មនុស្សជាង៤០០០នាក់ចូលរួមជិះកង់ក្នុងព្រឹត្តិការណ៍ទិវាអឺរ៉ុបឆ្នាំ២០១៦
ដូចការរំពឹងទុកមនុស្សជាង៤០០០នាក់ចម្រុះជាតិសាសន៍ បានចូលរួមជិះកង់នៅព្រឹកថ្ងៃសៅរ៍ទី០៧ឧសភានេះ នាឱកាសដែលកម្ពុជានិងអឺរ៉ុប ប្រារព្ធទិវាអឺរ៉ុបឆ្នាំ២០១៦ក្រោមប្រធានបទ«រួមគ្នាដើម្បីផែនដី»។ នេះជាលើកទី០៤ហើយ ដែលកម្ពុជានិងអឺរ៉ុបរួមគ្នាបង្កើតព្រឹត្តិការណ៍ជិះកង់ដើម្បីបង្កើនការយល់ដឹងអំពីបរិស្ថាននិងតម្រូវការក្នុងការ ការពារប្រព័ន្ធអេកូឡូស៊ី និង បរិស្ថានធម្មជាតិកម្ពុជា ក៏ដូចជាភពផែនដីទាំងមូល។
ចុះផ្សាយនៅថ្ងៃ៖
មនុស្សជាង៤០០០នាក់បានជិះកង់រួមគ្នា ដោយផ្ដើមចេញដំណើរពីពហុកីឡាដ្ឋានជាតិអូឡាំពិកកម្ពុជានៅម៉ោង៦ព្រឹកនិងបន្តជិះកាត់ស្ថានទូតប្រទេសដែលជាសមាជិកសហភាពអឺរ៉ុបប្រចាំនៅកម្ពុជា ។ នៅពេលមកដល់មុខស្ថានទូត បុគ្គលិកទូតបានចេញមកទទួលយ៉ាងរួសរាយរាក់ទាក់និងបានចែកទង់ជាតិដែលជាតំណាងរបស់ប្រទេសពួកគេដល់អ្នកជិះកង់។ ក្រោយការជិះកង់បានបញ្ចប់នៅម៉ោង១០ព្រឹកអ្នកចូលរួមទទួលបានអាវយឺតមួយ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ដែលបានចូលរួមជិះកង់នៅព្រឹកសៅរិ៍នេះឲ្យដឹងថា ព្រឹត្តិការណ៍ជិះកង់នេះមានការចូលរួមពីមន្ត្រីស្ថានទូតអឺរ៉ុបប្រចាំកម្ពុជាដូចជា បារាំង អាល្លឺម៉ង់ និង ស៊ុយអ៊ែតជាដើម។ ក្រៅពីនេះក៏មានការចូលរួមផងដែរ ពីយុវជនដែលភាគច្រើនជានិស្សិត និង សមាគមន៍អ្នកជិះកង់។
លោក វ៉ាត់ ចំរើន បន្ថែមថា ការជិះកង់នេះត្រូវបានចាត់ទុក ជាព្រឹត្តិការណ៍ជិះកង់ប្រចាំឆ្នាំដែលជាការផ្គួបចូលគ្នាជាមួយទិវាអឺរ៉ុបដើម្បីភពផែនដីនិងទិវាអ្នកម្ដាយពិភពលោកឬ MOTHER'S DAY។
លោក George Edgar ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជាឲ្យដឹងថា ការជ្រើសយកប្រធានបទ«រួមគ្នាដើម្បីផែនដី»តាមរយៈការជិះកង់ជាមធ្យោបាយធ្វើដំណើរដ៏ល្អ គ្មានផ្សែង ដើម្បីដោះស្រាយបញ្ហាធំបំផុតមួយចំនួន ដែលមនុស្សកំពុងជួបប្រទះចំពោះមុខទាក់ទងនឹងបរិស្ថាន។
សូមបញ្ជាក់ថា ទិវាអឺរ៉ុប ត្រូវបានប្រារព្ធធ្វើជារៀងរាល់ឆ្នាំនាថ្ងៃទី៩ឧសភានៅទូទាំងពិភពលោក ដើម្បីរំលឹកពីសេចក្តីថ្លែងការណ៍ជាប្រវត្តិសាស្រ្តរបស់រដ្ឋមន្រ្តីកាបរទេសបារាំង លោក Robert Schuman នៅឆ្នាំ១៩៥០ ដែលបានបើកទំព័រនៃដំណើរការកសាងសហភាពអឺរ៉ុបឡើង ក្រោយពីសង្រ្គាមលោកលើកទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ