តុលាការកោះហៅលោក សម រង្ស៊ី និងលោកស្រី ថាក់ ឡានី ឱ្យចូលបំភ្លឺរឿងបណ្តឹងលោកហ៊ុន សែន
នៅទីបំផុតទៅ ដំណើរការក្តីលោកសម រង្ស៊ី ប្រធានគណបក្សសង្គ្រោះជាតិ និងលោកស្រីថាក់ ឡានី សមាជិកព្រឹទ្ធសភា បានឈានដល់ដំណាក់កាលនៃការបំភ្លឺពីដើមចោទ និងចុងចោទ។ តំណាងរាស្ត្របក្សប្រឆាំងទាំងពីររូបនេះ ជាប់បណ្តឹងរបស់ប្រមុខរដ្ឋាភិបាលដូចគ្នា។ ប៉ុន្តែតុលាការនៅមិនទាន់សម្រេចចោទប្រកាន់នៅឡើយនោះទេ។
ចុះផ្សាយនៅថ្ងៃ៖
ស្តាប់ - ០១:៥៤
តុលាការក្រុងភ្នំពេញបានចេញដីកាកោះហៅលោក សម រង្ស៊ី ឱ្យចូលខ្លួនឆ្លើយបំភ្លឺនៅថ្ងៃទី ១៩ សីហាខាងមុខ ខណៈដែលលោកស្រី ថាក់ ឡានី នឹងត្រូវចូលខ្លួនឆ្លើយបំភ្លឺនៅមុខតុលាការនៅថ្ងៃទី ៨ សីហាផងដែរ។ ចំណែកឯមេធាវីដើមចោទ លោក គី តិច តំណាងឱ្យលោកនាយករដ្ឋមន្ត្រីហ៊ុន សែន ដែលជាដើមបណ្តឹងនឹងចូលខ្លួនឆ្លើយបំភ្លឺនៅថ្ងៃទី ៥ សីហាខាងមុខនេះ។
ទាំងលោក សម រង្ស៊ី ប្រធានគណបក្សសង្គ្រោះជាតិ ដែលវ័ណ្ឌកដោយបណ្តឹងស្រាប់ ត្រូវបានមេធាវីនាយករដ្ឋមន្ត្រីប្តឹងមួយករណីទៀត ក្រោយលោកអត្ថាធិប្បាយ និងសរសេរបង្ហោះតាមបណ្តាញសង្គម ដែលចោទរដ្ឋអំណាចរបស់លោកនាយករដ្ឋមន្ត្រី ថាជាអ្នករៀបចំអំពើភេរវកម្មបាញ់សម្លាប់លោកបណ្ឌិត កែម ឡី។ ចំណែកឯលោកស្រី ថាក់ ឡានី សមាជិកព្រឹទ្ធសភាគណបក្ស សម រង្ស៊ី វិញក៏ជាប់បណ្តឹងមួយដែរ បន្ទាប់ពីលោកស្រីបានថ្លែងជាសាធារណៈថា លោកនាយករដ្ឋមន្ត្រី គឺជាអ្នកបាញ់សម្លាប់លោក កែម ឡី។ ក្នុងបណ្តឹងពីរផ្សេងគ្នានេះ លោក ហ៊ុន សែន បានប្តឹងទាមទារសំណងពីតំណាងរាស្ត្រទាំងពីររូបចំនួន២រយរៀល។ ទន្ទឹមនឹងនោះ លោកស្រីថាក់ ឡានី ធ្លាប់បានបដិសេធចំពោះការចោទប្រកាន់នេះ។
ដោយឡែកមេធាវី សម សុគង់ មេធាវីការពារក្តីឱ្យលោកសម រង្ស៊ី បានត្រៀមការពារកូនក្តីរបស់ខ្លួន និងរៀបចំឯកសារ ដែលមានទាំងច្បាប់ជាតិ និងអន្តរជាតិរួចរាល់អស់ហើយ។ ក្រៅពីបណ្តឹងមកកាន់គណបក្សប្រឆាំង អំពើឃាតកម្មលើលោកបណ្ឌិតកែម ឡី ក៏បានធ្វើឱ្យ មនុស្ស២រូប និងព្រះសង្ឃមួយអង្គ បានរត់ភៀសខ្លួន និងភៀសព្រះកាយទៅកាន់ប្រទេសថៃដោយព្រួយបារម្ភពីសុវត្ថិភាព។ យ៉ាងណាក៏ដោយ លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិបានមានប្រសាសន៍ថា ការប្តឹងផ្តល់លើអ្នកអត្ថាធិប្បាយនោះ គឺមិនមែនជាដំណោះស្រាយនោះទេ ព្រោះគ្រួសារជនរងគ្រោះចង់បានតែយុត្តិធម៌ និងស្វែងរកការពិតតែប៉ុណ្ណោះ។ សូមកត់សម្គាល់ថា ព្រឹទ្ធសភាកម្ពុជានៅមិនទាន់បើកកិច្ចប្រជុំដកអភ័យឯកសិទ្ធលើលោកស្រីថាក់ ឡានី តំណាងរាស្ត្រគណបក្សសម រង្ស៊ី នៅឡើយទេ ខណៈតុលាការនៅមិនទាន់សម្រេចចោទប្រកាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ