ក្រសួងវប្បធម៌ រៀបចំកម្មវិធីចំនួន៣ នៅថ្ងៃព្រហស្បតិ៍នេះ ដើម្បីផ្សព្វផ្សាយសិល្បៈវប្បធម៌ជាតិ
កម្មវិធីចំនួន៣ ត្រូវបានក្រសួងវប្បធម៌រៀបចំធ្វើនៅតាំងពីព្រលឹម ដល់ព្រលប់ ថ្ងៃព្រហស្បតិ៍ ទី១២វិច្ឆិកានេះ ក្នុងគោលដៅផ្សព្វផ្សាយសិល្បៈវប្បធម៌ជាតិ។ កម្មវិធីទាំង៣នោះ មានជាអាថិ៍ មហោស្រពបង្ហើរខ្លែងខ្មែរ ដែលរៀបចំនៅមជ្ឈមណ្ឌលពិព័រណ៍កោះពេជ្រ ព្រមទាំងមហោស្រពសិល្បៈដណ្ដាំស្លម្ហូបអាហារខ្មែរ និងការបង្ហាញទម្រង់ម៉ូដសម្លៀកបំពាក់ខ្មែរ ដែលត្រូវរៀបចំនាពេលរសៀល នៅសាលសន្និសីទចតុមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅព្រឹកថ្ងៃព្រហស្បតិ៍ទី១២ ខែវិច្ឆិកានេះ ខ្លែងចម្រុះពណ៌ជាច្រើន បានបង្ហើរឡើងព្រោងព្រាតពេញផ្ទៃអាកាស នៅលើទីលានមជ្ឈមណ្ឌលពិព័រណ៍កោះពេជ្រ។ ការបង្ហើរខ្លែងដែលមានរូបរាង និងពណ៌ខុសៗគ្នានេះ ធ្វើឡើងក្នុងឱកាសមហោស្រពបង្ហើរខ្លែងខ្មែរ។ មហោស្រពបង្ហើរខ្លែងខ្មែរ ដែលរៀបចំធ្វើឡើងជារៀងរាល់ឆ្នាំ ហើយឆ្នាំនេះ មានការចូលរួមពីប្រជាពលរដ្ឋមកពី២២រាជធានី-ខេត្ត។
លោក សំរាំង កំសាន្ត អនុរដ្ឋលេខាធិការនៃក្រសួងវប្បធម៌និងវិចិត្រសិល្បៈថ្លែងថា បច្ចុប្បន្ន ខ្លែងខ្មែរកំពុងជះឥទ្ធិពលយ៉ាងខ្លាំងក្លាដល់គ្រប់មជ្ឈដ្ឋានជាតិ និងអន្ដរជាតិ។ ដោយក្នុងនោះ ក្រៅពីបង្អួតខ្លួននៅក្នុងមហោស្រពបង្ហើរខ្លែងខ្មែរនៅក្នុងប្រទេសជារៀងរាល់ឆ្នាំហើយ ខ្លែងខ្មែរបានចូលរួមមហោស្រពអន្ដរជាតិចំនួន៦៥លើក នៅ១៣ប្រទេសផ្សេងៗគ្នា។
លោក សំរាំង កំសាន្ត ក៏បានបន្តលើកឡើងពីជោគជ័យរបស់ខ្លែងខ្មែរ ដែលបានទទួលជ័យលាភីនៅក្នុងការប្រកួតជាលក្ខណៈអន្ដរជាតិផងដែរ។ ជាពិសេសក្នុងមហោស្រពខ្លែងនៅប្រទេសចិន ក្នុងឆ្នាំ២០០៧។ មហោស្រពខ្លែងនៅប្រទេសម៉ាឡេស៊ី ក្នុងឆ្នាំ២០០៨ និង២០០៩។ ព្រមទាំងមហោស្រពខ្លែងអន្ដរជាតិ នៅប្រទេសបារាំងក្នុងឆ្នាំ២០០៨។
តាមគម្រោង បន្ទាប់ពីមហោស្រពបង្ហើរខ្លែងខ្មែរលើកទី១៩ ប្រចាំឆ្នាំ២០១៥ បិទបញ្ចប់នៅវេលាព្រឹក ក្រសួងវប្បធម៌និងវិចិត្រសិល្បៈត្រូវបន្តរៀបចំកម្មវិធីបន្ទាប់របស់ខ្លួន គឺមហោស្រពសិល្បៈដណ្ដាំស្លម្ហូបអាហារខ្មែរលើកទី១៦ និងការបង្ហាញទម្រង់ម៉ូដសម្លៀកបំពាក់ខ្មែរលើកទី១៥។ កម្មវិធីពីរចុងក្រោយនេះ រៀបចំធ្វើនៅសាលសន្និសីទចតុមុខ នាវេលារសៀល ថ្ងៃព្រហស្បតិ៍ទី១២វិច្ឆិកា។
មហោស្រពសិល្បៈដណ្ដាំស្លម្ហូបអាហារ រៀបចំឡើងដើម្បីជ្រើសរើសយកបេក្ខជនដែលមានស្នាដៃខ្ពស់ខាងដណ្ដាំស្ល សម្លម្ជូរព្រៃ មុខម្ហូបពិសេសតាមតំបន់ និងទ្រាបបាយ។ ចំណែកការបង្ហាញទម្រង់ម៉ូដសម្លៀកបំពាក់ ផ្ដោតលើការបង្ហាញម៉ូដសក់សម័យអង្គរ សម័យលង្វែក សម័យចតុមុខ និងសម័យបច្ចុប្បន្ន ព្រមទាំងសម្លៀកបំពាក់ដែលសមស្របសម្រាប់ម៉ូដសក់តាមសម័យកាលនីមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ