លោក ហ៊ុន សែន អះអាងថាមិនយោគយល់និងមិនអត់អោនចំពោះជនវាយលើតំណាងរាស្ត្រ
លោកនាយករដ្ឋមន្ត្រី ហ៊ុន សែន បានប្រកាសមិនអាចយោគយល់ និងអត់អោនបានទេចំពោះជនល្មើស ដែលវាយតំណាងរាស្ត្រគណបក្សប្រឆាំងពីររូបកាលពីចុងខែតុលាឆ្នាំ២០១៥ ទោះបីជាអ្នកនោះគាំទ្រគណបក្សប្រជាជនឬគណបក្សប្រឆាំងក្ដីត្រូវតែចាប់យកមកផ្ដន្ទាទោសឲ្យខាងតែបាន។ នេះបើយោងតាមលិខិតរបស់លោកនាយករដ្ឋមន្ត្រី ហ៊ុន សែន ចុះថ្ងៃទី២សីហាឆ្នាំ២០១៦ជម្រាបទៅកាន់ប្រធានរដ្ឋសភាលោក ហេង សំរិន។
ចុះផ្សាយនៅថ្ងៃ៖
ស្តាប់ - ០១:៥៩
ការប្រកាសជំហររកយុត្តិធម៌ជូនតំណាងទាំងពីររូបរបស់គណបក្សសង្គ្រោះជាតិគឺ លោកញយ ចំរើន និង លោក គង់ សភា ពីសំណាក់លោកនាយករដ្ឋមន្ត្រី ហ៊ុន សែន ឆ្លើយតបសំណើរបស់តំណាងរាស្ត្រគណបក្សសង្គ្រោះជាតិកាលពីថ្ងៃទី ២៦តុលា ឆ្នាំ២០១៥ ដែលស្នើឲ្យរដ្ឋាភិបាលចាត់វិធានការផ្លូវច្បាប់ទៅលើអ្នកប្រព្រឹត្តហិង្សាមកលើអ្នកតំណាងរាស្ត្រទាំងពីររូប។ តំណាងរាស្ត្រទាំងពីររូបបានរងអំពើហិង្សាក្នុងប្រព្រឹត្តការណ៍ដាក់ញត្តិជូនរដ្ឋសភាទាមទារឲ្យលោក កឹម សុខា ចុះចេញពីតំណែងអនុប្រធានទី១ នៃរដ្ឋសភាកាលពីខែតុលា ឆ្នាំ២០១៥។
នៅក្នុងលិខិតចុះថ្ងៃទី២សីហា លោក ហ៊ុន សែន បានជម្រាបទៅកាន់លោក ហេង សំរិន ថាលោកបានអំពាវនាវចំពោះអ្នកជាប់ពាក់ព័ន្ធទាំងអស់រួមមាន អ្នកបើកបររថយន្តសាមីខ្លួនអ្នកតំណាងរាស្ត្រផ្ទាល់ អ្នកថតវីដេអូ ថតរូប និងអ្នកបង្ហោះរូបតាមហ្វេសប៊ុកទាំងឡាយធ្វើកិច្ចសហប្រតិបត្តិការជាមួយនឹងអាជ្ញាធរមានសមត្ថកិច្ច ដើម្បីស្វែងរកខ្លួនជនដៃដល់។ លោកនាយករដ្ឋមន្ត្រីក៏បានអំពាវនាវចំពោះអ្នកដែលបានប្រព្រឹត្តសូមចេញមុខមកសារភាព ដើម្បីទទួលខុសត្រូវចំពោះមុខច្បាប់។
សូមបញ្ជាក់ថា ក្រោយការអំពាវនាវរបស់ប្រមុខរដ្ឋាភិបាលនៅថ្ងៃទី៣ វិច្ឆិកា ឆ្នាំ២០១៥ តាមកញ្ចក់ទូរទស្សន៍ ជនដៃដល់ដែលបានបង្ករបួសស្នាមលើអ្នកតំណាងរាស្ត្រចំនួនបីរូបឈ្មោះ ចាយ សារិទ្ធ ម៉ៅ ហឿន និងសុត វណ្ណនី បានចេញមកបង្ហាញខ្លួនចំពោះមុខគណៈកម្មការមួយដែលបង្កើតឡើងដោយរដ្ឋាភិបាលសម្រាប់ដោះស្រាយសំណុំរឿងវាយអ្នកតំណាងរាស្ត្រនេះ បានបញ្ជូនជនទាំងបីនាក់ទៅកាន់សាលាដំបូងរាជធានីភ្នំពេញ។
សាលាដំបូងរាជធានីភ្នំពេញបានសម្រេចចោទប្រកាន់ជនដៃដល់ទាំងបីនាក់ ពីបទហិង្សាដោយចេតនាមានស្ថានទម្ងន់ទោស និងបទធ្វើឲ្យខូចខាតដោយចេទនាមានស្ថានទម្ងន់ទោស ហើយបានសម្រេចឃុំខ្លួនជនដៃដល់ទាំងបីនាក់នេះជាបណ្ដោះអាសន្ននៅថ្ងៃទី៤ វិច្ឆិកា ឆ្នាំ២០១៥។
ករណីនេះក៏ត្រូវបានសាលាដំបូងរាជធានីភ្នំពេញលើកយកមកជំនុំជម្រះជាសាធារណៈកាលពីខែមេសា និងខែឧសភា ឆ្នាំ២០១៦ ដោយសម្រេចផ្ដន្ទាទោសជនទាំងបីនាក់ដាក់ពន្ធនាគារក្នុងម្នាក់ៗ៤ឆ្នាំ តែទោសនេះអនុវត្តក្នុងពន្ធនាគារក្នុងម្នាក់ៗចំនួន១ឆ្នាំ ហើយទោសដែលនៅសល់ត្រូវព្យួរ។ ពួកគេទាំងបីនាក់ត្រូវបង់ប្រាក់ពិន័យ៦លានរៀល និងរួមគ្នាបង់សំណងខូចខាត និងជំងឺចិត្ត៤០លានរៀលទៅឲ្យលោក គង់ សភា និង៤០លានរៀលទៀតទៅឲ្យ លោក ញយ ចំរើន។
តំណាងរាស្ត្រទាំងពីរមិនពេញចិត្តសេចក្ដីសម្រេចនេះ ក៏បានដាក់ពាក្យបណ្ដឹងទាស់ទៅឧទ្ទរណ៍ដោយបានចាត់ទុកថាសេចក្ដីសម្រេចនេះមិនសមាមាត្រទៅនឹងអំពើប្រព្រឹត្តរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ