សិទ្ធិនារីអន្តរជាតិ៖ រដ្ឋាភិបាល និងសង្គមស៊ីវិលស្នើឲ្យលើកកម្ពស់តម្លៃស្រ្តី
កម្ពុជាបានរៀបចំទិវាសិទ្ធិនារីអន្តរជាតិ ៨មីនាលើកទី ១០៦។ ក្នុងនោះទាំងរដ្ឋាភិបាលនិងអង្គការសង្គមស៊ីវិលនានា បានរៀបចំទិវានេះឡើងដាច់ដោយឡែកពីគ្នា និងក្រោមប្រធានបទផ្សេងគ្នា ប៉ុន្តែស្ថិតនៅក្នុងអត្ថន័យតែមួយគឺចូលរួមលើកកម្ពស់តម្លៃស្រ្តី។
ចុះផ្សាយនៅថ្ងៃ៖
ស្តាប់ - ០២:៣៤
នៅក្នុងទិវាសិទ្ធិនារីអន្តរជាតិ ៨មីនាប្រមុខរដ្ឋាភិបាលលោក ហ៊ុន សែន បានអះអាងថា ស្រ្តីបានចូលរួមគ្រប់វិស័យនៅក្នុងសង្គមនាពេលបច្ចុប្បន្ន ដោយគ្មានការរើសអើង ហើយស្រ្តីត្រូវបានការពារតាមផ្លូវច្បាប់នៅកម្ពុជា។ ប្រមុខរដ្ឋាភិបាលបន្តអះអាងថា ស្រ្តីជាឆ្អឹងខ្នងនៃសង្គមជាតិដោយក្នុងនោះ ថ្លៃសេវាពលកម្មរបស់កម្មករជាស្រ្តីក្នុងវិស័យកាត់ដេរ មានចំណូលខ្ពស់ ជាងបណ្តាប្រទេសមួយចំនួន។
សម្រាប់លោកនាយករដ្ឋមន្ត្រី ហ៊ុន សែន ការចូលរួមរបស់ស្រ្តីគឺជាចំណែកមួយក្នុងការទប់ស្កាត់ជំលោះ ហើយសមភាពយេនឌ័រ បានចូលរួមចំណែក ក្នុងការអភិវឌ្ឍ ប្រទេសជាតិ។ ជាថ្មីទៀតប្រមុខរដ្ឋាភិបាលអំពាវនាវឲ្យរួមគ្នាទប់ស្កាត់អំពើហិង្សាលើស្រ្តី និងកុមារ ដោយចាប់ផ្តើមតាំងពីពួកគេ នៅកុមារភាព។ ហើយក្នុងនោះបុរសរួមគ្នាលើកកម្ពស់វប្បធម៌អហិង្សា ។ សូមបញ្ជាក់ថា ប្រសាសន៍ លោកនាយករដ្ឋមន្ត្រី ហ៊ុន សែន ធ្វើឡើងនៅក្នុងទិវាសិទ្ធិនារីអន្តរជាតិ ៨មីនា នាសាលមហោស្រពកោះពេជ្រ ក្រោមប្រធានបទ «ស្ត្រី ដើម្បីសុខសន្តិភាព និង វឌ្ឍនភាព»។
ដោយឡែកសម្រាប់អង្គការសង្គមស៊ីវិល បានរៀបចំទិវាសិទ្ធិនារីអន្តរជាតិ ៨មីនានេះឡើងក្រោមប្រធានបទ«ស្ត្រីចូលរួមក្នុងការសម្រេចចិត្ត»។ ក្នុងនោះមានការចូលរួមពីតំណាងស្រ្តីមកពីវិស័យកាត់ដេរ តំណាងក្រសួងកិច្ចការនារី តំណាងស្ត្រីមកពីសេវាកំសាន្តនានា ដែលពួកគេបានឡើងពីបញ្ហាប្រឈមនឹងការរើសអើងនានាដែលស្ត្រីកំពុងជួបប្រទះ។
ឆ្លៀតក្នុងឱកាសនេះ ទិវាសិទ្ធិនារីអន្តរជាតិ ៨មីនា លើកទី ១០៦នេះដែរ អ្នកស្រី ចក់ សុភាព ប្រធានមជ្ឈមណ្ឌលសិទ្ធិមនុស្សកម្ពុជា ស្នើឲ្យមានសកម្មភាពដ៏ក្លាហាន ដើម្បីធានាឲ្យមានសមភាពយេនឌ័រ និងបញ្ឈប់នូវអំពើហិង្សាដោយសារយេនឌ័រគ្រប់ទម្រង់ទាំងអស់។
អ្នកស្រី ចក់ សុភាព ក៏បានលើកសសើរនូវវីរៈភាពក្លាហានរបស់សកម្មជនជាស្ត្រី ដែលប្រឈមនឹងការដាក់ទោសទណ្ឌ ដោយសារតែការងាររបស់ខ្លួន ក្នុងការគាំទ្រសិទ្ធិរបស់អ្នកដទៃ រួមមានៈ អ្នកស្រី លឹម មុនី និងអ្នកស្រី ទេព វន្នី ដែលកំពុងជាប់ពន្ធនាគារ ។
បន្ថែមពីលើនេះទៀត អ្នកស្រី ចក់ សុភាព កត់សម្គាល់ថា ករណីរំលោភបំពានផ្លូវភេទ លើស្រ្តី និងនារីនៅតែបន្តកើតឡើង ដែលជារឿយៗជនដៃដល់ មិនត្រូវបានផ្តន្ទាទោសឡើយ។ ជាក់ស្ដែង មរណៈភាពរបស់អ្នកស្រី ប៉ែន សុគន្ធា នាពេលថ្មីៗនេះ ដែលបានទុកឲ្យគាត់រហូតលង់ទឹកស្លាប់ ក្នុងទន្លេនៅរាជធានីភ្នំពេញ ដែលបង្ហាញឲ្យឃើញពីការមិនអើពើដែលគួរឲ្យសោកស្តាយ ចំពោះសិទ្ធិរបស់ស្ត្រី ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ