ក្រសួងការបរទេសអាមេរិកចេញផ្សាយរបាយការណ៍ស្តីពីបញ្ហាសិទ្ធិមនុស្សកម្ពុជាឆ្នាំ២០១៥
ក្រសួងការបរទេសសហរដ្ឋអាមេរិក ទើបតែបានចេញផ្សាយរបាយការណ៍មួយ ស្តីពី បញ្ហាសិទ្ធិមនុស្សនៅក្នុងប្រទេសកម្ពុជាក្នុងឆ្នាំ២០១។ ជារបាយការណ៍ទៀងទាត់មួយ ដែលសហរដ្ឋអាមេរិកតែងតែធ្វើឡើង ដើម្បីវាយតម្លៃទៅលើស្ថានភាពនៃការគោរពសិទ្ធិមនុស្សនៅក្នុងប្រទេសមួយចំនួននៅលើពិភពលោក ក្នុងនោះក៏មានកម្ពុជាផងដែរ។
ចុះផ្សាយនៅថ្ងៃ៖
ស្តាប់ - ០២:៣៤
របាយការណ៍ក្រសួងការបរទេសអាមេរិក ដែលបានផ្សព្វផ្សាយកាលពីថ្ងៃទី១៣ខែមេសា បានរៀបរាប់យ៉ាងលំអិតអំពីបញ្ហាសិទ្ធិមនុស្សនៅក្នុងប្រទេសកម្ពុជា ដោយបានបែងចែកជា៧ផ្នែកសំខាន់។ នៅក្នុងរបាយការណ៍ជាភាសាអង់គ្លេស ដែលមានកម្រាស់ចំនួន៣៤ទំព័រនេះ បានលើកឡើងពីបញ្ហាប្រឈមនានាដែលកើតឡើងពីបញ្ហានយោបាយ និងប្រព័ន្ធយុត្តិធម៌នៅកម្ពុជា ក្នុងនោះរួមមាន ការកើនឡើងនៃការរំលោភសិទ្ធិសេរីភាពក្នុងការបញ្ចេញមតិ, សេរីភាពនៃការប្រមូលផ្ដុំ និងការចូលរួមក្នុងការបង្កើតជាសមាគម, ការប្រើប្រាស់អំពើហិង្សា និងការគំរាមកំហែងខាងផ្នែកនយោបាយទៅលើគណបក្សប្រឆាំងជាដើម។ ក្រៅពីនោះ របាយការណ៍នេះ ក៏បានលើកឡើងពីបញ្ហារំលោភសិទ្ធិមនុស្សជាច្រើនទៀតដូចជា ការរំលោភសិទ្ធិរបស់អ្នកទោសនៅក្នុងពន្ធនាគា, ការជ្រៀតជ្រែកទៅលើសិទ្ធិសេរីភាពរបស់អ្នកសារព័ត៌មាន, ការបរាជ័យក្នុងការអនុវត្តដោយសមភាពនិងត្រឹមត្រូវទៅលើសិទ្ធិជនភៀសខ្លួន ការរីករាលដាលនៃអំពើពុករលួយ និងការរត់ពន្ធមនុស្សផងដែរ។
នៅក្នុងរបាយការណ៍នេះបានបញ្ជាក់ថា បើទោះបីជារដ្ឋាភិបាលកម្ពុជា បានកាត់ទោសទៅលើមន្ត្រីមួយចំនួនរបស់ខ្លួនដែលធ្វើខុសក្តី ក៏ប៉ុន្តែបញ្ហានិទណ្ឌភាពចំពោះអំពើពុករលួយ និងការប្រព្រឹត្តកំហុសឆ្គងធ្ងន់ធ្ងរនានា នៅតែបន្តកើតមាននៅក្នុងប្រទេសនេះ។
លោក ចន ឃែរី រដ្ឋមន្ត្រីការបរទេសអាមេរិក បានថ្លែងនៅក្នុងសេចក្តីផ្តើមនៃរបាយការណ៍នេះថា ការចេញផ្សាយនូវរបាយការណ៍ទៀងទាត់ដែលសហរដ្ឋអាមរិកតែងតែធ្វើឡើងនេះ គឺដើម្បីជម្រុញឲ្យរដ្ឋាភិបាលនៃប្រទេសទាំងអស់នៅលើពិភពលោកបង្កើនការគោរពសិទ្ធិមនុស្សនៅក្នុងប្រទេសរបស់ខ្លួន រួមទាំងសហរដ្ឋអាមេរិកខ្លួនឯងផង។ លោកបន្តថា “ពិន្ទុដែលយើងបានដាក់នៅក្នុងរបាយការណ៍ម្តងហើយម្តងទៀតនេះ គឺដើម្បីជំរុញឲ្យមានការគោរពសិទ្ធិមនុស្សកាន់តែប្រសើរឡើងនៅក្នុងប្រទេសទាំងនោះ។
របាយការណ៍របស់ក្រសួងការបរទេសអាមេរិកនេះ បានកត់សំគាល់ទៅលើព្រឹត្តិការណ៍នៅក្នុងប្រទេសកម្ពុជា ចាប់ពីក្រោយការបោះឆ្នោតជាតិនៅឆ្នាំ២០១៣មក ពិសេសព្រឹត្តិការណ៍នៃការបាញ់សម្លាប់បាតុករ៤នាក់នៅផ្លូវវេងស្រេងនៃសួនឧស្សាហកម្មកាណាឌីយ៉ាក្នុងបាតុកម្មឆ្នាំ២០១៤ ដែលរហូតមកទល់នឹងពេលនេះ មិនមានជនដៃដល់ណាម្នាក់ត្រូវបានចាប់ខ្លួននោះទេ។ បន្ថែមលើនេះ ដំណឹងនៃការបាត់ខ្លួនរបស់យុវជនម្នាក់ឈ្មោះ ខឹម សុផាត នៅក្នុងបាតុកម្មដើម្បីទាមទារការតម្លើងប្រាក់ខែរបស់កម្មករនៅខែមករាឆ្នាំ២០១៤នោះ ក៏ត្រូវបានបញ្ចូលទៅក្នុងរបាយការណ៍នេះដែរ។
សូមបញ្ជាក់ថា រហូតមកទល់នឹងពេលនេះ នៅមិនទាន់មានប្រតិកម្មជាផ្លូវការទៅនឹងរបាយការណ៍នេះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ