រដ្ឋាភិបាលកម្ពុជាមិនពេញចិត្តការជំរុញរបស់លោកស្រី វាន់ ហេលី ឲ្យពន្យល់ករណីលោក សម រង្ស៊ី
រដ្ឋាភិបាលកម្ពុជាតាមរយៈក្រសួងការបរទេសបានសម្ដែងការមិនពេញ ចិត្តជុំវិញការលើកឡើងរបស់លោកស្រី វាន់ ហេលី តំណាងការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិ កម្ពុជានៅក្នុងកាសែតខេមបូឌាដេលីកាលពីថ្ងៃទី២៥ តុលា។ មិនពេញចិត្តដោយសារ លោកស្រី វាន់ ហេលី បានទាមទារឲ្យរដ្ឋាភិបាលពន្យល់ជាបន្ទាន់ករណីមិនឲ្យលោក សម រង្ស៊ី វិលចូលស្រុកវិញ។
ចុះផ្សាយនៅថ្ងៃ៖
ស្តាប់ - ០២:១៨
ក្រសួងការបរទេសកម្ពុជាបានហៅការទាមទាររបស់លោកស្រី វាន់ ហេលី តំណាងការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិកម្ពុជាជាការជ្រៀតជ្រែកកិច្ចការផ្ទៃក្នុងរបស់កម្ពុជា។ ក្រសួងការបរទេសក៏បានចាត់ទុកការលើកឡើងរបស់លោកស្រី វាន់ ហេលី ជាការសម្ដែងនូវទស្សនៈលំអៀង។
លោក ប្រាក់ សុខុន រដ្ឋមន្ត្រីក្រសួងការបរទេសបានមានប្រសាសន៍នៅក្នុងសេចក្ដីថ្លែងការណ៍ចុះនៅថ្ងៃទី៤វិច្ឆិកាថា ការអធិប្បាយរបស់លោកស្រី វាន់ ហេលី បានធ្វើហួសពីដែនកំណត់នៃរដ្ឋធម្មនុញ្ញអង្គការសហប្រជាជាតិមាត្រា២កថាខណ្ឌ៧ដែលបញ្ជាក់ពីការគោរពអធិបតេយ្យនិងការមិនជ្រៀតជ្រែកកិច្ចការផ្ទៃក្នុងនៃប្រទេសសមាជិកនិងអនុសញ្ញាទីក្រុងវ្យែនស្ដីពីទំនាក់ទំនងការទូតឆ្នាំ១៩៦១។ បើតាមលោក ប្រាក់ សុខុន រាល់ទំនាក់ទំនងផ្លូវការជាមួយនឹងរដ្ឋាភិបាលត្រូវធ្វើតាមរយៈក្រសួងការបរទេសឬស្ថាប័នផ្សេងៗពុំមែនតាមប្រព័ន្ធសារព័ត៌មាននោះទេ។
តែយ៉ាងណាមិញនៅក្នុងសេចក្ដីថ្លែងការណ៍នេះរដ្ឋាភិបាលកម្ពុជាបានបង្ហាញជំហរជាថ្មីក្នុងការកែលម្អកិច្ចសហប្រតិបត្តិការឲ្យមានភាពរលូននិងមានប្រសិទ្ធិភាពថែមទៀតជាមួយការិយាល័យឧត្តមស្នងការសិទ្ធិមនុស្សអង្គការសហប្រជាជាតិ តាមរយៈការបញ្ចប់កិច្ចចរចាអំពីអនុស្សារណៈនៃការយោគយល់ថ្មីឲ្យបានឆាប់ដោយឈរលើគោលការណ៍នៃការគោរពអធិបតេយ្យនិងការមិនជ្រៀតជ្រែកកិច្ចការផ្ទៃក្នុងកម្ពុជា។
សូមបញ្ជាក់ថា អគ្គនាយកនៃអគ្គនាយកដ្ឋានអន្តោប្រវេសន៍ បង្គាប់ឲ្យ អគ្គនាយក និង និង នាយកដ្ឋានទាំងអស់ត្រូវយកចិត្តទុកដាក់ ពង្រឹងការត្រួតពិនិត្យ នៅតាមច្រកទ្វារអាកាសយានដ្ឋានទាំងបី នៅភ្នំពេញ សៀមរាប និង ក្រុងព្រះសីហនុ ក៏ដូចជា នៅតាមប៉ុស្តិ៍ច្រកទ្វារព្រំដែនអន្តរជាតិ នានា និង រាយការណ៍ជាបន្ទាន់ក្នុងករណី លោក សម រង្ស៊ី ចាកចេញផុតពីយន្តហោះ តាមច្រកសំខាន់ទាំងនោះ។
លិខិតរបស់អគ្គនាយកដ្ឋានអន្តោប្រវេសន៍ ធ្វើឡើងបន្ទាប់ពីទទួលបានលិខិតពីទីស្តីការគណៈរដ្ឋមន្រ្តី ស្នើសុំអន្តរាគមន៍ពីអគ្គនាយកដ្ឋានអន្តោប្រវេសន៍ ដើម្បីចាត់វិធានការបង្ការទុកមុន ចំពោះការប៉ុនប៉ងណាមួយ ពីប្រធានគណបក្សសង្គ្រោះជាតិ ដែលចង់វិលមកកម្ពុជាវិញ។
កន្លងមកមន្ត្រីជាន់ខ្ពស់នៃទីស្ដីការគណៈរដ្ឋមន្ត្រីធ្លាប់បានលើកឡើងថា មូលហេតុដែលរដ្ឋាភិបាលទប់ស្កាត់លោក សម រង្ស៊ី មិនឲ្យចូលស្រុកដើម្បីការសុវត្ថិភាពព្រលានយន្តហោះព្រោះបើថាកាលណាលោកសម រង្ស៊ីអញ្ជើញមកនោះអ្នកគាំទ្ររបស់លោកនឹងសម្រុកទៅទទួលអាចធ្វើឲ្យប៉ះពាល់ដល់ព្រលានយន្តហោះដែលមានតម្លៃរាប់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ