សម្តេចម៉ែ៖ ថវិកាសាងសង់អាគារ"ព្រះសីហនុរាជ"បានពីតង្វាយសប្បរសជនចំពោះព្រះបរមរតនៈកោដ្ឋ
នៅព្រឹកថ្ងៃព្រហស្បតិ៍នេះ មណ្ឌលព្យាបាលមនុស្សចាស់ "ព្រះសីហនុរាជ"ត្រូវបានបើកសម្ពោធដាក់ឲ្យប្រើប្រាស់ជាផ្លូវការក្រោមព្រះរាជាធិបតីភាពព្រះមហាក្សត្រ សម្តេច ព្រះបរមនាថ នរោត្តម សីហមុនីនិងសម្តេចម៉ែ។ មណ្ឌលព្យាបាលនេះ បានសាងសង់ដោយចំណាយថវិកាអស់ប្រមាណ៣លានដុល្លារ ។ សមេ្តចម៉ែ បានមានព្រះរាជបន្ទូលថា ថវិកាសាងសង់ទាំងនេះ បានមកពីតង្វាយរបស់សប្បរសជនចំពោះព្រះបរមរតនៈកោដ្ឋ នរោត្តម សីហនុ។
ចុះផ្សាយនៅថ្ងៃ៖
ស្តាប់ - ០១:៥៦
ថវិកាដែលបានចំណាយលើការសាងសង់អាគារព្យាបាលមនុស្សចាស់"ព្រះសីហនុរាជ" គឺបានមកពីព្រះមហាក្សត្រ និង តង្វាយរបស់សប្បរសជនជាតិ និងអន្តរជាតិ ដែលបានចូលជាវិភាគទានក្នុងឱកាសប្រារព្ធព្រះរាជពិធីបុណ្យថ្វាយព្រះបរមរតនៈកោដ្ឋព្រះករុណា ព្រះបាទ នរោត្តម សីហនុនាពេលកន្លងមក និង ជាបន្តបន្ទាន់។ នេះ គឺជាព្រះរាជបន្ទូលបញ្ជាក់របស់សម្តេចម៉ែនៅក្នុងនៅក្នុងព្រះរាជពិធីសម្ពោធបើកឲ្យប្រើប្រាស់នូវមណ្ឌលព្យាបាលមនុស្សចាស់នៅព្រឹកថ្ងៃព្រហស្បតិ៍នេះ។
លោកអ៊ំ ដារ៉ាវុធ មន្ត្រីខុន្ទកាល័យព្រះមហាក្សត្រ បានបញ្ជាក់បន្ថែមថា ថវិកាទាំង៣លានដុល្លារនោះ គឺ បានមកពីលោកនាយករដ្ឋមន្ត្រីហ៊ុន សែន ច្រើនជាងគេ គឺប្រមាណជាង១លាន៤សែនដុល្លារ និង ថវិការបស់រដ្ឋាភិបាលចិនថ្វាយដល់ព្រះបរមរតនៈកោដ្ឋដែលមានប្រមាណ៥០ម៉ឺនដុល្លារ។
សម្តេចម៉ែ នរោត្តម មុនីនាថ សីហនុ បានមានព្រះរាជបន្ទូលថា ការកសាងមណ្ឌលនេះឡើង គឺដើម្បីជាការរំលឹកនូវព្រះរាជគុណូប្បការៈដ៏ធំធេងរបស់ព្រះបរមរតនៈកោដ្ឋ នរោត្តម សីហនុ ដែលកាលទ្រង់នៅគង់ព្រះជន្ន ព្រះអង្គបានកសាងសមិទ្ធផលជាច្រើនផ្នែកសុខាភិបាល ដើម្បីថែទាំ និងព្យាបាលសុខភាពប្រជាពលរដ្ឋខ្មែរគ្រប់ស្រទាប់វណ្ណៈ។ សម្តេចម៉ែ មានព្រះរាជបន្ទូលទៀតថា អាគារមណ្ឌលព្យាបាលមនុស្សចាស់ “ព្រះសីហនុរាជ” នឹងជួយសម្រាលសេចក្តីទុក្ខលំបាករបស់ប្រជាពលរដ្ឋខ្មែរ និងជាការអភិវឌ្ឍផ្នែកវិស័យសុខាភិបាលផងដែរ។
មណ្ឌលព្យាបាល “ព្រះសីហនុរាជ” គឺជាមណ្ឌលព្យាបាលមនុស្សចាស់មិនគិតថ្លៃដំបូងបំផុតនៅក្នុងប្រទេសកម្ពុជា។ អាគារមណ្ឌលនេះ បានចាប់ផ្តើមសាងសង់កាលពីឆ្នាំ ២០១៤ នៅក្នុងមន្ទីរពេទ្យមិត្តភាពកម្ពុជា-សូវៀត ឫពេទ្យរុស្ស៊ី ។ អាគារមណ្ឌលព្យាបាលមនុស្សចាស់ “ព្រះសីហនុរាជ” មាន៤ជាន់រួមបញ្ចូល ទាំងជាន់ផ្ទាល់ដី ដែលសាងសង់នៅលើផ្ទៃដីចំនួន៥.០៤៨ម៉ែត្រក្រឡា និងមានចំណុះគ្រែចំនួន៥១។ គ្រប់គ្រែទាំងអស់សុទ្ធតែមានបំពាក់ប្រព័ន្ធអុកស៊ីសែន ប្រព័ន្ធបឺតបំពង់ដង្ហើម និងមានរានហាលនៅខាងមុខគ្រប់បន្ទប់ទៀតផង។ ចំណែកនៅក្នុងបន្ទប់សម្រាករបស់អ្នកជំងឺវិញ ក៏មានបន្ទប់ទឹកពីមួយទៅពីរ ឫបីកន្លែង និងមានកន្លែងសម្រាប់អ្នកកំដរអ្នកជំងឺសម្រាកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ