មួយម៉ោងសម្រាប់កម្ពុជា និងពិភពលោក គឺនៅមិនទាន់គ្រប់គ្រាន់ទេ
នៅល្ងាចនេះ ក្រុមយុវជនខ្មែរ និងស្ថាប័នពាក់ព័ន្ធដែលធ្វើការងារផ្នែកបរិស្ថាន បានសហការរៀបចំ«ទិវាមួយម៉ោងសម្រាប់ភពផែនដី និងប្រទេសកម្ពុជា» ដើម្បីចូលរួមចំណែកកាត់បន្ថយការប្រើប្រាស់ភ្លើងអគ្គិសនី និងជួយកាត់បន្ថយការប្រែប្រួលអាកាសធាតុ។ ក្នុងរាជធានីភ្នំពេញ ពិធីនេះនឹងចាប់ពីម៉ោង ៥ និង៣០នាទី នៅសាកលវិទ្យាល័យភូមិន្ទភ្នំពេញ ក្នុងបរិវេណទីលានបាល់ទាត់។ គួរជម្រាបជូនថា ក្រៅពីធ្វើសិក្ខាសាលាជាច្រើនដើម្បីពិភាក្សារឿងបម្រែបម្រួលអាកាសធាតុ ថ្មីៗនេះ រដ្ឋមន្ត្រីក្រសួងបរិស្ថាន លោក សាយ សំអាល់ ក៏បានអំពាវនាវតាមបណ្តាញព័ត៌មានឲ្យចូលរួមក្នុងព្រឹត្តិការណ៍នេះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ល្ងាចថ្ងៃទី២៨ ខែមីនា ជាពេលវេលា ដែលពិភពលោកកំណត់យក ដើម្បីចូលរួមបិទភ្លើងអគ្គិសនីរយៈពេលមួយម៉ោង ដើម្បីបរិស្ថាន ទប់ទល់នឹងការប្រែប្រួលអាកាសធាតុ និងរក្សាលំនឹងភពផែនដី។ ថ្ងៃសៅរ៍ ទី២៨ ឆ្នាំ២០១៥នេះ គឺជាលើកទី៩ហើយ ដែលអង្គការមូលនិធិសកលសម្រាប់ធនធានធម្មជាតិ(WWF) បានប្រារព្ធទិវានេះនៅទូទាំងពិភពលោក។ ដោយឡែកនៅប្រទេសកម្ពុជា អង្គការមួយនេះ បានផ្តួចផ្តើមធ្វើ ជាគម្រប់លើកទី៣ហើយ។
គួរបញ្ជាក់ដែរថា ជារៀងរាល់ឆ្នាំ «ទិវាមួយម៉ោងសម្រាប់ភពផែនដី» មានអ្នកចូលរួមរាប់រយលាននាក់ នៅក្នុងរដ្ឋធានី និងក្រុងចំនួនជាង ៧ ០០០ និង ១៦២ ប្រទេសនៅពាសពេញពិភពលោក។
ក្នុងរាជធានីភ្នំពេញ «ទិវាមួយម៉ោងសម្រាប់ភពផែនដី និងកម្ពុជា» នឹងចាប់ផ្តើមធ្វើពីម៉ោង៥និង៣០នាទីល្ងាច។ យុវជនខ្មែរប្រមាណជាង៧០០នាក់ ត្រូវគេរំពឹងទុកថានឹងចូលរួមដោយផ្ទាល់នៅបរិវេណនៅសាកលវិទ្យាល័យភូមិន្ទភ្នំពេញ ព្រមទាំងមានការចូលរួមពីអង្គការសង្គមស៊ីវិល ក្រុមហ៊ុនឯកជន និងតំណាងពីក្រសួងបរិស្ថានរបស់កម្ពុជាផងដែរ។
លោក ឈិត សំអាត នាយកអង្គការ WWF ប្រចាំនៅកម្ពុជា បានប្រាប់វិទ្យុបារាំងអន្តរជាតិ RFI ថា ប្រជាពលរដ្ឋទូទៅអាចចូលរួមកម្មវិធីនេះបានដោយសេរី។
គួរកត់សម្គាល់ផងដែរថា តាមបណ្តាញសង្គមនិងប្រព័ន្ធព័ត៌មានផ្សេងៗ លោក សាយ សំអាល់ រដ្ឋមន្ត្រីវ័យក្មេងនៃក្រសួងបរិស្ថាន ក៏បានអំពាវនាវឲ្យសាធារណជនចូលរួមក្នុងព្រឹត្តិការណ៍នេះ និងត្រូវចូលរួមសន្សំសំចៃថាមពលដើម្បីបរិស្ថាន។
ទោះយ៉ាងណាក្តី ការបិទភ្លើងតែរយៈពេលមួយម៉ោង ដើម្បីសន្សំសំចៃថាមពលអគ្គិសនី គឺនៅមិនទាន់គ្រប់គ្រាន់ទេ ព្រោះនេះគ្រាន់តែជាព្រឹត្តិការណ៍និមិត្តរូប ដើម្បីដាស់ស្មារតីពញ្ញាក់អារម្មណ៍ប្រជាជនឲ្យចូលរួមសន្សំសំចៃតែប៉ុណ្ណោះ។
លោក ឈិត សំអាត បានសង្កត់ធ្ងន់ទៀតថា ការសំខាន់គឺពលរដ្ឋទាំងអស់គ្រប់ជាន់ថ្នាក់ ត្រូវប្តូរឥរិយាបថចំពោះការប្រើប្រាស់ភ្លើងអគ្គិសនី និងប្រុងប្រយ័ត្នចំពោះប្រើប្រាស់ភ្លើង ខ្ជះខ្ជាយឥតប្រយោជន៍។ ហើយត្រូវចាប់ផ្តើមធ្វើការងារនេះ ប្រកបដោយស្មារតីភ្ញាក់រលឹកពីបុគ្គលម្នាក់ៗទៅ ដើម្បីអនាគតរបស់កម្ពុជា និងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ