លោក ហង្ស ពុទ្ធា៖ ករណីឈ្មោះស្ទួន នឹងមិនកើតក្នុងបញ្ជីបោះឆ្នោតផ្លូវការតទៀតទេ
ចុះផ្សាយនៅថ្ងៃ៖
ស្តាប់ - ១២:៤៣
នៅថ្ងៃអង្គារនេះ គណៈកម្មាធិការជាតិរៀបចំការបោះឆ្នោត (គជប) បានសម្រេច ពន្យាថ្ងៃចុះឈ្មោះ ១ថ្ងៃទៀត បន្ថែមទៅលើ ថ្ងៃចុះឈ្មោះបោះឆ្នោត ចុងក្រោយ តាមប្រតិទិន។ ការចុះឈ្មោះអ្នកបោះឆ្នោតតាមប្រព័ន្ធកុំព្យូទ័រថ្មី នឹងធានាគុណភាពបញ្ជីឈ្មោះបោះឆ្នោតល្អប្រសើរជាងមុន។ ភ្ញៀវប្រចាំថ្ងៃ របស់វិទ្យុបារាំងអន្តរជាតិ នៅរាត្រីនេះ គឺលោក ហង្ស ពុទ្ធា អ្នកនាំពាក្យ គជប។ លោក ហង្ស ពុទ្ធា បានសង្កត់ធ្ងន់ថា បន្ទាប់ពីដំណាក់កាលចុះឈ្មោះអ្នកបោះឆ្នោតឆ្នាំ ២០១៦ នឹងបញ្ចប់ នៅត្រឹមថ្ងៃពុធ ទី៣០ ខែវិច្ឆិកា វេលាម៉ោង ៥នឹង៣០នាទី ថ្ងៃបិទផ្សាយ បញ្ជីបោះឆ្នោតដំបូង គឺថ្ងៃទី៣ ខែមករា ឆ្នាំ២០១៧ រឹតតែសំខាន់ថែមទៀត។ សំខាន់ដោយសារ ពលរដ្ឋ អាចតវ៉ា ឬក៏ជំទាស់នឹងឈ្មោះអ្នកបោះឆ្នោតណាមួយ ដែលមិនគួរមានឈ្មោះក្នុងបញ្ជីផ្លូវការ។ ហើយការចួលរួមរបស់ ប្រជាពលរដ្ឋ ដើម្បីពិនិត្យឈ្មោះរបស់ខ្លួន និងពិនិត្យឈ្មោះដែលត្រូវលុប នឹងជួយកសាង បញ្ជីមួយដែលមានភាពស្អាតស្អំ គ្មានករណីឈ្មោះស្ទួន។ លោក ហង្ស ពុទ្ធា បានបញ្ជាក់ថា ឈ្មោះរបស់អ្នកចុះឈ្មោះ ក៏អាចផ្ទៀតផ្ទាត់តាមគេហទំព័ររបស់ គជប ផងដែរ នៅដំណាក់កាលបិទផ្សាយបញ្ជីដំបូង។