របាយការណ៍៖ សាលារៀនមិនបានផ្តល់បរិយាកាសសុវត្ថិភាពដល់អ្នកស្រឡាញ់ភេទដូចគ្នា
មជ្ឈមណ្ឌលសិទ្ធិមនុស្សកម្ពុជានៅព្រឹកថ្ងៃព្រហស្បតិ៍ទី១៧ ខែធ្នូ បានដាក់សម្ពោធរបាយការណ៍មួយស្តីពីការសម្លុតអ្នកស្រឡាញ់ភេទដូចគ្នា នៅតាមសាលារៀនក្នុងប្រទេសកម្ពុជា។ តាមរយៈទិន្នន័យក្នុងរបាយការណ៍នោះ បានបង្ហាញថាសាលារៀនបានខកខានក្នុងការផ្តល់បរិយាកាសសុវត្ថិភាព និងនៅពេលខ្លះបានចូលរួមក្នុងសកម្មភាពសម្លុតអ្នកស្រឡាញ់ភេទដូចគ្នាផងដែរ។
ចុះផ្សាយនៅថ្ងៃ៖
ស្តាប់ - ០២:១៦
របាយការណ៍កម្រាស់៥៥ទំព័រ របស់មជ្ឈមណ្ឌលសិទ្ធិមនុស្សកម្ពុជា បានបង្ហាញថាការរើសអើងចំពោះអ្នកបង្ហាញអត្តសញ្ញាណភេទនៃអ្នកស្រឡាញ់ភេទដូចគ្នា តាមសាលារៀនក្នុងប្រទេសកម្ពុជាភាគច្រើន បានកើតឡើងជាទម្រង់ សម្តី ផ្លូវកាយ ផ្លូវភេទ ការរើសអើងចេញពីគ្រូបង្រៀន និងការផាត់ចេញពីសង្គម មិត្តរួមថ្នាក់ជាដើម។ ការស្រាវជ្រាវរបស់របាយការណ៍នេះ បានធ្វើឡើងនៅក្នុងខេត្តចំនួន ១១ ទូទាំងប្រទេសកម្ពុជា ដោយមានអ្នកចូលរួមឆ្លើយសំនួរប្រមាណ២៤៥នាក់ ដែលមានអាយុចាប់ពី១៥ឆ្នាំ រហូតដល់អាយុ៧២ឆ្នាំ។
នៅក្នុងសិក្សាស្រាវជ្រាវនោះ បានឲ្យដឹងទៀតថាអ្នកដែលបានបង្ហាញអត្តសញ្ញាណភេទនៃអ្នកស្រឡាញ់ភេទដូចគ្នា ហើយត្រូវបានគេសម្លុតធ្វើបាបដោយសារពាក្យសម្តី គឺមានប្រមាណ៨៨.៤៦ភាគរយ។ នេះ គឺជាភាគរយខ្ពស់មួយនៅក្នុងចំណោមរូបភាពផ្សេងៗទៀត។ ក្រៅពីនោះ ការផាត់ចេញពីសង្គម ឬគ្មានអ្នករាប់អានពីសង្គមជុំវិញ មានត្រឹមតែ៤៦ភាគរយប៉ុណ្ណោះ។ អ្នកដែលសម្លុតធ្វើបាប ភាគច្រើនជាសិស្សប្រុស អ្នករស់នៅតាមសហគមន៍ ប៉ូលីស គ្រូបង្រៀន និងសិស្សស្រី។
ក្រោយពីមានការសម្លុត ធ្វើបាបនៅក្នុងសាលារៀនពួកគេទាំងនោះ ភាគច្រើនមិនបានបញ្ចប់ការសិក្សានៅកម្រិតថ្នាក់វិទ្យាល័យនោះ។ របាយការណ៍បានបង្ហាញទៀតថា ការសម្លុតធ្វើបាប ដោយមូលហេតុនិន្នាការភេទ និងអត្តសញ្ញាណភេទ មានប្រមាណជិត១៣ភាគរយ ដែលជាភាគរយខ្ពស់មួយ បើប្រៀបធៀបនឹងមូលហេតុនៃការមិនបានបញ្ចប់ការសិក្សាថ្នាក់វិទ្យាល័យ។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា បានអំពាវនាវឲ្យគ្រឹះស្ថានសិក្សាទូទាំងប្រទេសកម្ពុជាគួរតែដាក់ចេញនូវគោលនយោបាយណាមួយ ដែលអាចមានវិធានការលើបុគ្គលទាំងឡាយណា ដែលសម្លុតលើអ្នកដែលបង្ហាញទំនោរភេទ។ ក្រៅពីនេះរបាយការណ៍ខាងលើក៏បានដាក់ចេញជាមតិយោបល់មួយចំនួនសម្រាប់រដ្ឋាភិបាលកម្ពុជា គណបក្សនយោបាយ អង្គការសង្គមស៊ីវិលផ្សេងៗ សាលារៀន និងគ្រូបង្រៀនផងដែរ។ អនុសាសន៍ទាំងនោះ គឺសំដៅជម្រុញឲ្យបញ្ឈប់ការរើសអើងលើក្រុមអ្នកស្រឡាញ់ភេទដូចគ្នា និងជម្រុញឲ្យមានការដាក់អនុវត្តច្បាប់ប្រឆាំងនឹងការរើសអើងចំពោះអ្នកស្រឡាញ់ភេទដូចគ្នានៅកម្ពុជា។
ជុំវិញការចេញរបាយការណ៍បែបនេះ លោក រស់ សាលីន អ្នកនាំពាក្យក្រសួងអប់រំបានបញ្ជាក់ប្រាប់វិទ្យុបារាំងអន្តរជាតិថា ក្រសួងអប់រំបានដាក់មេរៀនសិក្សាមិនឲ្យមានការរើសអើងចំពោះអ្នកស្រឡាញ់ភេទដូចគ្នានៅ នៅក្នុងកម្មវិធីសិក្សាសង្គម ហើយលោកគ្រូអ្នកគ្រូតែងតែពន្យល់ពីសិទ្ធិមូលដ្ឋាន ដូច្នេះចំណុចនេះហើយដែលបញ្ជាក់ថាមិនមានការរើសអើងដល់អ្នកណាទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ