ជំនួបរវាងប្រមុខបក្សក្នុងរដ្ឋសភាត្រូវបានអ្នកនាំពាក្យគណបក្សប្រជាជនថា«មានសង្ឃឹម»
នៅថ្ងៃចន្ទនេះ អ្នកនាំពាក្យគណបក្សប្រជាជនកម្ពុជាបានបង្ហាញក្តីសង្ឃឹមថា ជំនួបរវាងថ្នាក់ដឹកនាំនៃគណបក្សកាន់អំណាច និងថ្នាក់ដឹកនាំនៃគណបក្សប្រឆាំង «នឹងអាចមាន» ពេលលោក សម រង្ស៊ី វិលត្រឡប់ពីបរទេសវិញ។ ដំណឹងនេះធ្លាក់មកក្រោយពីប្រធានគណបក្សសង្គ្រោះជាតិបានប្រកាសប្រាប់កាលពីម្សិលមិញ អំពីការធ្វើមាតុភូមិនិវត្តន៍ឱ្យកាន់តែឆាប់ ព្រោះតែ«សារៈសំខាន់ និងភាពចាំបាច់នៃវប្បធម៌សន្ទនា»។
ចុះផ្សាយនៅថ្ងៃ៖ កែប្រែថ្ងៃទី៖
អ្នកនាំពាក្យឱ្យគណបក្សប្រជាជនកម្ពុជា នៅព្រឹកថ្ងៃចន្ទ បានបង្ហាញក្តីសង្ឃឹមថា ជំនួបរវាងថ្នាក់ដឹកនាំនៃគណបក្សកាន់អំណាច និងថ្នាក់ដឹកនាំនៃគណបក្សប្រឆាំងក្នុងរដ្ឋសភាកម្ពុជា «នឹងអាចមាន» ពេលលោក សម រង្ស៊ី វិលត្រឡប់ពីបរទេសវិញ។
លោក សុខ ឥសាន ដែលមិនព្រមបង្ហើបប្រាប់អំពីកម្មវិធី ពេលវេលា និងកម្មវត្ថុនៃជំនួប បានអះអាងថា «គណបក្សទាំងពីរនឹងឯកភាពគ្នាក្នុងការជួបគ្នា ដើម្បីបន្តវប្បធម៌សន្ទនា» ដោយផ្អែកលើអ្វីដែលមន្ត្រីគណបក្សកាន់អំណាចរូបនេះបញ្ជាក់ថា «លិខិតឆ្លើយឆ្លងគ្នា» របស់លោក សម រង្ស៊ី ប្រធានក្រុមតំណាងរាស្ត្រមតិភាគតិច និងរបស់លោក ស ខេង ប្រធានក្រុមតំណាងរាស្ត្រមតិភាគច្រើន។
ប្រធានគណបក្សសង្គ្រោះជាតិបានប្រកាសនៅថ្ងៃអាទិត្យថា នឹងមកដល់កម្ពុជានៅល្ងាចថ្ងៃអង្គារ ទី០៣ ខែតុលា ឆ្នាំ២០១៥។ លោក សម រង្ស៊ី ដែលបានផ្លាស់ប្តូរពេលធ្វើមាតុភូមិនិវត្តន៍ឆាប់ជាងគម្រោងចាស់មួយថ្ងៃ បានផ្ញើលិខិតមួយច្បាប់ជូនលោក ស ខេង កាលពីថ្ងៃទី២៩ ខែតុលា ឆ្នាំ២០១៥ បន្ទាប់ពីតំណាងរាស្ត្រប្រឆាំងពីររូប របួសធ្ងន់ដោយសារការវាយដំរបស់មនុស្សមួយក្រុមនៅក្បែរវិមានរដ្ឋសភា ចំថ្ងៃដែលអ្នកគាំទ្រគណបក្សកាន់អំណាចធ្វើបាតុកម្មទម្លាក់អនុប្រធានគណបក្សសង្គ្រោះជាតិ ពីតំណែងអនុប្រធានទី១នៃរដ្ឋសភាកម្ពុជា។
កម្មវត្ថុនៃលិខិតនោះលើកឡើងអំពី «ការធានានូវសន្តិសុខ និងសុវត្ថិភាពរបស់អ្នកតំណាងរាស្ត្រ ព្រមទាំងការបន្តពង្រឹងវប្បធម៌សន្ទនា ការគោរពសិទ្ធិក្រុមមតិភាគតិច និងការបន្តដំណើរការកំណែទម្រង់ច្បាប់ជាមួយគ្នា រវាងក្រុមការងារនៃគណបក្សប្រជាជនកម្ពុជា និងគណបក្សសង្គ្រោះជាតិ»។
លោក ស ខេង ដែលជាអនុប្រធានគណបក្សប្រជាជនកម្ពុជា និងជាប្រធានក្រុមតំណាងរាស្ត្រមតិភាគច្រើនក្នុងរដ្ឋសភា បានធានានៅក្នុងលិខិតឆ្លើយតប ចុះថ្ងៃទី៣០ ខែតុលា ឆ្នាំ២០១៥ អំពីការបន្តប្រើវប្បធម៌សន្ទនាជាមួយគណបក្សសង្គ្រោះជាតិ ដោយផ្អែកលើកិច្ចព្រមព្រៀងនយោបាយថ្ងៃទី២២ ខែកក្កដា ឆ្នាំ២០១៤ របស់គណបក្សទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ