សាលាក្តីខ្មែរក្រហម មិនមានសំណុំរឿងថ្មី ក្រៅពី ០០៣ និង ០០៤ ទេ
សហព្រះរាជអាជ្ញាអន្តរជាតិ លោកនីកូឡាស កូមចាន់ ( Nicholas Koumjian ) បានប្រកាសថា នៅសាលាក្តីខ្មែរក្រហម មិនមានសំណុំរឿងក្តីណាបន្ថែមទៀត ក្រៅពីសំណុំរឿង ០០៣ និង ០០៤ នោះទេ។ សេចក្តីប្រកាសជាលាយលក្ខណ៍អក្សររបស់សហព្រះរាជអាជ្ញាអន្តរជាតិ ដើម្បីឆ្លើយតបនឹងរបាយការណ៍ព័ត៌មាននានា ដែលលើកឡើងថា មានសំណួរមួយចំនួន ត្រូវបានចោទសួរនៅក្នុងព្រឹត្តិការណ៍ផ្សព្វផ្សាយ កាលពីពេលថ្មីៗនេះ ថាតើនៅមានសំណុំរឿងបន្ថែមទៀតដែរ ឬទេ បន្ទាប់ពីសំណុំរឿង០០៣ និង០០៤។
ចុះផ្សាយនៅថ្ងៃ៖
ស្តាប់ - ០២:០៥
សហព្រះរាជអាជ្ញាអន្តរជាតិ លោក Nicholas Koumjian បានបញ្ជាក់ឡើងវិញម្តងទៀតថា ការិយាល័យរបស់លោក នៅតែមិនប្រែប្រួលគោលនយោបាយរបស់ខ្លួន ដូចដែលធ្លាប់បានប្រកាសពីលើកដំបូង ដោយសហព្រះរាជអាជ្ញាមុន កាលពីថ្ងៃទី៨ ខែកញ្ញា ឆ្នាំ២០០៩ ថា គ្មានសំណុំរឿងផ្សេងទៀត នឹងត្រូវដាក់ជូនទៅសហចៅក្រមស៊ើបអង្កេតនោះទេ។
សេចក្តីប្រកាសព័ត៌មានរបស់លោកសហព្រះរាជអាជ្ញាអន្តរជាតិ Nicholas Koumjian នៅថ្ងៃទី២៦វិច្ឆិកា បានបញ្ជាក់ថា “ការយកចិត្តទុកដាក់របស់សហព្រះរាជអាជ្ញាអន្តរជាតិ និងបុគ្គលិករបស់ខ្លួន គឺការបញ្ចប់សំណុំរឿងនានា ដែលបច្ចុប្បន្ននេះ កំពុងស្ថិតនៅដំណាក់កាលបណ្តឹងឧទ្ធរណ៍ នៅក្នុងការជំនុំជម្រះក្តី និងនៅក្រោមការស៊ើបអង្កេតយ៉ាងត្រឹមត្រូវ និងដោយឆាប់រហ័ស ដើម្បីទទួលបានយុត្តិធម៌ និងយុត្តិធម៌ ត្រូវបានមើលឃើញ ព្រមទាំងវិធានការទទួលខុសត្រូវទាំងឡាយ ដែលត្រូវសម្រេចចំពោះឧក្រិដ្ឋកម្មនានា ដែលបានប្រព្រឹត្តនៅក្នុងអំឡុងពេលនៃរបបកម្ពុជាប្រជាធិបតេយ្យ។
ចាប់ផ្តើមនៅឆ្នាំ២០០៦ តុលាការចម្រុះកាត់ទោសអតីតមេដឹកនាំខ្មែរក្រហម បង្កើតឡើងដោយរដ្ឋាភិបាលកម្ពុជា និងអង្គការសហប្រជាជាតិ បានបញ្ចប់សំណុំរឿង០០១ កាត់ទោសលើលោកកាំងហ្គេកអ៊ាវ ហៅឌុច ព្រមទាំងបន្តសំណុំរឿង០០២ ដែលមានជនជាប់ចោទលោកនួនជា និងលោកខៀវសំផន។
ដោយឡែកសំណុំរឿង០០៣ និង ០០៤ កំពុងស្ថិតនៅក្នុងដៃសហចៅក្រមស៊ើបអង្កេត។ ជនជាប់ចោទក្នុងសំណុំរឿងថ្មីទាំងពីរនោះ មិនត្រូវបានសាលាក្តីប្រកាសជាផ្លូវការទេ តែមានការផ្សព្វផ្សាយថា មានអតីតមេដឹកនាំខ្មែរក្រហម ៥ រូប ដែលនឹងត្រូវជាប់ចោទ ក្នុងសំណុំរឿង០០៣ និង០០៤។
សំណុំរឿងថ្មីនេះ មិនត្រូវបានគាំទ្រដោយភាគីជាតិ រួមមាន សហព្រះរាជអាជ្ញា និងសហចៅក្រមស៊ើបអង្កេតជាតិ នៅសាលាក្តីខ្មែរក្រហមទេ។ រដ្ឋាភិបាលកម្ពុជា ក៏មិនចង់ឲ្យមានការកាត់ទោសបន្ថែមលើអតីតមេខ្មែរក្រហម ក្រៅពីសំណុំរឿង០០១ និងសំណុំរឿង០០២ នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ