ក្រុមហ៊ុនប្រេងឥន្ធនៈយល់ព្រមបញ្ចុះតម្លៃតាមទីផ្សារអន្តរជាតិ
ក្រុមហ៊ុនប្រេងឥន្ធនៈភាគច្រើន បានយល់ព្រមតាមការស្នើសុំ របស់ក្រសួងពាណិជ្ជកម្ម ឲ្យពិចារណាលើលទ្ធភាពក្នុងការបញ្ចុះតម្លៃប្រេងឥន្ធនៈ ដែលមានលក្ខណៈរលាស់ ទាន់ពេលវេលា និងឆ្លើយតបនឹងទីផ្សារនាំចូលប្រេងឆ្អិន។ ការឆ្លើយតបនេះ បន្ទាប់ពីជំនួបរវាង ក្រសួងពាណិជ្ជកម្ម ក្រសួងរ៉ែ និងថាមពល ក្រសួងសេដ្ឋកិច្ច និងតំណាងក្រុមហ៊ុនប្រេងឥន្ធនៈនៅកម្ពុជា កាលពីថ្ងៃ ទី ៣ កញ្ញា កន្លងទៅនេះ។
ចុះផ្សាយនៅថ្ងៃ៖
ស្តាប់ - ០២:២០
ក្រុមហ៊ុនប្រេងឥន្ធនៈភាគច្រើន បានឆ្លើយតបជាវិជ្ជមានតាមសំណើររបស់ក្រសួងពាណិជ្ជកម្ម កម្ពុជា អំពីលទ្ធភាពនៃការបញ្ចុះតម្លៃប្រេងឥន្ធនៈ ដែលមានលក្ខណៈរលាស់ ទាន់ពេលវេលា និងបានឆ្លើយតបនឹងតម្លៃទីផ្សារក្នុងការនាំយកប្រេងឆ្អិនមកកាន់ទីផ្សារកម្ពុជា។
បើទោះជាមានការយល់ព្រមបញ្ចុះតម្លៃប្រេងឥន្ធនៈ ឲ្យសមស្របទៅតាមទីផ្សារដែលខ្លួននាំចូលមកក្តី ក៏ប៉ុន្តែក្រុមហ៊ុនប្រេងឥន្ធនៈទាំងនោះ មិនបានបញ្ជាក់អំពីតួរលេខពិតប្រាកដនៃតម្លៃប្រេងដែលពួកគេនឹងបញ្ចុះតម្លៃនៅឡើយទេ។ នេះបើតាមការបញ្ជាក់ពី លោក កែន រដ្ឋា អ្នកនាំពាក្យក្រសួងពាណិជ្ជកម្ម។
យ៉ាងណាក៏ដោយ អ្នកនាំពាក្យក្រសួងពាណិជ្ជកម្មរូបនេះបញ្ជាក់ថា ក្រសួងនឹងបន្តត្រួតពិនិត្យមើល នូវការកំណត់តម្លៃប្រេងឥន្ធនៈរបស់ក្រុមហ៊ុនទាំងនោះ ថាតើក្រុមហ៊ុនទាំងនោះ បានអនុវត្តន៍ដូចអ្វីដែល ពួកគេបានយល់ព្រមទៅនឹងសំណើររបស់ក្រសួងពាណិជ្ជកម្មឬទេ។ មិនតែប៉ុណ្ណោះក្រសួង ក៏នឹងមានយន្តការបន្ថែមទៀត ប្រសិនបើបណ្តាក្រុមហ៊ុននោះមិនបានអនុវត្តន៍ដូចអ្វីដែលខ្លួនបានសន្យា។
ទោះបីជាយ៉ាងណាក៏ដោយ នៅក្នុងចំណោមក្រុមហ៊ុនប្រេងឥន្ធនៈធំៗ ក៏មានក្រុមហ៊ុនមួយចំនួនតូចមិនទាន់បានធ្វើការឆ្លើយតបទៅនឹងអ្វីដែលក្រសួងពាណិជ្ជកម្មបានស្នើរសុំនៅឡើយទេ។
អ្នកនាំពាក្យដដែល បានគូសបញ្ជាក់ថា ក្រសួងពាណិជ្ជកម្ម ក៏នឹងមានគម្រោងបើកកិច្ចប្រជុំបន្ថែមទៀតដែរ ជាមួយនឹងតំណាងក្រុមហ៊ុនប្រេងឥន្ធនៈដែលកំពុងប្រតិបត្តិការណ៍នៅកម្ពុជា ប្រសិនបើការអនុវត្តនៃការកំណត់តម្លៃប្រេងឥន្ធនៈ មិនទទួលបាននូវប្រសិទ្ធិភាព។
ជាការកត់សម្គាល់ តម្លៃប្រេងសាំងជាមធ្យមនៅតាមបណ្តាស្ថានីយ៍ប្រេងឥន្ធនៈនានានៅកម្ពុជាមានតម្លៃចន្លោះពី ៣៨០០ រយ រៀល ទៅ ៤១០០ រយរៀល ក្នុងមួយលីត្រសម្រាប់សាំងធម្មតា។
គួរជម្រាបជូនថា កាលពីថ្ងៃទី ៣ កញ្ញា ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ និង ក្រសួងរ៉ែនិងថាមពល បានបើកកិច្ចប្រជុំជាមួយនឹងតំណាងក្រុមហ៊ុនប្រេងឥន្ធនៈ ស្តីពីស្ថានភាពថ្លៃប្រេងឥន្ធនៈបច្ចុប្បន្ន ទាក់ទងនឹងទីផ្សារពិភពលោក និងថ្លៃនាំចូលពីប្រទេសសឹង្ហបុរី។ ជាកិច្ចប្រជុំ ដើម្បីបន្តពិនិត្យ និងពិភាក្សាឡើងវិញ អំពីស្ថានភាពថ្លៃប្រេងឥន្ធនៈបច្ចុប្បន្ននៅកម្ពុជា ធ្វើយ៉ាងណាឲ្យមានលក្ខណៈរលាស់ និងទាន់ពេលវេលាឆ្លើយតបនឹងទីផ្សារពិភពលោក និងថ្លៃនាំចូលនៃតម្លៃប្រេងឆ្អិនមកកម្ពុជា៕
អត្តបទដោយ៖ ចាន់ ជីវ៉ា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ