ក្រុមហ៊ុនជប៉ុន អារ៉ាខាវ៉ា វិនិយោគទឹកប្រាក់៧០លានដុល្លារ សង់លំនៅឋាន បែបខុនដូ សម្រាប់លក់ ក្នុងតម្លៃសមរម្យដល់ប្រជាជនកម្ពុជា
ក្រុមហ៊ុនអារ៉ាខាវ៉ា (Arakawa) បានសម្រេច បោះទុនវិនិយោគទឹកប្រាក់ជាង ៧០ លានដុល្លារអាមេរិក សាងសង់លំនៅឋាន បែបខុនដូ ដែលមានតម្លៃសមរម្យ សម្រាប់ប្រជាជនកម្ពុជា។ គម្រោងលំនៅឋានតំលៃសមរម្យ សម្រាប់អ្នកដែលមានជីវភាពមធ្យម ដែលត្រូវបានសម្ពោធបើកការដ្ឋានសាងសង់ជាផ្លូវការនៅថ្ងៃទី ៨ វិច្ឆិកានេះ មានទីតាំងស្ថិតនៅភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ លើផ្ទៃដីទំហំជាង ១ម៉ឺន៣ពាន់៦៨០ម៉ែត្រក្រឡា។
ចុះផ្សាយនៅថ្ងៃ៖
ស្តាប់ - ០១:៣៧
គម្រោងអគារខុនដូនេះត្រូវបានដាក់ឈ្មោះថា លំនៅឋានអារ៉ាខាវ៉ា (Arakawa Residence)។ លំនៅឋានអារ៉ាខាវ៉ា បែងចែកជា២ដំណាក់កាលធំៗ ដោយក្នុងនោះដំណាក់កាលទី១ មាន១០ អគារ ដែលមានប្រមាណជា២០០០បន្ទប់ ដែលគ្រោងនឹងបញ្ចប់ក្នុងរយៈពេល២ ទៅ៣ឆ្នាំខាងមុខ។ ដោយក្នុងមួយបន្ទប់ មានតម្លៃចន្លោះពីជាង២ម៉ឺន ទៅ៣ម៉ឺនដុល្លារប៉ុណ្ណោះ។ នេះបើតាមការបញ្ជាក់របស់លោកអាឡិច យ៉ាស៊ូម៉ូតូ សហស្ថាបនិកនៃក្រុមហ៊ុនអារ៉ាខាវ៉ា ដែលជាក្រុមហ៊ុនអចលនទ្រព្យដ៏ធំរបស់ជប៉ុន វិនិយោគនៅកម្ពុជា។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលមានវត្តមាននាឱកាសនោះដែរបានថ្លែងថា គម្រោងអាគារខុនដូនេះ គឺធ្វើឡើងក្នុងគោលបំណងបំពេញនៅទឹកចិត្តរបស់ពលរដ្ឋ មន្រី្តរាជការ ដែលមានចំណូលមធ្យម អាចមានលទ្ធភាពទិញបាន ។
មិនត្រឹមតែប៉ុណ្ណោះ លោក ជា សុផារ៉ា បញ្ជាក់ថា ឱ្យតែគម្រោងដែលផ្តល់ផលប្រយោជន៍ និង ផ្តល់ក្តីសង្ឃឹមដល់ប្រជាពលរដ្ឋ គឺ ក្រសួងដែនដីនឹងខិតខំបំពេញបំណងប្រាថ្នារបស់ពួកគាត់។
គួរកត់សម្គាល់ផងដែរថា គម្រោងលំនៅឋានអារ៉ាខាវ៉ានេះ នឹងបើកលក់ក្នុងរយៈពេល៣ ទៅ៦ខែបន្ទាប់ពីការសម្ពោធបញ្ចុះបឋមសិលា បើកការដ្ឋានសាងសង់ ក្នុងគោលបំណងឲ្យគម្រោងនេះបានលេចចេញជារូបរាងមុននឹងធ្វើការដាក់លក់។ នេះបើតាមការអះអាងរបស់លោក អៀង សុធារ៉ា សហស្ថាបនិករបស់ក្រុមហ៊ុនអារ៉ាខាវ៉ា។
គួរជម្រាបជូនថា ក្រុមហ៊ុនអារ៉ាខាវ៉ា មានវត្តមាននៅកម្ពុជាតែពីឆ្នាំ២០០៨មកម្លេះ។ មិនតែប៉ុណ្ណោះ ក្រុមហ៊ុនអារ៉ាខាវ៉ានេះហើយ ដែលបានសហការជាក្រសួងដែនដីនគរូបនីយកម្ម និងសំណង់ ដែលបានវិនិយោគទុនដោះស្រាយអគារប៊ូឌីញស ដែលអាចមានហានិភ័យខ្ពស់ ជូនប្រជាជនដែលរស់នៅទីនោះ បានដោយជោគជ័យ ដែលជាគម្រោងគំរូមួយ ក្នុងការអភិវឌ្ឍន៍គួរកត់សម្គាល់មួយនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ