លោកហ៊ុន សែន ស្នើរឲ្យយកចិត្តទុកដាក់ និងលើកទឹកចិត្ត ចំពោះជនពិការ ដែលមានសមត្ថភាព
លោកនាយករដ្ឋមន្ត្រីហ៊ុន សែន បានថ្លែងស្នើរទៅដល់ក្រសួងអប់រំ យុវជន និងកីឡា និងក្រសួងសង្គមកិច្ច ឲ្យមានការយកចិត្តទុកដាក់បន្ថែម ចំពោះជនពិការ ដែលមានសមត្ថភាព តំណាងជាតិ ក្នុងឆាកអន្តរជាតិ។ លោកនាយករដ្ឋមន្ត្រី បានថ្លែងដូច្នេះ នៅក្នុងពិធីចែកសញ្ញាប័ត្រ ដល់និស្សិតប្រមាណជា ៣ពាន់៥រយនាក់ នៃសកលវិទ្យាល័យភូមិន្ទភ្នំពេញ នៅមជ្ឃមណ្ឌលកោះពេជ្រ នាព្រឹកថ្ងៃអង្គារ ទី១៩ឧសភានេះ។
ចុះផ្សាយនៅថ្ងៃ៖
ស្តាប់ - ០១:៥០
នេះគឺជាការថ្លែង បន្ទាប់ពីមានយុទ្ធជនពិការចំនួន៦នាក់ បានទទួលមេដាយចំនួន១៥ ពីការប្រកួតពានរង្វាន់ព័ត៌មានវិទ្យា សម្រាប់ជនពិការ នៅក្នុងប្រទេសកូរ៉េខាងត្បូង ប៉ុន្តែបែរជាពុំមានការរៀបចំពិធីអបអរសាទរ ចំពោះមោទភាពនេះ។ លោកនាយករដ្ឋមន្ត្រីហ៊ុន សែន បានមានប្រសាសន៍ថា ជនពិការដណ្តើមបានមេដាយជូនជាតិជាច្រើន ប៉ុន្តែពេលមកវិញ បែរជាស្ងាត់ដូចចោរលួចសេះ។
ក្នុងនោះ លោកនាយករដ្ឋមន្ត្រី បានស្នើរដល់ក្រសួងចំនួនពីរ ដែលធ្វើការទាក់ទងនឹងរឿងនេះ គឺក្រសួងអប់រំយុវជន និងកីឡា និងក្រសួងសង្គមកិច្ច ឲ្យមានការយកចិត្តទុកដាក់បន្ថែម និងលើកទឹកចិត្ត ចំពោះជនពិការ ដែលមានសមត្ថភាព ជាតំណាងជាតិ ក្នុងឆាកអន្តរជាតិ តួយ៉ាងដូចជាយុទ្ធជនទាំង៦រូបនេះ។ លោកបានបញ្ជាក់ថា កន្លងមកជនពិការ តែងត្រឡប់មកប្រទេសវិញ ជាមួយនឹងមេដាយជាច្រើន ពីការប្រកួតលក្ខណៈអន្តរជាតិផ្សេងៗ។
ប៉ុន្តែលោកឯម ចន្ទមករា អគ្គលេខាធិការនៃក្រុមប្រឹក្សាសកម្មភាពជនពិការ បានប្រាប់វិទ្យុបារាំង នៅព្រឹកថ្ងៃអង្គារនេះថា ចំពោះយុទ្ធជនពិការទាំង៦រូប ដែលបានទទួលមេដាយជាច្រើន ពីការប្រកួតនៅប្រទេសកូរ៉េខាងត្បូងនេះ ក្រុមប្រឹក្សាសកម្មភាពជនពិការ បាននឹងកំពុងរៀបចំឯកសារ រាយការណ៍ទៅថ្នាក់ដឹកនាំ ដើម្បីលើកទឹកចិត្ត ដល់ពួកគាត់ហើយ។
សូមបញ្ជាក់ថា បើតាមក្រុមប្រឹក្សាសកម្មភាពជនពិការ នេះគឺជាលើកទី២ហើយ ដែលកម្ពុជា បានបញ្ជូនយុទ្ធជនពិការ ទៅចូលរួមនៅក្នុងការប្រកួតដណ្តើមពានរង្វាន់ព័ត៌មានវិទ្យា សម្រាប់ជនពិការ។ កាលពីលើកទី១ ជនពិការ តំណាងកម្ពុជា មិនទាន់ទទួលបានមេដាយអ្វីនោះទេ។ ប៉ុន្តែនៅលើកទី២នេះ កម្ពុជា ទទួលបានមេដាយចំនួន១៥ ដោយក្នុងនោះ រួមមានមេដាយមាស ចំនួន៧ ប្រាក់ចំនួន៧ និងសំរិទ្ធចំនួន១។ យុទ្ធពិការទាំង៦រូប ដែលបានទៅចូលរួមក្នុងកម្មវិធីនោះ គឺត្រូវបានប្រឡងជ្រើសរើស ក្នុងចំណោមយុទ្ធពិការចំនួន១៨នាក់ នៅទូទាំងប្រទេសកម្ពុជា ជាមុនសិន។ ការប្រកួតប្រជែង នៅក្នុងប្រទេសកូរ៉េខាងត្បូងនោះ មានជនពិការ ពីប្រទេសសមាជិកអាស៊ាន និងកូរ៉េ ចូលរួម សរុបប្រមាណ ២៧០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ