សមត្ថកិច្ចឃាត់ខ្លួនមនុស្ស១៤នាក់ ពាក់ព័ន្ធករណីបាញ់សម្លាប់ឧកញ៉ា អ៊ឹង ម៉េងជឺ
ក្រោយពីប្រតិបត្តិការពេញមួយយប់ ថ្ងៃពុធទី៣ធ្នូ ឈានដល់ថ្ងៃព្រហស្បត្តិ៍នេះ សមត្ថកិច្ចកម្ពុជាបានសម្រេចឃាត់ខ្លួនមនុស្សសរុប១៤នាក់ ក្នុងនោះរួមមានឱពុកម្តាយ អង្គរក្ស រួមទាំងប្រពន្ធ និងអ្នកបំរើរបស់លោកឧកញ៉ា ថោង សារ៉ាត់ផងដែរ។ លោកឧកញ៉ា ថោង សារ៉ាត់ ដែលសមត្ថកិច្ចអះអាងថា ជាមេខ្លោងបាញ់សម្លាប់លោកឧកញ៉ា អ៊ឹង ម៉េងជឺនោះ បានរត់គេចខ្លួនបាត់ហើយ។ ហើយនៅរសៀលថ្ងៃនេះ អាជ្ញាធរនឹងបញ្ជូនខ្លួនអង្គរក្ស៤នាក់ ដែលជាអ្នកធ្វើសកម្មភាពនិងជាជនដៃដល់ ទៅកាន់តុលាការ ដើម្បីចោទប្រកាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ពេញមួយយប់ថ្ងៃទី៣ខែធ្នូឈានចូលដល់ថ្ងៃព្រហស្បត្តិ៍ទី៤ខែធ្នូនេះ កងកម្លាំងសមត្ថកិច្ចកម្ពុជាបានបើកប្រតិបត្តិការចាប់ខ្លួនឧកញ៉ា ថោង សារ៉ាត់ ដែលសមត្ថកិច្ចបានអះអាងថា ជាមេខ្លោងបាញ់សម្លាប់លោកឧកញ៉ា អ៊ឹង ម៉េងជឺ កាលពីថ្ងៃទី២២វិច្ឆិកា។ កាលពីយប់មិញ សមត្ថកិច្ចបានចុះឡោមព័ទ្ធភូមិគ្រឹះចំនួន២កន្លែងរបស់លោកឧកញ៉ា ថោង សារ៉ាត់ ស្ថិតនៅទីស្នាក់ការបុរី៩៩៩ សង្កាត់ចាក់អង្រែក្រោម និងនៅភូមិគ្រឹះនៅត្នោតជ្រុំ ក្នុងសង្កាត់បឹងទំពុនរាជធានីភ្នំពេញ។ ប៉ុន្តែអាជ្ញាធររកមិនឃើញលោកឧកញ៉ា ថោង សារ៉ាត់ នោះទេ។ ប៉ុន្តែជាមួយគ្នានេះ អាជ្ញាធររាជធានីភ្នំពេញ បានសម្រេចឃាត់ខ្លួនមនុស្សចំនួន ១៤នាក់ ក្នុងនោះរួមមានទាំង ឪពុកម្តាយឧកញ៉ា ថោង សារ៉ាត់ ប្រពន្ធ អង្គរក្ស៤នាក់ និងអ្នកបម្រើមួយចំនួនផងដែរ។
លោកឧត្តមសេនីយ៍ត្រី ជួន ណារិន ស្នងការរងនគរបាលរាជធានីភ្នំពេញ បានថ្លែងថា ពួកគេមួយចំនួននឹងត្រូវដោះលែងវិញ ក្រោយការសាកសួរ។ ចំណែកឯអង្គរក្ស៤នាក់របស់លោកឧកញ៉ា ថោង សារ៉ាត់ នឹងត្រូវបញ្ជូនទៅកាន់តុលាការដើម្បីចោទប្រកាន់ជាផ្លូវការ ក្នុងនោះរួមមាន ឈ្មោះសៀង វាសនា ជាជនដៃដល់ ទី២ឈ្មោះ លី សៅ ជាអ្នកបើកម៉ូតូឱ្យជនដៃដល់ធ្វើសកម្មភាព ទី៣ឈ្មោះ មាស សម្បត្តិ ជាអ្នកបើកម៉ូតូសម្រាប់ការពារពីក្រោយ និងទី៤ឈ្មោះ កូយ ចាន់ថល ជាអ្នកជិះម៉ូតូពីក្រោយហើយមកពិនិត្យមើលសពរបស់ជនរងគ្រោះ។ នៅក្នុងប្រតិបត្តិការកាលពីយប់ម៉ិញ សមត្ថកិច្ចក៍បានរកឃើញ ម៉ូតូដែលពួកអង្គរក្សទាំងនេះជិះធ្វើសកម្មភាព រួមទាំងកាំភ្លើងចំនួន៦ដើម។ ប៉ុន្តែឪពុកម្តាយរបស់ឧកញ៉ាថោង សារ៉ាត់ គឺលោក ថោង ចំរើន និងលោកស្រី កែវ សារី កំពុងសួរនាំនៅស្នងការដ្ឋាននគរបាលជាតិនៅឡើយ។
លោក ជួន ណារិន បានបញ្ជាក់ថា ចំណែកមេខ្លោងឧកញ៉ា ថោង សារ៉ាត់ បានរត់គេចខ្លួនបាត់។
.....................សំឡេង.......................
លោក ជួន ណារិន បានឱ្យដឹងថា លោកឧកញ៉ា ថោង សារ៉ាត់ ម្ចាស់បុរី៩៩៩ និងជាមេខ្លោង ត្រូវបានសមត្ថកិច្ចរកឃើញថា ជាអ្នករៀបចំគម្រោងយ៉ាងលម្អិត តាំងពីដើមរហូតដល់ចប់ ដើម្បីសម្លាប់ឧកញ៉ា អ៊ឹង ម៉េងជឺ ថៅកែស៊ីម៉ងតិ៍ពេជ្រ និង ហាងពេជ្រ ហុងកុង ប៉ុន្តែលោកណារិន មិនទាន់បញ្ជាក់នៅឡើយទេថា តើមូលហេតុអ្វីដែលនាំអោយមានការបាញ់សម្លាប់លោកឧកញ៉ា អ៊ឹង ម៉េងជឺនេះ។ ក្រោយពីការវែកមុខរកឃើញថា លោក ថោង សារ៉ាត់ ជាអ្នកបញ្ជានៅពីក្រោយខ្នង នៃការបាញ់សម្លាប់ ឧកញ៉ា អ៊ឹង ម៉េងជឺនោះ សមត្ថកិច្ចបានទម្លាយអាថ៌កំបាំងឲ្យដឹងបន្ថែមទៀតថា លោក ថោង សារ៉ាត់ បានបង្កើត ក្រុមអង្គរក្សជាច្រើននាក់ ក្នុងគោលបំណងការពារសុវត្ថិភាពផ្ទាល់ខ្លួនផង និងដើម្បីប្រព្រឹត្តបទល្មើសលើជនដែលរារាំងជំនួញរបស់គេផង។ ថោង សារ៉ាត់ ក៍ត្រូវបានគេដឹងថា ពាក់ផ្កាយពីរនៅក្រសួងការពារជាតិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ