ប្រមុខរដ្ឋាភិបាលប្រកាសឲ្យអ្នកពាក់ព័ន្ធប្រុងប្រយ័ត្នទឹកជំនន់ ខណៈអាកាសធាតុនៅបន្តអាប់អួរ
រដ្ឋាភិបាលកម្ពុជានៅថ្ងៃព្រហស្បតិ៍នេះ បានណែនាំដល់ក្រសួង ស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋ នៅទូទាំងប្រទេសបង្កើនការយកចិត្តទុកដាក់ចំពោះជំនន់ទឹកភ្លៀង និងជំនន់ទឹកទន្លេមេគង្គ ដែលបានជន់លិច និងបន្តជន់លិចនៅតាមតំបន់មួយចំនួននៃប្រទេសកម្ពុជា។ ការលើកឡើងរបស់រដ្ឋាភិបាលនៅពេលនេះ បានធ្វើឡើងបន្ទាប់ពីខេត្តចំនួន៧ បានទទួលរងការលិចលង់ដោយជំនន់ទឹកភ្លៀង និងទឹកទន្លេមេគង្គអាចនឹងជន់លិច ខណៈ ភ្លៀងបានបន្តធ្លាក់ឥតឈប់ឈរ។
ចុះផ្សាយនៅថ្ងៃ៖
ស្តាប់ - ០២:១៩
នៅក្នុងសេចក្តីណែនាំរបស់រដ្ឋាភិបាលស្តីពីការត្រៀមបង្ការដើម្បីកាត់បន្ថយហានិភ័យគ្រោះមហន្តរាយទឹកជំនន់ លោកនាយករដ្ឋមន្ត្រី ហ៊ុន សែន បានប្រាប់ឲ្យមន្ត្រីរបស់លោកចាប់តាំងពីថ្នាក់ជាតិរហូតដល់មូលដ្ឋាន បង្កើនការយកចិត្តទុកដាក់ប្រុងប្រយ័ត្នខ្ពស់បំផុត និងត្រូវមានការរៀបចំទុកជាមុន ដោយប្រើកម្លាំងសរុប មធ្យោបាយសរុប នៅពេលមានទឹកជំនន់កើតឡើង។ លើសពីនេះ សេចក្តីណែនាំ ក៏តម្រូវឲ្យមានការជម្លៀសប្រជាពលរដ្ឋទៅកាន់ទីទួលសុវត្ថិភាព បញ្ចៀសឲ្យខាងតែបាន នូវការប៉ះពាល់ដល់អាយុជីវិត និងការខូចខាតផ្សេង ៗដែលកើតមានឡើងជាយថាហេតុ។
ដំណាលគ្នានេះ នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល តាមរយៈទំព័រហ្វេសប៊ុករបស់ខ្លួន ក៏បានចេញសារអប់រំខ្លីទៅដល់ប្រជាពលរដ្ឋ ដែលកំពុងជួបប្រទះនឹងទឹកជំនន់។ នាយកដ្ឋានប្រយុទ្ធនឹងជំងឺឆ្លង បានណែនាំថា ប្រជាជនត្រូវតាមដានពីស្ថានភាពទឹកជំនន់ កុំបើកបរលើទឹកជំនន់ ជៀសវាងពស់ចឹក ដោយហាមមិនឲ្យយកដៃផ្ទាល់ទៅកាយកន្លែងទួលឬពុំនូកនានា ប្រុងប្រយ័ត្នចំពោះអគ្គិសនី ប្រើប្រាស់ទឹកស្អាត ឆ្អិន និងបរិភោគចំណីអាហារឆ្អិនជានិច្ច រក្សាអនាម័យ ជាដើម។
ក្រៅពីនេះ ក្រសួងសុខាភិបាល ក៏បានបង្ហាញប្រព័ន្ធទូរស័ព្ទទាន់ហេតុការណ៍ផងដែរ គឺ១១៥ សម្រាប់ទាក់ទងសុំកិច្ចអន្តរាគមន៍ ខណៈមានការណែនាំឲ្យមានការបង្ការ ក្នុងអំឡុងពេលមានទឹកជំនន់ ដោយឲ្យប្រុងប្រយ័ត្ននូវជំងឺឆ្លងផ្សេងៗ ក្នុងនោះមានជំងឺរាករូស គ្រុនពោះវៀន អាសន្នរោគ ពុលចំណីអាហារ គ្រុនចាញ់ គ្រុនឈាម ផ្តាសាយធំ ជំងឺរមាស់ស្បែកជាដើម។
សូមបញ្ជាក់ថា ប្រទេសកម្ពុជាមួយសប្តាហ៍ចុងក្រោយនេះ បានទទួលរងនូវឥទ្ធិពលប្រព័ន្ធសម្ពាធទាប ជាហេតុធ្វើឲ្យភ្លៀងធ្លាក់ជាបន្តបន្ទាប់ បណ្តាលឲ្យខេត្តយ៉ាងហោចណាស់៧ បានរងនូវជំនន់ទឹកភ្លៀងរួចទៅហើយ មានខេត្តកំពត កោះកុង កំពង់ស្ពឺ បាត់ដំបង ប៉ៃលិន និងខេត្តព្រះសីហនុ។ ជាមួយគ្នានេះ តំបន់ផ្ទៃរងទឹកភ្លៀងរបស់ទន្លេងមេគង្គ ក្នុងប្រទេសឡាវនិងប្រទេសថៃ ក៏មានភ្លៀងធ្លាក់ច្រើនដែរ បង្កឲ្យទឹកទន្លេមេគង្គហក់ឡើងខ្លាំង។
រហូតមកទល់ពេលនេះ នៅមិនទាន់មានប្រជាពលរដ្ឋណាម្នាក់រងគ្រោះដល់អាយុជីវិត ដោយសារទឹកជំនន់នៅឡើយ ក៏ប៉ុន្តែប្រជាជនរាប់ពាន់គ្រួសារ រងផលប៉ះពាល់ និងត្រូវបានជន្លៀសទៅកាន់ទីទួលសុវត្ថិភាព ស្រូវ និងដំណាំ រាប់ពាន់ហិចតាដែរ ក៏ត្រូវបានទឹកលិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ