បារាំងផ្តល់កម្ចី ១០៤លានអឺរូដល់កម្ពុជាពេលលោកហ៊ុន សែន ទៅបំពេញទស្សនកិច្ច
ក្រោយពីបានបំពេញទស្សនកិច្ចរយៈពេល ៣ថ្ងៃ ក្នុងប្រទេសបារាំង លោកនាយករដ្ឋមន្ត្រីហ៊ុន សែន និងគណប្រតិភូជាន់ខ្ពស់ បានមកដល់ប្រទេសកម្ពុជាវិញហើយ នៅព្រឹកថ្ងៃទី ២៨តុលានេះ។ លទ្ធផលជាផ្លែផ្កាក្នុងដំណើរទស្សនកិច្ចនោះ ក្រៅតែបានជួបជាមួយប្រមុខរដ្ឋាភិបាលបារាំង ពលរដ្ឋ និងនិស្សិតខ្មែរនៅប្រទេសបារាំងហើយ - រដ្ឋាភិបាលកម្ពុជា និងបារាំង ក៏បានចុះហត្ថលេខារួមលើឯកសារចំនួន ៦ ដែលមានទឹកប្រាក់កម្ចីសម្បទាន ១០៤លានអឺរូផងដែរ។
ចុះផ្សាយនៅថ្ងៃ៖
ស្តាប់ - ០២:០៦
ក្រោយបញ្ចប់ដំណើរទស្សនកិច្ចជាប្រវត្តិសាស្ត្រ នៅក្នុងប្រទេសបារាំង រយៈពេល ៣ថ្ងៃរួចមក លោកនាយករដ្ឋមន្ត្រីហ៊ុន សែន ព្រមទាំងគណប្រតិភូជាន់ខ្ពស់ បានអះអាងថា ដំណើរទស្សនកិច្ចនេះ បានធ្វើឲ្យទំនាក់ទំនង រវាងបារាំង និងកម្ពុជា កាន់តែស្អិតរមួត។ ហើយក្នុងនោះប្រទេសទាំងពីរ ក៏បានពង្រឹងបន្ថែមនូវកិច្ចសហប្រតិបត្តិការលើវិស័យជាច្រើន ដូចជានយោបាយ សេដ្ឋកិច្ច ពាណិជ្ជកម្ម ទេសចរណ៍ និងការវិនិយោគជាដើម។
ជាមួយគ្នានោះ រដ្ឋាភិបាលបារាំង ក៏បានផ្តល់នូវកម្ចីសម្បទានជាទឹកប្រាក់ ១០៤លានអឺរ៉ូ សម្រាប់គម្រោងអភិវឌ្ឍន៍ជាតិកម្ពុជាមួយចំនួនផងដែរ។ កម្ចីសម្បទាន ដែលត្រូវបានចុះហត្ថលេខា ជាមួយរដ្ឋមន្ត្រីក្រសួងការបរទេសបារាំង លោក Laurent Fabiusនោះ រួមមាន កម្ចីសម្បទាន មានទឹកប្រាក់ ៩លានអឺរ៉ូ សម្រាប់អនុវត្តគំរោងផ្គត់ផ្គង់ទឹកស្អាត នៅខេត្តសៀមរាប។ កម្ចីទឹកប្រាក់ ១១លានអឺរ៉ូ សម្រាប់គំរោងសាងសង់សាលាជាតិ បណ្តុះបណ្តាលវិជ្ជាជីវៈទេសចរណ៍ នៅរាជធានីភ្នំពេញ និងខេត្តព្រះសីហនុ។ កម្ចី ទឹកប្រាក់ ១៤លានអឺរ៉ូ សម្រាប់គំរោងពង្រឹងវិស័យអប់រំ បណ្តុះបណ្តាលបច្ចេកទេស និងវិជ្ជាជីវៈ។ កម្ចី ៧០លានអឺរ៉ូ សម្រាប់គំរោងសាងសង់ប្រព័ន្ធខ្សែបញ្ជូន និងចែកចាយអគ្គិសនី នៅខេត្តកំពង់ចាម ខេត្តក្រចេះ និងខេត្តកោះកុង។
គួរជម្រាបជូនថា ចាប់តាំងពីឆ្នាំ១៩៩៣ មកដល់បច្ចុប្បន្ន កម្ពុជាបានទទួលកម្ចីសម្បទានសរុបចំនួន ៤០៦លានអឺរ៉ូ តាមរយៈទីភ្នាក់ងារអភិវឌ្ឍន៍អន្តរជាតិបារាំង AFD។
ស្របពេលនោះ ក៏មានឯកសារចំនួនពីរផ្សេងទៀត ត្រូវបានចុះហត្ថលេខាដោយឡែក រួមមាន អនុសញ្ញាស្តីពីបត្យាប័ន រវាងក្រសួងយុត្តិធម៌នៃប្រទេសទាំងពីរ និងកិច្ចព្រមព្រៀងស្តីពី ការផ្តុំបដិមាករខ្មែរ រវាងសារមន្ទីរជាតិកម្ពុជា និងសារមន្ទីរ Guimet (ហ្គីមេ) បារាំង។
ប្រមុខរដ្ឋាភិបាលកម្ពុជា បានលើកឡើងថា សកម្មភាពវិនិយោគ និងធុរកិច្ចរបស់បារាំងនៅកម្ពុជា គឺនៅមានចំនួនតិចនៅឡើយ ដោយមានក្រុមហ៊ុនបារាំងមកវិនិយោគនៅកម្ពុជាប្រមាណត្រឹមតែ ៥០ក្រុមហ៊ុនប៉ុណ្ណោះ រហូតមកដល់ពេលនេះ។ លោកនាយករដ្ឋមន្ត្រីហ៊ុន សែន បានអំពាវនាវឲ្យ ក្រុមហ៊ុនបារាំងមកបណ្ដាក់ទុននៅកម្ពុជាបន្ថែមទៀត ដើម្បីបម្រើទីផ្សារសហគមន៍អឺរ៉ុប ដែលបានផ្ដល់ភាពអនុគ្រោះ ក្នុងការនាំចូលមុខទំនិញ ឬផលិតផលពីកម្ពុជា ដោយគ្មានការកំណត់បរិមាណ និងមិនជាប់ពន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ