លោកកែវ រតនៈ៖ អគ្គិសនីកម្ពុជា ត្រៀមលុយ២លានដុល្លារដើម្បីដាក់កុងទ័រនិងតខ្សែដល់បន្ទប់ជួលជាង៣ម៉ឺនបន្ទប់
ចុះផ្សាយនៅថ្ងៃ៖
ស្តាប់ - ១៣:៣៦
ភ្ញៀវប្រចាំថ្ងៃរបស់វិទ្យុបារាំង នៅថ្ងៃពុធនេះ គឺលោកកែវ រតនៈ អគ្គនាយកអគ្គិសនីកម្ពុជា EDC និងលោកទី នរិន្ទ ប្រធានអាជ្ញាធរអគ្គិសនីកម្ពុជា។ លោកកែវ រតនៈ បានលើកឡើងថា អគ្គិសនីកម្ពុជា បានត្រៀមលុយប្រមាណ ២ លានដុល្លារ ដើម្បីដាក់កុងទ័រ និងតខ្សែ សម្រាប់បញ្ចុះតម្លៃអគ្គិសនី ដល់អ្នកជួលបន្ទប់ស្នាក់នៅជាង ៣ ម៉ឺនបន្ទប់ នៅភ្នំពេញ។ រហូតដល់ពេលនេះ EDC បានរៀបចំវិស្វករ អ្នកជំនាញត្រៀមធ្វើកិច្ចការនេះហើយ រង់ចាំតែឧបករណ៍សម្ភារៈមកដល់។ លោកអគ្គនាយក អះអាងថា នៅមុនចូលឆ្នាំខ្មែរ អ្នកជួលបន្ទប់ រាប់ទាំងកម្មកររោងចក្រកាត់ដេរ សិស្សនិស្សិត និងអ្នកជួលបន្ទប់ស្នាក់នៅជាទូទៅ នឹងអាចប្រើប្រាស់អគ្គិសនី ក្នុងតម្លៃត្រឹមតែ ៦១០ រៀល ក្នុងមួយគីឡូវ៉ាត់ម៉ោង។