កម្ពុជាបន្ថែមឱកាសលើកលែងទោសដល់ទណ្ឌិត លើការលើកលែងទោសប្រចាំឆ្នាំរបស់ខ្លួន
នៅក្នុងឱកាសនៃពិធីបុណ្យភ្ជុំបិណ្ឌខាងមុខនេះ អ្នកទោសជាង៣០០នាក់ នឹងត្រូវស្នើលើកលែង និងបន្ធូរបន្ថយទោស ដោយផ្អែកលើគោលការណ៍ច្បាប់ និងមនុស្សធម៌។ បញ្ជីឈ្មោះអ្នកទោសទាំងនោះ កំពុងស្ថិតនៅក្នុងដៃរបស់គណៈកម្មការពិនិត្យ មុនដាក់ឲ្យនាយករដ្ឋមន្ត្រីសម្រេច។ ប៉ុន្តែអ្វីជាការកត់សំគាល់ នេះគឺជាការបន្ថែមឱកាសពិសេសថ្មីមួយទៀត លើកម្មវិធីលើកលែងទោសប្រចាំឆ្នាំរបស់កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
ការបន្ថែមឱកាសលើកលែង និងបន្ធូរបន្ថយទោសដល់ទណ្ឌិតកម្ពុជានេះ គឺជាការឆ្លើយតបទៅនឹងអនុសាសន៍របស់លោកនាយករដ្ឋមន្ត្រី ហ៊ុន សែន។ លោកនាយករដ្ឋមន្ត្រី ហ៊ុន សែន ដែលចង់ឲ្យមានការលើកលែង និងបន្ធូរបន្ថយទោសដល់ទណ្ឌិតកម្ពុជា ជាទ្រង់ទ្រាយធំនៅក្នុងឆ្នាំនេះ ដោយផ្អែកលើគោលការណ៍ច្បាប់ និងមនុស្សធម៌សុទ្ធសាធ។ នេះបើតាមការបញ្ជាក់ពីលោក ជិន ម៉ាលីន អ្នកនាំពាក្យក្រសួងយុត្តិធម៌។
អ្នកនាំពាក្យរូបនេះបានបន្ថែមថា បច្ចុប្បន្នបញ្ជីឈ្មោះអ្នកទោសចំនួន ៣១៩នាក់ ក្នុងនោះមានស្ត្រីប្រមាណជា១០០នាក់ កំពុងស្ថិតនៅក្នុងដៃរបស់គណៈកម្មការជាតិ ដើម្បីពិនិត្យមើល មុននឹងបញ្ជូនទៅឲ្យនាយករដ្ឋមន្ត្រីសម្រេច។ បន្ទាប់មក នាយករដ្ឋមន្ត្រី នឹងស្នើទៅកាន់ព្រះមហាក្សត្រ ដើម្បីសុំលើកលែងទោស។
នៅក្នុងសេចក្តីថ្លែងការណ៍ចុងក្រោយបំផុត លោកនាយករដ្ឋមន្ត្រី ហ៊ុន សែន បានថ្លែងនៅក្នុងជំនួបជាមួយអ្នកគាំទ្រនៅឯសហរដ្ឋអាមេរិកថា ក្នុងឆ្នាំនេះ លោកនឹងស្នើឲ្យមានការលើកលែងទោសជាទ្រង់ទ្រាយធំមួយ បន្ថែមលើកម្មវិធីលើកលែងទោសប្រចាំឆ្នាំ ដូចជា នៅពេលភ្ជុំបិណ្ឌ បុណ្យឯករាជ្យជាតិ និងនៅពេលប្រារព្ធខួប២០ឆ្នាំ នៃការបញ្ចប់សង្គ្រាមស៊ីវិលនៅកម្ពុជាជាដើម។ លោកបន្តថា ការលើកលែងទោសនេះ គឺធ្វើឡើងដើម្បីឲ្យខ្មែររួបរួមគ្នា កុំឲ្យបែកបាក់គ្នា និងឲ្យជនទាំងនោះបានចេញមកកែប្រែខ្លួននៅខាងក្រៅពន្ធនាគារ និងកុំឲ្យប្រមាថមាក់ងាយគ្នាតទៅទៀត។
លោក អ៊ូ ច័ន្ទរ័ត្ន អតីតតំណាងរាស្រ្តនៃអតីតគណបក្សសង្គ្រោះជាតិ កាលពីពេលថ្មីៗនេះ បានអំពាវនាវឲ្យមានការលើកលែងទោសឬទំលាក់បទចោទប្រកាន់ លើសកម្មជនអតីតគណបក្សសង្គ្រោះជាតិនៅតាមមូលដ្ឋាន ដែលកំពុងជាប់ពន្ធនាគារ នៅក្នុងឱកាសនៃពិធីបុណ្យភ្ជុំបិណ្ឌនេះ។ បើតាមលោក អ៊ូ ច័ន្ទរ័ត្ន យ៉ាងហោចណាស់មានមន្ត្រីថ្នាក់មូលដ្ឋានរបស់អតីតគណបក្សសង្គ្រោះជាតិចំនួន៦នាក់ ធ្លាប់កាន់តួនាទីចាប់ពីចៅសង្កាត់ មេឃុំ ជំទប់ទី១ រួមនឹងបេក្ខភាពក្រុមប្រឹក្សាស្រុក និងក្រុមប្រឹក្សា ឃុំ-សង្កាត់ ជាដើម កំពុងជាប់ឃុំ នៅមុននិងក្រោយការបោះឆ្នោត កាលពីថ្ងៃទី ២៩ កក្កដាមក។
ប៉ុន្តែ លោកជិន ម៉ាលីន អ្នកនាំពាក្យក្រសួងយុត្តិធម៌បានលើកឡើងថា ក្រុមគោលដៅដែលនឹងទទួលបានការលើកលែង និងបន្ធូរបន្ថយទោសនៅក្នុងឱកាសបុណ្យភ្ជុំបិណ្ឌខាងមុខនេះ ភាគច្រើន គឺជាស្ត្រីមានផ្ទៃពោះ ស្ត្រីមានកូននៅជាមួយក្នុងពន្ធនាគារ ចាស់ជរា និងអ្នកជំងឺនៅក្នុងពន្ធនាគារជាដើម។ ក្រៅពីនេះ គឺអ្នកទោសដែលបានកែប្រែខ្លួននៅក្នុងពន្ធនាគារ តាមរយៈការវាយតម្លៃពីគណៈកម្មការថ្នាក់ខេត្តដល់ថ្នាក់ជាតិ និងរយៈពេលនៃការអនុវត្តទោសរបស់ពួកគេ។
គួរជំរាបជូនថា កន្លងមកកម្ពុជាមានកម្មវិធីលើកលែង និងបន្ធូរបន្ថយទោសប្រចាំឆ្នាំចំនួន៣ដងប៉ុណ្ណោះ គឺនៅក្នុងពិធីបុណ្យចំរើនព្រះជន្មព្រះមហាក្សត្រ ពិធីបុណ្យអុំទូក និងពិធីបុណ្យពិសាខបូជា។ តែលោក ជិន ម៉ាលីន បានអះអាងថា អំណឹះតទៅ កម្ពុជានឹងបន្ថែមឱកាសពិសេសៗផ្សេងទៀត ដើម្បីស្នើឲ្យមានការលើកលែង និងបន្ធូរបន្ថយទោសដល់ទណ្ឌិត តាមអនុសាសន៍របស់លោកនាយករដ្ឋមន្ត្រី ហ៊ុន សែន ដូចជា នៅពេលខាងមុខនេះ នឹងមានការស្នើសុំលើកលែងទោសដល់ទណ្ឌិតបន្ថែមនៅក្នុងពិធីបុណ្យអុំទូក និងពិធីបុណ្យឯករាជ្យជាតិ ៩ វិច្ឆិកា ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ