មន្ត្រីសិទ្ធិមនុស្សស្នើឲ្យមានការស៊ើបអង្កេតរកយុត្តិធម៌លើអាយ៉ៃឆ្លើយឆ្លងរវាងប៉ូលិសនិងតុលាការ
ប៉ូលិសចោទតុលាការថាបានដោះលែងជនសង្ស័យមុខសញ្ញគ្រឿងញៀនចំនួន២៥នាក់ ខណៈដែល ប្រមុខរដ្ឋាភិបាល រដ្ឋមន្ត្រីក្រសួងមហាផ្ទៃ និងអាជ្ញាធរជាតិប្រយុទ្ធគ្រឿងញៀន កាលពីពេលថ្មីៗនេះ ជម្រុញឲ្យមានការបង្ក្រាបគ្រឿងញៀនឲ្យកាន់តែសកម្ម។ ក៏ប៉ុន្តែមន្ត្រីតុលាការបានពន្យល់តបវិញថា ការដោះលែងមុខសញ្ញាគ្រឿងញៀនគឺធ្វើឡើងទៅតាមច្បាប់កំណត់។
ចុះផ្សាយនៅថ្ងៃ៖
ស្តាប់ - ០២:១៥
ព្រះរាជអាជ្ញារងសាលាដំបូងរាជធានីភ្នំពេញលោក អ៊ុំ សុភក្តី នៅថ្ងៃទី០៣ កុម្ភៈ ឆ្នាំ២០១៦ បានធ្វើការបំភ្លឺទៅនឹងការចោទប្រកាន់របស់ប៉ូលិស ដែលថាលោកបានដោះលែងមុខសញ្ញាគ្រឿងញៀនចំនួន២៥នាក់។
ការបំភ្លឺរបស់ព្រះរាជអាជ្ញារងនៅពេលនេះ បានធ្វើឡើងបន្ទាប់ពី មន្ត្រីប៉ូលិសនៅរាជធានីភ្នំពេញបញ្ចេញប្រតិកម្មតាមរយៈប្រព័ន្ធផ្សព្វផ្សាយក្នុងស្រុកកាលពីម្សិលមិញថា សមត្ថកិច្ចប៉ូលិសខិតខំតាមចាប់មុខសញ្ញាគ្រឿងញៀន គ្មានដេកពួន តែពេលបញ្ជូនទៅតុលាការ ស្រាប់តែដោះលែង គ្មានការគិតគូរពីភាពនឿយហត់របស់សមត្ថកិច្ចឡើយ។ ប៉ូលិសក៏បានស្រែករកភាពយុត្តិធម៌ ដោយមិនបារម្ភពីការដកដំណែងអ្វីឡើយ។
ប្រឈមនឹងការរិះគន់ខ្លាំងៗពីប៉ូលិសបង្ក្រាបគ្រឿងញៀនក្រុងភ្នំពេញដូច្នេះ ទើបលោកព្រះរាជាអាជ្ញារង អ៊ុំ សុភក្តី ដែលកាន់សំណុំរឿងនេះ សរសេររៀបរាប់ពីទិដ្ឋភាពច្បាប់ ដែលមាន៥ចំណុច។ ចំណុចសំខាន់ៗទាំងនោះគឺ លោកព្រះរាជអាជ្ញាបានលើកយកមាត្រាច្បាប់ស្តីពីការត្រួតពិនិត្យគ្រឿងញៀន និងក្រមនីតិវិធីព្រហ្មទណ្ឌមួយចំនួនមកបរិយាយ។
មាត្រា២០៤នៃក្រមនីតិវិធីព្រហ្មទណ្ឌបានចែងថា ការឃុំខ្លួនបណ្តោះអាសន្នបុគ្គលណាម្នាក់អាចនឹងអនុវត្តបានតែក្នុងករណីចោទប្រកាន់ពីបទឧក្រិដ្ឋ ឬបទមជ្ឈឹម ដែលច្បាប់កំណត់ឲ្យផ្តន្ទាទោសដាក់ពន្ធនាគារស្មើ ឬលើសពី០១ឆ្នាំតែប៉ុណ្ណោះ។ ដូចនេះជាទូទៅបទល្មើសប្រើប្រាស់ ដោយខុសច្បាប់នូវសារធាតុញៀន មិនអាចជាកម្មវត្ថុនៃការឃុំខ្លួនបណ្តោះអាសន្នបានឡើយ។ នេះបើតាមលោក អ៊ុំ សុភក្តី។ លោកបន្ថែមថា ច្បាប់ស្តីពីការត្រួតពិនិត្យគ្រឿងញៀន បានចាត់ទុកអ្នកប្រើប្រាស់គ្រឿងញៀន គឺជាជនរងគ្រោះនៃគ្រឿងញៀនផងដែរ។
ជាទូទៅមន្ត្រីតុលាការតែងរងការិះគន់ពីសាធារណជន និងសមត្ថកិច្ចពីភាពមិនប្រក្រតីជាយូរមកហើយដូចជាការដោះលែងជនល្មើសជាដើម។ ក៏ប៉ុន្តែនៅក្នុងដំណាក់កាលកំណែទម្រង់ប្រព័ន្ធយុត្តិធម៌នៅពេលនេះ លោក អំ សំអាត មន្ត្រីស៊ើបអង្កេតជាន់ខ្ពស់អង្គការការពារសិទ្ធិមនុស្សលីកាដូរ យល់ថាឧត្តមក្រុមប្រឹក្សានៃអង្គចៅក្រមគួរតែបើកការស៊ើបអង្កេតលើបញ្ហានេះ ដើម្បរកឲ្យឃើញពិតប្រាកដពីមូលហេតុចៀសវាងការឆ្លើយដាក់គ្នា និងជាឱកាសវែកមុខអ្នកប្រព្រឹត្តិខុសឆ្គងរបស់មន្ត្រីយុត្តិធម៌ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ