កាសែតក្នុងតំបន់អាស៊ី និងអឺរ៉ុប ចាប់អារម្មណ៍ព្រមៗគ្នាជុំវិញការស្លាប់របស់ នួន ជា
ក្រៅពីកាសែតក្នុងស្រុក ការស្លាប់របស់ជនជាប់ចោទ នួន ជា កាលពីថ្ងៃអាទិត្យម្សិលមិញ ក៏ទទួលបានការចាប់អារម្មណ៍ព្រមៗគ្នាដែរពីសំណាក់កាសែតបរទេស ក្នុងនោះមានទាំងកាសែតនៅក្នុងតំបន់អាស៊ី អឺរ៉ុប និងកាសែតអាមេរិក។
ចុះផ្សាយនៅថ្ងៃ៖
ស្តាប់ - ០៣:៤១
ប្រព័ន្ធផ្សព្វផ្សាយដ៏ធំរបស់ប្រទេសសិង្ហបុរី Channel News Asia បានចាប់អារម្មណ៍ និងចុះផ្សាយទៅលើការស្លាប់របស់ជនជាប់ចោទ នួន ជា ដោយ Channel News Asia ឲ្យចំណងជើងអត្ថបទមួយថា «មេដឹកនាំមនោគមន៍វិជ្ជា របស់ខ្មែរក្រហមបានស្លាប់»។ នៅក្នុងអត្ថបទរបស់ Channel News Asia បាននិយាយរៀបរាប់រំលឹកឲ្យដឹងពីការសិក្សារបស់ លោក នួន ជា ក៏ដូចជារៀបរាប់រំលឹកពីតួនាទី និងតំណែងរបស់គាត់ ក្នុងសម័យកម្ពុជាប្រជាធិបតេយ្យ។
មិនខុសពី Channel News Asia ប៉ុន្មានទេ សារព័ត៌មានរបស់ប្រទេសថៃ Bangkok Post ក៏បាននិយាយអំពីការស្លាប់របស់ លោក នួន ជា ដូចគ្នាដែរ តាមរយៈអត្ថបទខ្លីមួយ ដែលមានចំណងជើងថា «នួន ជា អ្នកមនោគមន៍វិជ្ជាខ្មែរក្រហមបានស្លាប់ក្នុងអាយុ៩៣ឆ្នាំ»។ Bangkok Post ក៏បានសរសេរឲ្យដឹងដែរពី មុខងារ និងកិច្ចការរបស់ នួន ជា ក្នុងសម័យខ្មែរក្រហម ដោយ កាសែត បានលើកឡើងពីឈ្មោះរបស់ នួន ជា ថាជាដៃស្ដាំរបស់មេដឹកនាំ ប៉ុល ពត។
ចាកចេញពីសារព័ត៌មានក្នុងតំបន់អាស៊ី សារព័ត៌មានដ៏ធំមួយរបស់សហរដ្ឋអាមេរិក Washington Post ក៏លើកយកការចាប់អារម្មណ៍ទៅលើការស្លាប់របស់ លោក នួន ជា ដែរ។ Washington Post បានសរសេរអត្ថបទយ៉ាងវែងអន្លាយមួយក្នុងចំណងជើងថា«លោក នួន ជា មេដឹកនាំខ្មែរក្រហមដ៏ទុរយស បានស្លាប់ក្នុងអាយុ៩៣ឆ្នាំ»។ តាមរយៈការហៅលោក នួន ជា ថាជាមេដឹកនាំទុរយសបែបនេះ Washington Post បានបង្ហាញពីការដឹកនាំដ៏សាហាវឃោឃៅរបស់មេដឹកនាំ ប៉ុល ពត និង នួន ជា ក្នុងចន្លោះឆ្នាំ១៩៧០ ដល់ ១៩៧៥ ដែលធ្វើឲ្យប្រជាជនខ្មែរស្លាប់អស់ប្រមាណជា២លាននាក់។
ងាកមកសារព័ត៌មានតំបន់អ៊ឺរ៉ុបវិញ សារព័ត៌មានដ៏ធំជាងគេរបស់បារាំង គឺកាសែត Le Monde បានឡើងចំណងជើងថា«នួន ជា អតីតមេដឹកនាំខ្មែរក្រហម និងជាដៃស្តាំរបស់ប៉ុលពត បានស្លាប់»។ កាសែតសរសេរថា បងធំទី២ ជាអ្នកគ្រប់គ្រងម៉ាស៊ីនសម្លាប់មនុស្ស ដែលបានធ្វើឲ្យប្រទេសកម្ពុជាធ្លាក់ទៅក្នុងភាពភ័យរន្ធត់ នៅក្នុងរបបខ្មែរក្រហមចន្លោះឆ្នាំ១៩៧៥ ដល់១៩៧៩។ បុគ្គលដែលជា ដៃស្តាំរបស់ប៉ុល ពត ត្រូវបានផ្តន្ទាទោសដាក់ពន្ធនាគារអស់មួយជីវិតពីបទ“ ឧក្រិដ្ឋកម្មប្រឆាំងមនុស្សជាតិ” និង“ អំពើប្រល័យពូជសាសន៍” បានទទួលមរណភាពកាលពីថ្ងៃអាទិត្យទី ៤ ខែសីហា នៅទីក្រុងភ្នំពេញដែលជាកន្លែង ដែលគាត់ត្រូវបានឃុំខ្លួនតាំងពីឆ្នាំ ២០០៧។
ជាមួយគ្នានេះ សារព័ត៌មាន ហ្វ្រង់២៤ របស់បារាំងដែរ បានឲ្យដំណឹងពីការស្លាប់របស់លោក នួន ជា ដូចដែរសារព័ត៌មានឯទៀតៗដែរ ប៉ុន្តែ ហ្វ្រង់២៤ បែរជាចាប់អារម្មណ៍ច្រើនទៅលើដំណើរការនៃការកាត់ទោសសាលាក្ដីខ្មែរក្រហមទៅវិញ។ ដោយក្នុងអត្ថបទរបស់ខ្លួនដែលមានចំណងជើងថា «នួន ជា បងធំទី២ខ្មែរក្រហម បានស្លាប់» ហ្វ្រង់២៤ បានបង្ហាញឲ្យដឹងត្រួសៗពីការចាប់ផ្ដើមនៃការកាត់ទោសសាលាក្ដីខ្មែរក្រហម និងចំនួនទឹកប្រាក់ក្នុងការចំណាយក្នុងការកាត់ក្ដីនោះអស់ប្រមាណជា ៣០០លានដុល្លារ។
ឯសារព័ត៌មានដ៏ធំរបស់ប្រទេសអង់គ្លេស BBC បានឲ្យចំណងជើងថា «នួន ជា អតីតមេដឹកនាំរងនៃរបបខ្មែរក្រហមបានស្លាប់»។ BBC រៀបរាប់ការស្លាប់របស់លោក នួន ជា ឲ្យដឹងដូចគេឯងដែរ ក៏ប៉ុន្តែ BBC បានភ្ជាប់ជាមួយអត្ថបទខ្លីមួយថា លោក នួន ជា មិនព្រមទទួលយកការទទួលខុសត្រូវ ឬ មានវិប្បដិសារីអ្វីចំពោះឧក្រិដ្ឋកម្មដែលបានកើតឡើងក្នុងសម័យខ្មែរក្រហមនោះឡើយ ដោយ BBC បានលើករំលឹកបង្ហាញពីការនិយាយរបស់ លោក នួន ជា ប្រាប់ទៅលើអ្នកកាសែតកាលពីពេលកន្លងថា «បើយើងមិនសម្លាប់អ្នកក្បត់ផ្ទៃក្នុងបក្សយើងទេ យើងមិនអាចវាយបំបែកសត្រូវបានទេ ហើយវាក៏នឹងគ្មានប្រទេសកម្ពុជាសព្វថ្ងៃនេះដែរ»៕
អត្ថបទដោយ៖ ងួន វឌ្ឍនៈបណ្ឌិត
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ