សហជីពអន្តរជាតិ IndustriAll គាំទ្រយុទ្ធនាការទាមទារប្រាក់ឈ្នួលសមរម្យនៅកម្ពុជា
IndustriAll ដែលប្រមូលផ្តុំទៅដោយសហជីពអន្តរជាតិធំៗមកពី១៤០ប្រទេស បានចេញសេចក្តីថ្លែងការណ៍មួយ នៅថ្ងៃទី៩ ធ្នូ ឆ្នាំ២០១៥នេះ ដោយបានបង្ហាញការគាំទ្រចំពោះកម្មករ-កម្មការិនីកម្ពុជា ក្នុងការទាមទារប្រាក់ឈ្នួលរស់នៅសមរម្យ។ នៅក្នុងសេចក្តីថ្លែងការណ៍នៅថ្ងៃនេះ សហជីពអន្តរជាតិ IndustriAll ក៏ចង់បានការធានាថា ច្បាប់សហជីពថ្មីរបស់កម្ពុជា នឹងមិនមែនជាច្បាប់ដែលរឹតត្បិតសេរីភាពនោះទេ។
ចុះផ្សាយនៅថ្ងៃ៖
ស្តាប់ - ០២:១៧
សេចក្តីថ្លែងការណ៍របស់សហជីពអន្តរជាតិ Industri All Global Union បានធ្វើឡើង នៅខណៈដែលប្រតិភូអន្តរជាតិជាង២០០នាក់ តំណាងឲ្យកម្មករជាង៥០លាន មកពី១៤០ប្រទេស កំពុងជួបប្រជុំគ្នារយៈពេលពីរថ្ងៃនៅក្រុងភ្នំពេញ ចាប់ពីថ្ងៃទី៩ ដល់ថ្ងៃទី១០ធ្នូ នៅឯសណ្ឋាគាឡឺរ៉ូយ៉ាល់។
នៅក្នុងសេចក្តីថ្លែងការណ៍របស់ខ្លួន សហជីពអន្តរជាតិ Industri All បានលើកឡើងថា ការតស៊ូរបស់សហជីព, បញ្ហាប្រាក់ឈ្នួលរស់នៅសមរម្យរបស់កម្មករ គឺជាប្រធានបទនៃកិច្ចពិភាក្សា ហើយថាសហជីពអន្តរជាតិ ដែលគ្របដណ្តប់លើសហជីពមកពី១៤០ប្រទេសនេះ បានគាំទ្រចំពោះកម្មករ-កម្មការិនីកម្ពុជា។ ក្នុងនោះសហជីពអន្តរជាតិ Industri All នឹងសហការជាមួយសហជីពចំនួន៨នៅកម្ពុជា ដើម្បីធ្វើយុទ្ធនាការទាមទារប្រាក់ឈ្នួលរស់នៅសមរម្យ។ ប្រាក់ឈ្នួលរស់នៅសមរម្យ គឺជាប្រាក់ឈ្នួល ដែលធានាឲ្យការរស់នៅរបស់កម្មករ-កម្មការិនីកម្ពុជា រួមទាំងគ្រួសាររបស់គេផង អាចរស់នៅក្នុងលក្ខខណ្ឌសមរម្យនៅក្នុងសង្គម។
លោកស្រី Jyrki Raina អគ្គលេខាធិការសហជីពអន្តរជាតិ Industri All Global Union បានថ្លែងនៅក្នុងសេចក្តីថ្លែងការណ៍នេះថា ការតំឡើងប្រាក់ឈ្នួលកម្មករកម្ពុជាថ្មីៗនេះ មិនទាន់ដល់ការរំពឹងចង់បានរបស់កម្មករកម្ពុជានៅឡើយទេ។ ហើយថា នេះគឺជាមូលហេតុដែលសហជីពអន្តរជាតិ Industri All នឹងបន្តធ្វើការងារជាមួយនឹងក្រុមហ៊ុនម៉ាកល្បីៗ ខណៈដែលរដ្ឋាភិបាលនិងភាគីថៅកែរោងចក្រ បានបង្ហាញភាពខ្វះខាតរបស់ខ្លួន ក្នុងការឆ្លើយតបទៅនឹងសំណើរ១៣ចំណុច របស់សហជីពកម្ពុជានាពេលកន្លងមក។
គួរបញ្ជាក់ថា ថ្ងៃទី១០ធ្នូ គឺជាថ្ងៃចុងក្រោយនៃយុទ្ធនាការ «ទាមទារប្រាក់ឈ្នួលរស់នៅសមរម្យ» រយៈពេល២០ថ្ងៃ ដែលធ្វើឡើងដោយសហជីពធំចំនួន៨នៅកម្ពុជាចាប់ពីថ្ងៃទី២០វិច្ឆិកាមក។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានថ្លែងថា សហជីពអន្តរជាតិ Industri All ជាសហជីពអន្តរជាតិដ៏មានឥទ្ធិពលនៅលើពិភពលោក នឹងមិនងាយធ្វើយុទ្ធនាការនោះទេ។
នៅក្នុងសេចក្តីថ្លែងការណ៍របស់ខ្លួន លោកស្រី Jyrki Raina បានថ្លែងថា Industri All ចង់ឃើញភាពរីកចំរើននៃលក្ខខណ្ឌរស់នៅរបស់កម្មករកម្ពុជា ហើយថា Industri All ក៏ចង់ឃើញការធានាថា ច្បាប់សហជីពថ្មីដែលកំពុងស្ថិតនៅក្នុងដៃរបស់រដ្ឋសភាកម្ពុជា នឹងធ្វើឡើង ដោយមិនមានការរិតត្បិតសេរីភាពសហជីពនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ