ព្រះមេគណខេត្តកំពង់ស្ពឺត្រូវបានដកហូតតំណែងយប់មិញ ក្រោយផ្ទុះរឿងអាស្រូវ
នៅទីបំផុតទៅ ព្រះមេគណខេត្តកំពង់ស្ពឺ ព្រះនាម ឌូ វណ្ណឌឿន ត្រូវបានគណៈសង្ឃនាយកនៃព្រះរាជាណាចក្រកម្ពុជាសម្រេចដកហូតមុខតំណែងជាមេគណខេត្ត បន្ទាប់ពីព្រះអង្គបានឡើងច្រៀងចម្រៀងលើឆាកតន្ត្រី ឲ្យពុទ្ធបរិស័ទរាំ នៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិនាពេលថ្មីៗនេះ។ សកម្មភាពនេះ ត្រូវបានគេចាត់ទុកថា ធ្វើឲ្យប៉ះពាល់ដល់កិត្តិយសព្រះពុទ្ធសាសនានិងខុសធម៌វិន័យរបស់ព្រះសម្មាសម្មុទ្ធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
សេចក្តីសម្រេចនេះ បានធ្វើឡើងភ្លាមៗ កាលពីយប់ថ្ងៃទី២០មេសា បន្ទាប់ពីមានកិច្ចប្រជុំបន្ទាន់មួយរវាងគណៈសង្ឃនាយកនៃព្រះរាជាណាចក្រកម្ពុជាដឹកនាំដោយសម្តេចសង្ឃនាយក នន្ទ ង៉ែត, តុលាការសង្ឃ, ថេរសភាសង្ឃ និងសមីជនផង ដែលបានប្រព្រឹត្តទៅនៅក្នុងវត្តបុទុមវត្តីក្នុងទីក្រុងភ្នំពេញ។
លោក សេង សុមុនី រដ្ឋលេខាធិការនិងជាអ្នកនាំពាក្យក្រសួងធម្មការនិងសាសនា បានថ្លែងប្រាប់វិទ្យុបារាំងអន្តរជាតិ RFI ថា នៅចំពោះមុខគណៈសង្ឃនាយក ព្រះអង្គ ឌូ វណ្ណឌឿន បានទទួលស្គាល់កំហុសរបស់ខ្លួន។ ដូចនេះ គ្រប់ឋានានុក្រម បានសម្រេចដកហូតតំណែងរបស់ព្រះអង្គជាមេគណខេត្តកំពង់ស្ពឺ ដោយទុកឲ្យព្រះអង្គធ្វើជាព្រះសង្ឃធម្មតាវិញ។ បើទោះបីជាសេចក្តីសម្រេចនេះ មិនទាន់ធ្វើឡើងជាលាយលក្ខល៍អក្សរ ក៏ប៉ុន្តែសេចក្តីសម្រេចដែលធ្វើឡើងដោយព្រះសង្ឃគ្រប់ឋានានុក្រមកាលពីយប់មិញនេះ ចាត់ទុកជាបានការហើយ។
គួរបញ្ជាក់ថា សេចក្តីសម្រេចនេះ បានធ្វើឡើង នៅក្រោយការបែកធ្លាយវីដេអូឃ្លីបមួយ ដែលជាសកម្មភាពរបស់ព្រះមេគណខេត្តកំពង់ស្ពឺ ព្រះនាម ឌូ វណ្ណឌឿន ដែលបានឡើងច្រៀងចម្រៀងនៅលើឆាកតន្ត្រីមួយ ដើម្បីច្រៀងឲ្យពុទ្ធបរិស័ទរាំលេង នៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិនាពេលថ្មីៗនេះ។ ហើយវា (វីដេអូឃ្លីប) ត្រូវបានគេបង្ហោះនិងចែកចាយពេញបណ្តាញសង្គមហ្វេសប៊ុក ដែលនាំឲ្យមានការភ្ញាក់ផ្អើល និងរិះគន់យ៉ាងខ្លាំង។ គណៈសង្ឃនាយកនៃព្រះរាជាណាចក្រកម្ពុជា បានចាត់ទុកសកម្មភាពរបស់ព្រះមេគណខេត្តកំពង់ស្ពឺព្រះនាម ឌូ វណ្ណឌឿន នេះថា បានធ្វើឲ្យប៉ះពាល់ដល់កិត្តិយសព្រះពុទ្ធសាសនានិយាយជារួម និងនិយាយដោយឡែក គឺព្រះសង្ឃដែលជាស្រែបុណ្យរបស់ពុទ្ធបរិស័ទ។ លោក សេង សុមុនី បានបញ្ជាក់ថា ការតែងតាំងព្រះមេគណខេត្តកំពង់ស្ពឺថ្មី នឹងរៀបចំឡើងនៅពេលក្រោយ បន្ទាប់ពីមានសេចក្តីសម្រេចជាលាយលក្ខណ៍អក្សរ។
សូមបញ្ជាក់ថា នេះគឺជារឿងអាស្រូវដ៏ធំមួយរបស់ព្រះសង្ឃ នៅក្នុងវិស័យព្រះពុទ្ធសាសនា ដែលជាសាសនារបស់រដ្ឋ នៅឆ្នាំ២០១៦នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ