ការលើកទឹកចិត្ត ការអប់រំនិង វិធីការពារទាក់ទងទៅនឹងជំងឺអេដស៍ជាការផ្សាយប្រកបដោយក្រមសីលធម៌
ក្លឹបអ្នកកាសែតកម្ពុជាក្រោមការជ្រោមជ្រែងពីអង្គការខុនរ៉ាដ អាដេណៅអ៊ែរ បានបើកវេទិកាជជែកគ្នាមួយនៅព្រឹកថ្ងៃព្រហស្បតិ៍នេះ ទាក់ទងទៅនឹងក្រមសីលធម៌អ្នកសារព័ត៌មាន ក្នុងការធ្វើសេចក្តីរាយការណ៍ពីអ្នកឆ្លងមេរោគអេដស៍នៅខេត្តបាត់ដំបង។ កម្មវិធីដែលប្រព្រឹត្តទៅនៅសណ្ឋាគារកាំបូឌីយ៉ាណានេះ មានការចូលរួមពីអ្នកកាសែតខ្មែរ និងអ្នកជំនាញសុខាភិបាលផ្នែកជំងឺអេដស៍ ប្រមាណជា៤០នាក់។
ចុះផ្សាយនៅថ្ងៃ៖
ស្តាប់ - ០២:១៧
ការឆ្លងមេរោគអេដស៍នៅឃុំរការខេត្តបាត់ដំបងកាលពីចុងឆ្នាំ២០១៤កន្លងទៅ ពេលនេះបានក្លាយជាប្រធានបទនៃកិច្ចពិភាក្សាគ្នារវាងមន្ត្រីជំនាញនិងអ្នកសារព័ត៌មាននៅព្រឹកថ្ងៃទី២៩មករានេះ នៅសណ្ឋាគារកាំបូឌីយ៉ាណា ដែលមានការគាំទ្រដោយអង្គការខុនរ៉ាដអាដេណៅអ៊ែរ។
ក្រោមប្រធានបទ«ការពិតនិងជីវិតឯកជន» អ្នកកាសែតនិងអ្នកចូលរួមឯទៀតប្រមាណជា៤០នាក់ បានជជែកផ្តោតទៅលើក្រមសីលធម៌អ្នកសារព័ត៌មាន និងការរាយការណ៍ពីអ្នកឆ្លង មេរោគអេដស៍ ជាពិសេសនៅឃុំរការ ខេត្តបាត់ដំបង។
លោកតែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍ បានថ្លែងនៅក្នុងឱកាស
នោះថា ការចុះផ្សាយព័ត៌មានកន្លងមករបស់ប្រព័ន្ធផ្សព្វផ្សាយវាជាការល្អហើយ ក៏ប៉ុន្តែការផ្សាយខ្លះក៏មានផលប៉ះពាល់អវិជ្ជមានទៅដល់អ្នកមានជំងឺអេដស៍។ ដោយមិនមានការស្តីបន្ទោសអ្វីទេ លោកអគ្គលេខាធិការ ផ្តល់ជាយោបល់ថា ប្រព័ន្ធផ្សព្វផ្សាយគួរតែផ្សាយព័ត៌មានបែបជាការលើកទឹកចិត្ត កាត់បន្ថយការរើសអើង និងរួមចំណែកផ្តល់ចំណេះដឹង ព្រមទាំងបញ្ជ្រាបការយល់ដឹងឲ្យបានច្រើន ទាក់ទងទៅនឹងការការពារខ្លួនពីជំងឺអេដស៍។
ជាមួយគ្នានេះ លោកជួប សុខចំរើន មន្ត្រីអង្គការខាណា ក៏បានរិះគន់ការផ្សាយព័ត៌មានមួយចំនួនកន្លងមកដែរ ដែលថាការឆ្លងមេរោគ ឬផ្ទុកជំងឺអេដស៍គឺជាការអស់សង្ឃឹមដ៏ធំបំផុតនោះ។ មន្ត្រីអង្គការក្រៅរដ្ឋាភិបាលរូបនេះបញ្ជាក់ថា ការឆ្លងមេរោគអេដស៍មិនមែនជាការ
អស់សង្ឃឹមនៃជីវិតនោះទេ។
សូមបញ្ជាក់ថាឆ្លងការពិនិត្យធ្វើតេស្តឈាមកាលពីខែធ្នូឆ្នាំ២០១៤កន្លងមក នៅឃុំរការ ខេត្តបាត់ដំបង គេបានរកឃើញថាប្រជាពលរដ្ឋនៅទីនោះបានឆ្លងមេរោគអេដស៍ទាំងចាស់ទាំងក្មេង តួលេខចុងក្រោយគឺ២២៦នាក់។កាលពីថ្ងៃទី២៧មករាកន្លងទៅនេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានបញ្ជាក់នៅមុខគណៈកម្មការទី៨នៃរដ្ឋសភាថា ការឆ្លងមេរោគអេដស៍នៅឃុំរការ បណ្តាលមកពីការប្រើម្ជុលចាក់ថ្នាំរួម និងខ្សែរសេរ៉ូម។ ជាមួយគ្នានេះ លោករដ្ឋមន្ត្រីក៏បានឲ្យដឹងផងដែរពីការយកចិត្តទុកដាក់របស់ក្រសួងសុខាភិបាល ដល់អ្នកឆ្លងមេរោគអេដស៍ទាំងនោះ ដូចជាការថែទាំដល់ បង្កើនសេវាពិនិត្យព្យាបាលជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ