លោក ហ៊ុន សែន៖ រដ្ឋាភិបាលប្រឆាំងអំពើពុករលួយដោយប្រព័ន្ធបច្ចេកវិទ្យា
រដ្ឋាភិបាលកំពុងតែប្រើប្រាស់ប្រព័ន្ធបច្ចេកវិទ្យា ជាពិសេសសេវាធនាគារ ដើម្បីប្រយុទ្ធប្រឆាំងនឹងអំពើពុករលួយ ក៏ដូចជាសកម្មភាពមិនប្រក្រតីនានា។ នេះគឺជាការបញ្ជាក់អះអាងរបស់លោកនាយករដ្ឋមន្ដ្រី ហ៊ុន សែន នៅព្រឹកថ្ងៃពុធនេះ ក្នុងពិធីចែកសញ្ញាបត្រដល់គ្រូបញ្ចប់ការសិក្សាគរុកោសល្យ នៅវិទ្យាស្ថានជាតិអប់រំ។ ប្រមុខរដ្ឋាភិបាលកម្ពុជា បានលើកឡើងថា ការបើកប្រាក់ខែមន្ដ្រីរាជការនិងការបង់ពន្ធ ដែលរដ្ឋាភិបាលងាកមកធ្វើតាមធនាគារកន្លងមក គឺអាចកាត់បន្ថយអំពើពុករលួយបានមួយកម្រិត ខណៈអង្គការសង្គមស៊ីវិលសម្ដែងការយល់ឃើញដូចគ្នាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅក្នុងពិធីចែកសញ្ញាបត្រដល់គ្រូបញ្ចប់ការសិក្សាគរុកោសល្យ នៅវិទ្យាស្ថានជាតិអប់រំ លោកនាយករដ្ឋមន្ដ្រី ហ៊ុន សែន បានលើកឡើងអំពីការបើកប្រាក់ខែមន្ដ្រីរាជការ តាមធនាគារ ដែលជាចំណាត់ការមួយ លុបបំបាត់មន្ដ្រីខ្មោចបើកប្រាក់ខែ។ នៅពេលការបើកប្រាក់ខែធ្វើតាមប្រព័ន្ធធនាគារ មន្ដ្រីខ្មោច មិនចេះបើកប្រាក់ខែទេ។ នេះបើតាមប្រមុខរដ្ឋាភិបាលកម្ពុជា។
លោកនាយករដ្ឋមន្ដ្រី៥អាណត្តិរូបនេះ ក៏បានលើកឡើងពីចំណាត់ការ បង់ពន្ធតាមប្រព័ន្ធធនាគារ ដែលរដ្ឋាភិបាលបានធ្វើផងដែរ ដើម្បីប្រយុទ្ធប្រឆាំងអំពើពុករលួយ។ ការបង់ពន្ធតាមប្រព័ន្ធធនាគារនេះ បានកាត់បន្ថយការជួបគ្នារវាងមន្ដ្រីពន្ធ និងអ្នកបង់ពន្ធ ហើយវាបានបញ្ចៀសទាំងស្រុងនូវការកាត់កងក្រៅផ្លូវការនានា។ នេះគឺជាអ្វីដែលលោកនាយករដ្ឋមន្ដ្រីកម្ពុជាហៅថា ការប្រើប្រាស់ប្រព័ន្ធបច្ចេកវិទ្យា ដើម្បីប្រយុទ្ធប្រឆាំងនឹងអំពើពុករលួយ។
លោក ព្រាប កុល នាយកប្រតិបត្តិអង្គការតម្លាភាពកម្ពុជា យល់ថា ការប្រើប្រាស់ប្រព័ន្ធបច្ចេកវិទ្យា ដូចជាការបើកប្រាក់ខែមន្ដ្រីរាជការ និងការបង់ពន្ធតាមប្រព័ន្ធធនាគារដូច្នេះ គឺជាវិធានការមួយ ដែលអាចកាត់បន្ថយអំពើពុករលួយ ដែលជាជំងឺមហារីកដ៏រ៉ាំរៃនៅកម្ពុជាបាន។ បន្ថែមពីលើករណីទាំងពីរនេះ លោកព្រាប កុល ស្នើឲ្យរដ្ឋាភិបាលស្វែងរកមធ្យោបាយ កាត់បន្ថយឲ្យបាននូវអំពើពុករលួយនៅក្នុងវិស័យសេវាសាធារណៈ និងប្រព័ន្ធតុលាការ។ សម្រាប់នាយកប្រតិបត្តិអង្គការតម្លាភាពកម្ពុជារូបនេះ ប្រព័ន្ធតុលាករ គឺជាបញ្ហាមួយដ៏ស្មុគស្មាញ ដែលពិបាកនឹងរកប្រព័ន្ធបច្ចេកវិទ្យាមកដោះស្រាយធ្វើយ៉ាងណាឲ្យប្រជាពលរដ្ឋទទួលបានយុត្តិធម៌ និងឯករាជ្យ ដោយប្រាសចាកអំពើពុករលួយ។
សូមជម្រាបជូនថា នៅក្នុងតារាងរបស់អង្គការតម្លាភាពអន្ដរជាតិ ក្នុងឆ្នាំ២០១៥ ប្រទេសកម្ពុជា មានចំណាត់ថ្នាក់អាក្រក់បំផុតនៅក្នុងចំណោមប្រទេសជាសមាជិកអាស៊ានទាំង៩ លើបញ្ហាពុករលួយ។ កម្ពុជាមានចំណាត់ថ្នាក់១៥០ ក្នុងចំណោមប្រទេស១៦៨ ដែលអង្គការតម្លាភាពអន្តរជាតិលើកយកមកសិក្សា ដែលមានន័យថាកម្ពុជាស្ថិតនៅក្បែរបាតតារាងក្នុងចំណោមប្រទេស ដែលមានអំពើពុករលួយលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ