ស្ថានការនយោបាយក្តៅ៖ លោកសម រង្ស៊ី នៅមានទំនាក់ទំនងជាមួយលោកហ៊ុន សែន
លោកសម រង្ស៊ីប្រធានគណបក្សសង្គ្រោះជាតិ នៅថ្ងៃចន្ទទី១៧ សីហានេះបានទៅសួរសុខទុក្ខសកម្មជនគណបក្សសង្គ្រោះជាតិ និងតំណាងរាស្ត្រព្រឹទ្ធសភាលោកហុង សុខហួរនៅពន្ធនាគារព្រៃសរ។ បើទោះបីជាស្ថានការនយោបាយក្តៅក៏ដោយ ប៉ុន្តែប្រមុខបក្សគូរប្រជែងទាំងពីរនៅតែបន្តរក្សាទំនាក់ទំនងជាមួយគ្នាធម្មតា។
ចុះផ្សាយនៅថ្ងៃ៖
ស្តាប់ - ០១:៥៥
លោកសម រង្ស៊ី និងលោកនាយករដ្ឋមន្ត្រីហ៊ុន សែននៅតែបន្តទំនាក់ទំនងតាមរយៈទូរស័ព្ទ និងបណ្តាញទំនាក់ទំនងផ្សេងៗទៀត។ នេះជាការបញ្ជាក់ពីលោកសម រង្ស៊ី សារជាថ្មីម្តងទៀតនៅថ្ងៃចន្ទនេះ នៅពេលដែលលោកបានសួរសុខទុក្ខតំណាងរាស្ត្រនិងសកម្មជននៅពន្ធនាគារព្រៃស។ ប្រធានគណបក្សប្រឆាំង៤អាណត្តិរូបនេះ រំពឹងថាលោកនឹងអាចសន្ទនាជាមួយលោកនាយករដ្ឋមន្ត្រីដើម្បីដោះស្រាយការឃុំខ្លួនសកម្មជន និងសមាជិកព្រឹទ្ធសភាដែលកំពុងជាប់ឃុំនៅពន្ធនាគារ។ ប៉ុន្តែលោកសម រង្ស៊ីនៅមិនទាន់អាចបញ្ជាក់ពីកាលបរិច្ឆេទនៃការជួបចរចាជាផ្លូវការរវាងដៃគូរសន្ទានាទាំងពីរនោះទេ។
លោក សម រង្ស៊ី មិនមានប្រតិកម្មខ្លាំងៗលើស្ថានការណ៍នយោបាយដែលកំពុងមានកំដៅនេះទេ។សម្រាប់លោក សម រង្ស៊ី វប្បធម៌សន្ទនាតែមួយគត់ដែលនឹងអាចដោះស្រាយបញ្ហានយោបាយកម្ពុជានាពេលបច្ចុប្បន្ន។
ស្ថានការណ៍នយោបាយចុងក្រោយនេះ បានកើនឡើងកំដៅឡើងវិញបន្ទាប់ពីសកម្មជនគណបក្សចំនួនជាង១០រូប និងសមាជិកព្រឹទ្ធសភាត្រូវបានជាប់ឃុំ ក្នុងសំណុំរឿងអំពើហិង្សាកាលពីឆ្នាំ២០១៤ និងសំណុំរឿងក្លែងបន្លំឯកសារស្តីពីសន្ធិសញ្ញាព្រំដែនកម្ពុជា-វៀតណាម។ យ៉ាងណាក៏ដោយ លោក សម រង្ស៊ីបានលើកឡើងក្រោយវិលមកដល់កម្ពុជាវិញថា វត្តមានរបស់លោកលើកនេះ គឺដើម្បីដោះស្រាយបញ្ហានៃការឃុំខ្លួនសកម្មជនបក្សប្រឆាំង។
សមាជិកគណបក្សប្រឆាំងដែលកន្លងធ្លាប់ត្រូវបានដោះលែងតាមរយៈវប្បធម៌សន្ទនារវាងលោក សម រង្ស៊ី និងលោកហ៊ុន សែនផងដែរ។ ដោយឡែកគណបក្សកាន់អំណាចនៅតែប្រកាន់ជំហរថា សំណុំរឿងសកម្មជនទាំង១៣រូប និងតំណាងរាស្ត្រព្រឹទ្ធសភា គឺមិនមែនត្រូវដោះស្រាយតាមរយៈវប្បធម៌សន្ទនានោះទេ។ ប៉ុន្តែករណីទាំងអស់ត្រូវដើរតាមនីតិវិធីរបស់តុលាការ។
សូមរំលឹកថា សមាជិកគណបក្សសង្គ្រោះជាតិដែលកំពុងជាប់ឃុំក្នុងពន្ធនាគារមានចំនួន១៤រូប ក្នុងនោះសកម្មជនចំនួន១៣រូបជាប់ពាក់ព័ន្ធនឹងសំណុំរឿងបាតុកម្មនៅទីលានប្រជាធិបតេយ្យ កាលពីឆ្នាំ២០១៤ និង លោកហុង សុខហួរ សមាជិកព្រឹទ្ធសភាគណបក្សសម រង្ស៊ីដែលជាប់ពាក់ព័ន្ធការចោទបទក្លែងបន្លំឯកសាររឿងព្រំដែនកម្ពុជា និងវៀតណាម។ ទោះបីជាយ៉ាងណា សកម្មជនគណបក្សសង្គ្រោះជាតិដែលកំពុងជាប់ឃុំបានផ្តាំលោកសម រង្ស៊ី ថាពួកគេមិនមែនជាថ្នូរនយោបាយនោះទេ ខណៈដែលលោក សម រង្ស៊ី គ្រោងនឹងជួបជាមួយលោកនាយករដ្ឋមន្ត្រីហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ