ក្រសួងមហាផ្ទៃ ប្រកាសរឹតបន្តឹងការការពារសុវត្ថិភាពដល់វិនិយោគិន និងទេសចរបរទេស
រដ្ឋមន្ត្រីក្រសួងមហាផ្ទៃ លោកស ខេង បានប្រកាសនៅក្នុងកិច្ចប្រជុំ នៅទីស្តីការក្រសួង កាលពីរសៀលថ្ងៃទី ៤ឧសភា ឲ្យអាជ្ញាធរមានសមត្ថកិច្ចគ្រប់ផ្នែក ត្រូវតែអនុវត្តវិធានការការពារសុខសុវត្ថិភាព ដល់អ្នកវិនិយោគទុន និងភ្ញៀវទេសចរបរទេស ឲ្យកាន់តែប្រសើរឡើង។ ការប្រកាសនេះ ធ្វើឡើង បន្ទាប់ពីមានស្ថានការណ៍អាក្រក់មួយចំនួន ទាក់ទងនឹងបញ្ហាអសន្តិសុខ លើជនបរទេស ក្នុងខេត្តព្រះសីហនុ ក្នុងអំឡុងប៉ុន្មានខែដើមឆ្នាំ ២០១៥នេះ។
ចុះផ្សាយនៅថ្ងៃ៖
ស្តាប់ - ០១:៤២
នៅប៉ុន្មានខែ ដើមឆ្នាំ ២០១៥នេះ យើងបានលឺច្រើន ទាក់ទងទៅនឹង បញ្ហាអសន្តិសុខរបស់ជនបរទេស ក្នុងខេត្តព្រះសីហនុ រហូតធ្វើឲ្យរដ្ឋមន្ត្រីក្រសួងមហាផ្ទៃ សម្រេចឲ្យមានការផ្លាស់ប្តូរតំណែងស្នងការខេត្ត ដោយសារបញ្ហាទាំងនេះ។ បញ្ហាអសន្តិសុខ ចំពោះបណ្តាជនបរទេស ដែលរួមមានដូចជា ការឆក់កាបូប ការប្លន់ ការធ្វើទារុណកម្ម និងស្ថានការណ៍អសន្តិសុខផ្សេងទៀត។ លោករដ្ឋមន្ត្រីក្រសួងមហាផ្ទៃ ស ខេង ធ្លាប់បានលើកឡើងថា បញ្ហាអសន្តិសុខទាំងនេះ គឺកើតចេញដោយសារការមិនយកចិត្តទុកដាក់របស់អាជ្ញាធរខេត្តព្រះសីហនុ។
ស្របពេលនោះដែរ នៅពេលថ្មីៗនេះ ពោលគឺនៅថ្ងៃចន្ទ ទី៤ឧសភាតែម្តង លោកស ខេង បានថ្លែងប្រកាសឲ្យអាជ្ញាធរមានសមត្ថកិច្ច នៅតាមបណ្តាខេត្ត រាជធានី និងអ្នកពាក់ព័ន្ធ ត្រូវតែអនុវត្តវិធានការ ការពារសន្តិសុខ សុវត្ថិភាព ជូនវិនិយោគិន និងអ្នកទេសចរបរទេស តាមផែនការដែលរាជរដ្ឋាភិបាល និងក្រសួងមហាផ្ទៃ បានដាក់ចេញ។
លោកឧត្តមសេនីយឯក គៀត ច័ន្ទថារិទ្ធ អគ្គស្នងការរងនគរបាលជាតិ បានថ្លែងនៅក្នុងកិច្ចប្រជុំ ផ្សព្វផ្សាយផែនការការពារសន្តិសុខសុវត្ថិភាព ជូនវិនិយោគទុន និងអ្នកទេសបរទេសថា ផែនការដែលក្រសួង បានដាក់ចេញសម្រាប់ការការពារសុខសុវត្ថិភាព ទាំងនោះរួមមានដូចជា គ្រប់រាជធានី ខេត្ត ត្រូវខិតខំពង្រឹងវិធានការរក្សាសន្តិសុខ សណ្តាប់ធ្នាប់ និងសុវត្ថិភាពសង្គម នៅក្នុងភូមិសាស្ត្រទទួលខុសត្រូវរបស់ខ្លួនឲ្យបានជាប់ជាប្រចាំ។ ត្រូវក្តាប់ឲ្យជាប់នូវគោលនយោបាយទាក់ទាញអ្នកវិនិយោគទុនរបស់រាជរដ្ឋាភិបាល គោលនយោបាយទេសចរណ៍ជាតិ និងត្រូវយកចិត្តទុកផ្សព្វផ្សាយបន្តដើម្បីបំផុសចលនាចូលរួមជាមួយសមត្ថកិច្ច ក្នុងការការពារអ្នកវិនិយោគទុន និងភ្ញៀវទេសចរបរទេស។ និងត្រូវជំរុញការអនុវត្តនយោបាយភូមិឃុំមានសុវត្ថិភាព ពិសេសបំផុតសកម្មភាពចូលរួមរបស់ប្រជាពលរដ្ឋ នៅជុំវិញគោលដៅវិនិយោគ ឬគោលដៅទេសចរណ៍ ឲ្យបានល្អប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ