លោករុន រ័ត្នវាសនា៖ការបង្ហាញទីតាំងត្រួតពិនិត្យជាតិស្រវឹង គឺដើម្បីរំលឹកពលរដ្ឋឲ្យប្រុងប្រយ័ត្នពីការផឹកស៊ី
ចុះផ្សាយនៅថ្ងៃ៖
ស្តាប់ - ១១:០៣
គិតត្រឹមថ្ងៃទី២៨ កុម្ភៈនេះ ការអនុវត្តច្បាប់ចរាចរណ៍ផ្លូវគោកថ្មីរបស់នគរបាលចរាចរណ៍ មានរយៈពេលជិតពីរខែហើយ។ ជិតពីរខែមកនេះ ការអនុវត្តមានភាពរលូនទៅមុខ បើទោះបីជាមានបញ្ហាប្រឈមខ្លះៗក្តី។ បើតាមរបាយការណ៍របស់នគរបាលចរាចរណ៍ផ្លូវគោក នៅក្នុងរយៈពេលនេះ នគរបាលបានបញ្ជូនអ្នកបើកបរក្រោមជាតិស្រវឹងកម្រិតខ្ពស់ប្រមាណជាង២០០នាក់ទៅកាន់តុលាការ ដើម្បីផាកពិន័យ និងដាក់ទោសទណ្ឌទៅតាមច្បាប់។ ថ្វីបើនគរបាលចរាចរណ៍រឹតបន្តឹងការចុះត្រួតពិនិត្យជាតិស្រវឹងជារៀងរាល់យប់នៃក្តី ក៏ប៉ុន្តែអ្វីដែលគួរឲ្យឆ្ងល់នោះ គឺថានគរបាលចរាចរណ៍តែងតែបង្ហើបប្រាប់ជាមុនពីទីតាំង និងពេលវេលានៃការចុះទៅត្រួតពិនិត្យជាតិស្រវឹង។ ឆ្លើយនឹងសំណួររបស់វណ្ណ សុគន្ធានៅក្នុងនាទីភ្ញៀវប្រចាំរបស់វិទ្យុបារាំងអន្តរជាតិនៅរាត្រីនេះ លោករុន រ័ត្នវាសនា ប្រធាននាយកដ្ឋាននគរបាលចរាចរណ៍ និង សណ្តាប់សាធារណៈនៃក្រសួងមហាផ្ទៃ បានបញ្ជាក់ថា ការបង្ហាញពីទីតាំងនៃការត្រួតពិនិត្យជាតិស្រវឹងនេះ គឺដើម្បីរំលឹកដល់ពលរដ្ឋឲ្យគិត និង ប្រុងប្រយ័ត្នពីការផឹកស៊ី។
