវ ស៊ីណា បញ្ជាក់ថា លោកមិនជំទាស់នៅអ្វីដែលជាគោលការណ៍របស់រដ្ឋនោះទេ ប៉ុន្តែលោកយល់ថាក្រសួងការងារគួរកោះហៅសហជីពទាំងអស់ ដើម្បីមកប្រជុំផ្សព្វផ្សាយ ប្រាប់ពីគោលបំណងដែលក្រសួងចង់ធ្វើវិសោធនកម្មទៅលើមាត្រាណាមួយ ដើម្បីឱ្យសហជីពយកព័ត៌មានទៅប្រាប់ដល់សមាជិក និង ថ្នាក់ដឹកនាំសហជីពនៅតាមមូលដ្ឋានរបស់គាត់ ថាតើគាំទ្រ ឬមិនគាំទ្រ ។ ហើយនេះចំនុចសំខាន់ ដើម្បីកុំឱ្យប៉ះពាល់នៅពេលដែលច្បាប់អនុវត្តហើយ។
សូមបញ្ជាក់ថាកម្មករ និយោជិត នៅក្នុងវិស័យកាត់ដេរ និង ដេរស្បែកជើង នៅកម្ពុជា តែងតែបើកប្រាក់ឈ្មួល រវាងពីថ្ងៃ ៥ ដល់ថ្ងៃទី ១០នៃខែបន្ទាប់ ពោលគឺការបើកប្រាក់ខែ ដែលខែចាស់ឆ្លងចូលខែថ្មី គឺខុសពីការបើកប្រាក់បៀវត្សរបស់មន្រ្តីរាជការ ដែលធ្វើឡើងរៀងរាល់ចុងខែ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ