GMAC ប្ដេជ្ញាចិត្តបន្តប្រយុទ្ធប្រឆាំងពលកម្មកុមារ
ដើម្បីអបអរទិវាកុមារអន្ដរជាតិ ០១មិថុនា សមាគមរោងចក្រកាត់ដេរកម្ពុជា ហៅកាត់ថា GMAC បានបង្ហាញពីមោទនភាពរបស់ខ្លួន ក្នុងការសហការ ដើម្បីលុបបំបាត់ពលកម្មកុមារឲ្យអស់ ពីវិស័យកាត់ដេរកម្ពុជា។ ពលកម្មកុមារនៅក្នុងវិស័យកាត់ដេរកម្ពុជា ដែលបើតាម GMAC គឺមានការថយចុះក្នុងរយៈពេលប៉ុន្មានឆ្នាំចុងក្រោយនេះ។ ជាមួយគ្នានេះ GMAC ក៏បានប្ដេជ្ញាចិត្ត និងអំពាវនាវឲ្យមានការចូលរួមប្រយុទ្ធប្រឆាំងពលកម្មកុមារ ពីគ្រប់ភាគីពាក់ព័ន្ធទាំងអស់ផងដែរ។
ចុះផ្សាយនៅថ្ងៃ៖
ស្តាប់ - ០២:០៤
សមាគមរោងចក្រកាត់ដេរកម្ពុជា ហៅកាត់ថា GMAC បានកត់សម្គាល់ឃើញថា ពលកម្មកុមារនៅក្នុងប្រទេសកម្ពុជាមានការថយចុះ នៅក្នុងរយៈពេលប៉ុន្មានឆ្នាំចុងក្រោយនេះ។ GMAC បានលើកឡើងពីការត្រួតពិនិត្យរបស់អង្គការពលកម្មអន្ដរជាតិ ILO នៅឆ្នាំ២០១៤ ដែលរកឃើញថា មានកម្មករមិនទាន់គ្រប់អាយុចំនួន៣៤នាក់ នៅក្នុងរោងចក្រចំនួន១៥កន្លែង។ ចំនួននេះបានធ្លាក់ចុះពី៦៧នាក់ នៅក្នុងរោងចក្រចំនួន២៤កន្លែង កាលពីឆ្នាំ២០១៣។
បើទោះបីជាមានមោទនភាពចំពោះការបោះជំហានទៅមុខ ក្នុងការលុបបំបាត់ពលកម្មកុមារ នៅក្នុងឧស្សាហកម្មសម្លៀកបំពាក់ និងស្បែកជើងនៅកម្ពុជាក៏ដោយ ក៏ GMAC បានទទួលស្គាល់ថា មានការងារបន្ថែមទៀតដែលត្រូវធ្វើ។ ក្នុងនោះ GMAC បានក្រើនរំលឹកដល់រោងចក្រជាសមាជិករបស់ខ្លួន ឲ្យចាត់វិធានការតាមដែលអាចធ្វើបាន ដើម្បីធានាដល់ការគោរពច្បាប់។ ច្បាប់ស្ដីពីការងាររបស់កម្ពុជា ដែលចែងថា ការទទួលយកកម្មករដែលមានអាយុក្រោម១៥ឆ្នាំមកធ្វើការ គឺជាអំពើខុសច្បាប់។
GMAC ក៏បានអំពាវនាវឲ្យរោងចក្រជាសមាជិករបស់ខ្លួន បង្កើនការប្រុងប្រយ័ត្នក្នុងការជ្រើសរើសយកកម្មករមកធ្វើការ ព្រោះបើតាមការរកឃើញរបស់អង្គការ ILO ក្នុងករណីភាគច្រើន កម្មករបានកុហក តាមរយៈការប្រើប្រាស់ឯកសារក្លែងបន្លំ ឬគូសលុបប្ដូរ ឬក្លែងឯកសារអ្នកដទៃដែលមានអាយុច្រើនជាងខ្លួន ធ្វើយ៉ាងណាដើម្បីទទួលបានការងារធ្វើ។
សមាគមរោងចក្រកាត់ដេរកម្ពុជា ហៅកាត់ថា GMAC ក៏បានប្ដេជ្ញាចិត្ត ក្នុងការបន្តប្រយុទ្ធប្រឆាំងពលកម្មកុមារឲ្យអស់ ពីវិស័យកាត់ដេរកម្ពុជា។ ប៉ុន្តែបើតាមសមាគមនេះ រោងចក្រតែម្នាក់ឯង មិនអាចទទួលជោគជ័យ ក្នុងការលុបបំបាត់ពលកម្មកុមារបានឡើយ។ វាត្រូវការកិច្ចខិតខំប្រឹងប្រែងរួមគ្នា ពីមនុស្សគ្រប់រូប និងគ្រប់ស្ថាប័នដែលពាក់ព័ន្ធទាំងអស់ រាប់តាំងពីរដ្ឋាភិបាល អង្គការ ILO សង្គមស៊ីវិល និងកម្មករខ្លួនឯងផ្ទាល់ ដើម្បីធានាថា កុមារអាចបន្តការសិក្សានៅសាលារៀន មិនមែនចូលធ្វើការនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ