លោកហ៊ុន សែនប្រកាសបន្តទទួលយកពលរដ្ឋខ្មែរដែលអាមេរិកបណ្តេញចេញឡើងវិញ
លោកនាយករដ្ឋមន្រ្តីហ៊ុន សែន នៅព្រឹកនេះ បានប្រកាសបន្តទទួលយកពលរដ្ឋខ្មែរដែលបានប្រព្រឹត្តបទល្មើសហើយត្រូវអាមេរិកបណ្តេញចេញពីប្រទេសឡើងវិញ បន្ទាប់ពីបានស្នើផ្អាកមួយរយៈនាពេលកន្លងមក។ ជាមួយគ្នានេះ លោកហ៊ុន សែន ក៏បានបញ្ជាឲ្យត្រៀមទទួលយកពលរដ្ឋខ្មែរផ្សេងទៀតដែលលោកគិតថា នឹងត្រូវបណ្តេញចេញពីអាមេរិកក្រោមគោលនយោបាយថ្មីរបស់លោកដូណាល់ ត្រាំផងដែរ។ សម្រាប់លោកហ៊ុន សែន នៅពេលបញ្ចូនពួកគេមកកម្ពុជាវិញ អាមេរិកគួរគិតគូរផ្តល់ជំនួយដល់ពួកគេ ដើម្បីអាចឲ្យពួកគេកសាងជីវភាពថ្មីបាន។
ចុះផ្សាយនៅថ្ងៃ៖
ស្តាប់ - ០២:១៥
ការប្រកាសទទួលយកពលរដ្ឋខ្មែរពីអាមេរិករបស់ប្រមុខរដ្ឋាភិបាលកម្ពុជានៅពេលនេះធ្វើឡើងក្នុងន័យពីរ គឺទីមួយលោកនាយករដ្ឋមន្រ្តីហ៊ុន សែន សំដៅឲ្យបន្តអនុវត្តតាមកិច្ចព្រមព្រៀងឆ្នាំ២០០២ ស្ដីពីការទទួលពលរដ្ឋកម្ពុជាដែលប្រព្រឹត្តបទឧក្រិដ្ឋនៅអាមេរិកឲ្យត្រឡប់មកប្រទេសវិញ។ ការបន្តអនុវត្តនេះ គឺបន្ទាប់ពីកម្ពុជាបានស្នើផ្អាកមួយរយៈកាលពីឆ្នាំ២០១៦។ ក្រោយការស្នើផ្អាកនេះ អាមេរិកក៏បានប្រកាសដាក់ទណ្ឌកម្មលើកម្ពុជាដោយផ្អាកចេញទិដ្ឋាការប្រភេទខ្លះដល់មន្ត្រីមួយចំនួននៃក្រសួងការបរទេសកម្ពុជាក្នុងការធ្វើដំណើរទៅកាន់អាមេរិក។
ចំណែកក្នុងន័យទីពីរ គឺលោកនាយករដ្ឋមន្រ្តីបញ្ហាឲ្យត្រៀមទទួលយកពលរដ្ឋខ្មែរដែលបានទៅរស់នៅអាមេរិកក្រោយឆ្នាំ១៩៩៤ ដែលលោកជឿថា រដ្ឋបាលអាមេរិកាំងថ្មីអាចនឹងបញ្ជូនពួកគេមកប្រទេសកំណើតវិញនៅពេលខាងមុខ។ ការសន្មត់នេះ គឺបន្ទាប់ពីលោកនាយករដ្ឋមន្រ្តីទទួលបានដំណឹងនេះពីស្ថានទូតអាមេរិកប្រចាំកម្ពុជា ហើយមួយវិញទៀត លោកអះអាងថា ពេលនេះអាមេរិកកំពុងតែដកខ្លួនចេញពីអង្គការអន្តោប្រវេសន៍អន្តរជាតិទៀត។ ត្រង់ចំណុចនេះ លោកនាយករដ្ឋមន្រ្តីបារម្ភខ្លាចពលរដ្ឋខ្មែរទាំងនោះ ត្រូវអាមេរិកបំបរបង់ឲ្យរស់នៅលើបណ្តាកោះដូចករណីរបស់ប្រទេសអូស្រ្តាលី។ ហេតុនេះ ដើម្បីបញ្ជៀសបញ្ហានេះ លោកនាយករដ្ឋមន្រ្តីបានបញ្ជាឲ្យត្រៀមខ្លួន ដើម្បីទទួលយកប្រជាពលរដ្ឋខ្មែរទាំងនោះតែម្តង។
ជាមួយនឹងការប្រកាសដូចនេះ លោកប្រមុខរដ្ឋាភិបាលក្រុងភ្នំពេញ ក៏បានបញ្ជាឲ្យក្រសួងមហាផ្ទៃ ក្រសួងការបរទេស និងស្ថាប័នពាក់ព័ន្ធដទៃទៀតធ្វើការចរចាជាមួយអាមេរិកក្នុងករណីដឹកជញ្ជូនពលរដ្ឋខ្មែរមកវិញ និងការផ្គត់ផ្គង់ជីវភាពពួកគេ។ លោកហ៊ុន សែន ក៏បានស្នើអាមេរិកពិចារណាផ្តល់ជំនួយក្នុងកម្រិតណាមួយ ដើម្បីឲ្យពលរដ្ឋខ្មែរអាចរស់នៅបានក្នុងប្រទេសកម្ពុជាក្នុងពេលពួកគេត្រូវបញ្ជូនមកក្នុងដំណាក់កាលដំបូងៗ។
សូមបញ្ជាក់ថា គិតមកដល់នេះ រដ្ឋបាលអាមេរិកាំងបានបញ្ជូនប្រជាពលរដ្ឋខ្មែរដែលបានប្រព្រឹត្តបទល្មើស និងបានទទួលទោសរួចមកកាន់ប្រទេសកម្ពុជាចំនួនជាង៦០០នាក់ហើយ។ ជាមួយការបញ្ចូននេះហើយគួបផ្សំនឹងដំណឹងថា អាមេរិកចង់បណ្តេញពលរដ្ឋខ្មែរដែលទៅរស់នៅអាមេរិកក្រោយឆ្នាំ១៩៩៤ទៀតនោះ លោកនាយករដ្ឋមន្រ្តីហ៊ុន សែន ក៏បានផ្តាំទៅពលរដ្ឋខ្មែរកុំឲ្យប្រថុយប្រថានចង់ទៅរស់នៅសហរដ្ឋអាមេរិកទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ